ພິທີມອບລາງວັນການແຂ່ງຂັນອອກແບບ ແລະ ເປີດນຳໃຊ້ສັນຍະລັກສະເຫຼີມສະຫຼອງສາຍພົວພັນການທູດ ລະຫວ່າງ ສປປ ລາວ ແລະ ສ ເກົາຫຼີ ຄົບຮອບ 25 ປີ (25 ຕຸລາ 1995 – 25 ຕຸລາ 2020) ຈັດຂຶ້ນວັນທີ 11 ສິງຫາ 2020 ທີ່ໂຮງແຮມ ຄຣາວພລາຊາ ນະຄອນຫຼວງວຽງຈັນ ໂດຍມີທ່ານ ຊິນ ຊອງຊຸນ ເອກອັກຄະລັດຖະທູດ ສ ເກົາຫຼີ ປະຈຳລາວ ທ່ານ ທອງສະຫວັນ ພົມວິຫານ ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຕາງໜ້າອົງການຈັດຕັ້ງສາກົນປະຈຳລາວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ກິດຈະກຳການແຂ່ງຂັນອອກແບບສັນຍະລັກສາຍພົວພັນການທູດ ສປປ ລາວ ແລະ ສ ເກົາຫຼີ ເປັນກິດຈະກຳທີ່ມີຄວາມໝາຍຄວາມສຳຄັນ ເປັນການເຊື່ອມຕໍ່ຈິດໃຈ ລະຫວ່າງປະຊາຊົນສອງຊາດ ລາວ ແລະ ສ ເກົາຫຼີ ເຊິ່ງກິດຈະກຳຄັ້ງນີ້ ມີຜູ້ເຂົ້າຮ່ວມແຂ່ງຂັນທັງໝົດ 109 ຄົນ ມີ 200 ກວ່າຮູບພາບ ຜ່ານການແຂ່ງຂັນ ຊະນະເລີດໄດ້ແກ່ຮູບສັນຍະລັກຈາກຊຸດແຕ່ງກາຍປະຈຳຊາດ ໂດຍສະເພາະແມ່ນແມ່ຍິງຂອງສອງປະເທດ ສະແດງໃຫ້ເຫັນເຖິງວັດທະນະທຳຂອງແມ່ຍິງທັງສອງປະເທດ ພ້ອມທັງເປັນການສົ່ງເສີມບົດບາດແມ່ຍິງລາວ ແລະ ແມ່ຍິງ ສ ເກົາຫຼີ ຮູບສັນຍະລັກດັ່ງກ່າວ ແມ່ນຜົນງານຂອງທ້າວ ຄຳເກີດ ຟານຄຳ ອາຍຸ 23 ປີ ເປັນນັກສຶກສາລາວທີ່ກຳລັງສຶກສາຢູ່ປະເທດຝຣັ່ງ ໄດ້ຮັບໃບຢັ້ງຢືນ ແລະ ໂທລະສັບມືຖື ສ່ວນຮອງຊະນະເລີດ ໄດ້ແກ່ທ້າວ ໄຊຍະພອນ ບົວຈັນທະລາ ໂດຍໄດ້ຄົ້ນຄິດຮູບສັນຍະລັກເປັນຮູບການຈັບມື ເຊີ່ງສະແດງເຖິງການຮ່ວມມືເຊິ່ງກັນ ແລະ ກັນ ພ້ອມດອກໄມ້ ປະຈຳຊາດຂອງສອງປະເທດ ເຊີ່ງໄດ້ຮັບໃບຢັ້ງຢືນ ແລະ ຂອງທີ່ລະນຶກ.
ສປປ ລາວ ແລະ ສ ເກົາຫຼີ ສ້າງຕັ້ງສາຍພົວພັນການທູດນຳກັນໃນວັນ 25 ຕຸລາ 1995 ເຊິ່ງຮອດວັນທີ 25 ຕຸລາ 2020 ທີ່ຈະມາເຖິງນີ້ ພໍດີຄົບຮອບ 25 ປີ ຕະຫຼອດໄລຍະ 25 ປີຜ່ານມາ ສາຍພົວພັນການທູດລະຫວ່າງສອງປະເທດ ແມ່ນໄດ້ຮັບການເສີມຂະຫຍາຍທາງດ້ານປະລິມານ ແລະ ຄຸນນະພາບໃນຫຼາຍໆດ້ານ ເຊີ່ງເດັ່ນກວ່າໝູ່ ແມ່ນການແລກປ່ຽນຢ້ຽມຢາມຂອງການນຳຂັ້ນສູງຂອງທັງສອງປະເທດ ດ້ານການຊ່ວຍເຫຼືອ ນັບແຕ່ປີ 2015 ມາຮອດປັດຈຸບັນ ສ ເກົາຫຼີ ໄດ້ໃຫ້ການຊ່ວຍເຫຼືອດ້ານເງິນກູ້ດອກເບ້ຍຕ່ຳແກ່ ສປປ ລາວ ລວມທັງໝົດ 640 ລ້ານໂດລາສະຫະລັດ ແລະ ໃຫ້ເງິນຊ່ວຍເຫຼືອລ້າທັງໝົດ 235 ລ້ານໂດລາສະຫະລັດ ການຄ້າ ແລະ ການລົງທຶນມີທ່າອ່ຽງເພີ່ມຂຶ້ນທຸກໆປີ ເຊິ່ງຈັດຢູ່ໃນແຖວໜ້າອັນດັບ 5 ເຊີ່ງມີມູນຄ່າການລົງທຶນ 751 ລ້ານໂດລາສະຫະລັດ ມີ 293 ໂຄງການຂອງການລົງທຶນ.