ຈາກສະພາບຝົນຕົກຕິດຕໍ່ກັນຫຼາຍວັນ ຍ້ອນພາຍຸພັດຜ່ານ ເຮັດໃຫ້ຫຼາຍປະເທດຖືກນ້ຳຖ້ວມ ສະ ເພາະ ສປປ ລາວ ກໍມີສະພາບນ້ຳຖ້ວມຢູ່ບາງທ້ອງຖິ່ນ ເປັນຕົ້ນຢູ່ແຂວງໄຊຍະບູລີ ສ່ວນພາກກາງ ກໍມີບາງແມ່ນ້ຳທີ່ລະດັບນ້ຳເພີ່ມຂຶ້ນເລື້ອຍໆ ໂດຍສະເພາະເມືອງບໍລິຄັນ ແຂວງບໍລິຄຳໄຊ ເຮັດໃຫ້ອຳນາດການປົກຄອງເມືອງ ໄດ້ອອກແຈ້ງການໃຫ້ເຝົ້າລະວັງແມ່ນ້ຳ ມາຮອດວັນທີ 5 ສິງຫາ 2020 ນ້ຳໄດ້ໄຫຼເຂົ້າເທດສະບານເມືອງດັ່ງກ່າວບາງຈຸດ ເປັນຕົ້ນເຂດບ້ານນາແຫນ ສີສະຫວາດ ຫາດດອນຄູນ ແລະ ຈຸດ ອື່ນໆທີ່ຕ່ຳ ຈຶ່ງຮຽກຮ້ອງທຸກຄົນມີສະຕິກຽມຍົກຍ້າຍເຄື່ອງຂອງ ແລະ ສັດລ້ຽງອອກຈາກຈຸດທີ່ມີຄວາມສ່ຽງ.
ເພື່ອກຽມພ້ອມຕອບໂຕ້ ແລະ ຮັບມືກັບໄພພິບັດນ້ຳຖ້ວມທີ່ອາດຈະເກີດຂຶ້ນໃນຕໍ່ໜ້າ ວັນທີ 4 ສິງຫາ 2020 ຫ້ອງວ່າການປົກຄອງເມືອງບໍລິຄັນ ໄດ້ອອກແຈ້ງການເຖິງຫົວໜ້າຫ້ອງການ ອົງການທຽບເທົ່າ ກອງບັນຊາການ ປກຊ ກອງບັນຊາການ ປກສ ເມືອງ ນາຍບ້ານ ປະຊາຊົນ ແລະ ທຸກພາກສ່ວນ ຊາບວ່າ: ວັນທີ 3-10 ສິງຫາ 2020 ຈະເກີດມີຝົນຕົກເປັນບໍລິເວນກວ້າງ ພ້ອມມີລົມພັດແຮງທົ່ວແຂວງ ໂດຍສະເພາະທົ່ວເມືອງບໍລິຄັນ ຈາກການລົງກວດກາຕິດຕາມສະພາບນ້ຳສາຍຕ່າງໆແມ່ນເພີ່ມຂຶ້ນຫຼາຍ ແລະ ອາດຈະເພີ່ມຂຶ້ນຕື່ມອີກ ຈຶ່ງເຕືອນໃຫ້ທຸກພາກສ່ວນມີສະຕິລະວັງຕົວຕໍ່ພາຍຸລົມແຮງ ຝົນຕົກໜັກ ນ້ຳຖ້ວມຂັງ ນ້ຳເຊາະດິນເຈື່ອນ ແລະ ການແຜນລະບາດຂອງພະຍາດຕ່າງໆ ເພື່ອຮັບມືໃຫ້ໄດ້ຢ່າງທັນການ.
ໃຫ້ທຸກພາກສ່ວນທີ່ຢູ່ເຂດທີ່ມີຄວາມສ່ຽງກຽມພ້ອມດ້ານສະຖານທີ່ມີຄວາມປອດໄພ ເພື່ອຍົກຍ້າຍວັດຖຸສິ່ງຂອງຕ່າງໆໃນເມື່ອມີເຫດການເກີດຂຶ້ນ ຫ້າມໄປຢູ່ບ່ອນທີ່ມີຄວາມສ່ຽງຕໍ່ນ້ຳປ່າໄຫຼແຮງ ການເຊາະເຈື່ອນຂອງດິນພູ ແລະ ດິນແຄມຕາຝັ່ງຂອງສາຍນ້ຳຕ່າງໆ ຖ້າຜູ້ໃດຢູ່ເຂດສ່ຽງດັ່ງກ່າວແມ່ນໃຫ້ຍົກຍ້າຍອອກ ໃຫ້ນາຍບ້ານແຕ່ງຕັ້ງຄະນະຮັບຜິດຊອບ ເພື່ອອຳນວຍຄວາມສະດວກໃນການປະສານງານກັບຂັ້ນເທິງ ພ້ອມແຈ້ງໃຫ້ປະຊາຊົນຮັບຮູ້ຂໍ້ມູນຂ່າວສານຈາກການຈັດຕັ້ງ-ຂະແໜງການກ່ຽວຂ້ອງແຕ່ລະໄລຍະ ຜ່ານໂທລະໂຄ່ງ ແລະ ສື່ຕ່າງໆ ໃຫ້ບ້ານກະກຽມເຮືອ ແລະ ວັດຖຸອຸປະກອນຕ່າງໆໄວ້ຊ່ວຍເຫຼືອປະຊາຊົນ ໃຫ້ຄະນະຕ້ານໄພພິບັດຂັ້ນເມືອງ ແລະ ຫົວໜ້າຫ້ອງການ ອົງການ ແຈ້ງໃຫ້ພະນັກງານ ທະຫານ ຕຳຫຼວດທີ່ຢູ່ໃນຄວາມຮັບຜິດຊອບຂອງຕົນຮັບຊາບ ກຽມຄວາມຮັບມື ເຂົ້າຮ່ວມອຳນວຍຄວາມສະດວກຮັບໃຊ້ ເວລາມີຄວາມຈຳເປັນ ພ້ອມທັງຕິດຕາມແກ້ໄຂສະພາບເສັ້ນທາງ ການສັນຈອນ ສະພາບລະບາດຂອງພະ ຍາດ ກຽມເຄື່ອງອຸປະໂພກ-ບໍລິໂພກ ເພື່ອຊ່ວຍເຫຼືອປະຊາຊົນ.