ສະຫາຍ ສີປະໄພ ໄຊສົງຄາມ ເລຂາຄະນະພັກຮາກຖານ ຫົວໜ້າກົມສົ່ງເສີມເຕັກນິກ ແລະ ປຸງແຕ່ງກະສິກຳ ໄດ້ຂຶ້ນໄດ້ຂື້ນຜ່ານຮ່າງບົດລາຍງານການເມືອງທັງ 2 ພາກ ໂດຍສະເພາະ ຕີລາຄາການຊີ້ນຳນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ II ໃນ 5 ປີຜ່ານມາ (2015-2020) ແລະ ທິດທາງແຜນການໃນຕໍ່ໜ້າ ໃນກອງປະຊຸມໃຫຍ່ຄັ້ງທີ III ຂອງຄະນະພັກຮາກຖານກົມສົ່ງເສີມເຕັກນິກ ແລະ ປຸງແຕ່ງກະສິກຳ ກະຊວງກະສິກຳ ແລະ ປ່າໄມ້ ໄດ້ຈັດຂຶ້ນວັນທີ 7 ສິງຫາ 2020 ວ່າ:
ຄະນະພັກໄດ້ເອົາໃຈໃສ່ຊີ້ນຳຢ່າງໃກ້ຊິດ ແລະ ໄດ້ສຸມທຸກກຳລັງເຂົ້າໃນການຈັດຕັ້ງວຽກງານວິຊາສະເພາະຕາມແຜນພັດທະນາຂະແໜງການຕົນ ແລະ ແຜນພັດທະນາກະສິກຳ ປ່າໄມ້ ແລະ ພັດທະນາຊົນນະບົດຕາມທິດ 3 ເສົ້າຄ້ຳ 4 ແຜນງານໃຫຍ່ ແລະ 10 ແຜນດຳເນີນງານ ໂດຍໄດ້ສຸມໃສ່ຍູ້ແຮງການຜະລິດສະບຽງອາຫານ ແລະ ການຜະລິດເປັນສິນຄ້າ ເພື່ອຊົມໃຊ້ພາຍໃນ ແລະ ສົ່ງອອກ ຊາວກະສິກອນໄດ້ຕັ້ງກຸ່ມການຜະລິດດ້ວຍຄວາມສະໝັກໃຈໄດ້ທັງໝົດ 1.528 ກຸ່ມ ມີສະມາຊິກ 34.771 ຄົນ ໄດ້ສ້າງຕັ້ງ ແລະ ຮັບຮອງເຄືອຂ່າຍຊາວກະສິກອນລາວທັງໝົດ 59 ຫົວໜ່ວຍການຜະລິດ ມີສະມາຊິກຈຳນວນ 4.400 ຄົນ ທຽບໃສ່ກອງປະຊຸມໃຫຍ່ຄັ້ງທີ 2 ເພີ່ມຂຶ້ນ 42 ກຸ່ມ ເທົ່າກັບ 71,18% ສ້າງຄອບຄົວຕົວແບບດ້ານກະສິກຳໄດ້ 150 ຄອບຄົວ ບ້ານຕົວແບບໄດ້ 30 ບ້ານ ພິເສດ ໄດ້ຕັ້ງກຸ່ມ 4 ຮ່ວມພັດທະນາເປັນກຸ່ມຊ່ວຍເຫຼືອເຊິ່ງກັນ ແລະ ກັນ ນອກຈາກນັ້ນ ໄດ້ຈັດຕັ້ງເຝິກອົບຮົມສ້າງຂີດຄວາມສາມາດໃຫ້ພະນັກງານສົ່ງເສີມໃນລະດັບຕ່າງໆ ໄປຄຽງຄູ່ກັບປັບປຸງຮູບແບບການຜະລິດແບບໃໝ່ ເຊັ່ນ: ການປູກພືດຜັກສະອາດ ແລະ ອິນຊີໃນເຮືອນຮົ່ມ ນຳໃຊ້ລະບົບການໃຫ້ນ້ຳແບບປະຢັດ ນຳໃຊ້ຝຸ່ນຊີວະພາບ ການຜະລິດແບບກະເສດສຸມ ແບບປະສົມປະສານ ນຳໃຊ້ຢາປາບສັດຕູພືດທີ່ເປັນພູມປັນຍາຊາວບ້ານ ການຜະລິດນຳໃຊ້ກົນຈັກ ກໍນັບມື້ຂະຫຍາຍຕົວ ຫັນມານຳໃຊ້ກົນຈັກເພີ່ມຂຶ້ນ 84% ຂອງການຜະລິດເຂົ້າໃນທົ່ວປະເທດ ແລະ ໄດ້ສົ່ງເສີມຊາວກະສິກອນຜະລິດແນວພັນເຂົ້າທີ່ດີ 30.000 ໂຕນ ແນວພັນເຂົ້າລຸ້ນ 3 ໄດ້ 7.000 ໂຕນ ສູນ ແລະ ສະຖານີສາມາດຜະລິດໄດ້ປີລະ 1.500 ໂຕນ ແລະ ສາມາດແຮໄວ້ຕ້ານແລ້ງຕ້ານຖ້ວມ 150 ໂຕນຕໍ່ປີ ທຽບໃສ່ມະຕິກອງປະຊຸມຄັ້ງທີ 2 ເພີ່ມຂຶ້ນ 90% ແລະ ໄດ້ປຸງແຕ່ງສາລີເພື່ອສົ່ງອອກ 4 ເມືອງຂອງແຂວງໄຊຍະບູລີ ສາມາດຜະລິດໄດ້ 1 ລ້ານໂຕນ/ປີ ປຸງແຕ່ງມັນຕົ້ນສົ່ງອອກໄດ້ 3 ແສນໂຕນຕໍ່ປີ ການພັດທະນາໂຮງສີເຂົ້າທີ່ໄດ້ມາດຕະຖານສາກົນ ເພື່ອສົ່ງອອກເຂົ້າທີ່ມີຄຸນນະພາບດີຢູ່ພາກກາງ ແລະ ພາກໃຕ້ ກໍມີຫຼາຍແຫ່ງທີ່ສາມາດສົ່ງອອກໄດ້ຫຼາຍແສນໂຕນຕໍ່ປີ.