ນອກຈາກການເສຍສິດຂອງບຸກຄົນໃດໜຶ່ງ ຕາມອາຍຸການ ຊຶ່ງກົດໝາຍໄດ້ກຳນົດໄວ້ແລ້ວ ມີບາງກໍລະນີຂອງການປະຕິບັດສັນຍາລະຫວ່າງຄູ່ສັນຍາດ້ວຍກັນ ອາຍຸຄວາມອາດຈະຖືກໂຈະໂດຍທັນທີທັນໃດ ໃນເມື່ອເຫດການໃດໜຶ່ງເກີດຂຶ້ນ ດັ່ງນັ້ນ ໃນກົດໝາຍ ກໍໄດ້ກຳນົດໄວ້ຢ່າງຈະແຈ້ງ ໃນກໍລະນີຫາກມີການໂຈະອາຍຸການປະຕິບັດສັນຍາຂອງຄູ່ສັນຍາ.
ອາຍຸຄວາມຈະຖືກໂຈະ ໃນກໍລະນີທີ່ມີເຫດສຸດວິໄສ ຫຼື ເຫດການບັງເອີນຂຶ້ນ ຊຶ່ງເປັນອຸປະສັກຕໍ່ການຍື່ນຄຳຮ້ອງຟ້ອງ ຫຼື ການທວງ ພາຍຫຼັງທີ່ໄລຍະເວລາຂອງການໂຈະນັ້ນໄດ້ສິ້ນສຸດແລ້ວ ອາຍຸຄວາມທີ່ໄດ້ຜ່ານມາ ກ່ອນນັ້ນກໍຈະສືບຕໍ່ອີກ ໝາຍຄວາມວ່າໄລຍະເວລາທີ່ຖືກໂຈະນັ້ນໄດ້ສິ້ນສຸດລົງແລ້ວ ອາຍຸຄວາມທີ່ຜ່ານມາກ່ອນນັ້ນ ກໍຈະສືບຕໍ່ອີກໝາຍຄວາມວ່າໄລຍະເວລາທີ່ຖືກໂຈະນັ້ນ ບໍ່ໃຫ້ນັບເຂົ້າເປັນອາຍຸຄວາມ.
ຕົວຢ່າງ: ນາງ ເປີ້ຍ ໄດ້ເສຍຊີວິດ ໃນວັນທີ 31 ທັນວາ 2010 ຜູ້ກ່ຽວມີລູກ 2 ຄົນ ຊື່ ຈ ແລະ ຖ ຊຶ່ງອາໄສຢູ່ຫ່າງກັນ ພາຍຫຼັງທີ່ ນາງ ເປີ້ຍ ເສຍຊີວິດ ມູນມໍລະດົກທັງໝົດ ແມ່ນ ທ້າວ ຈ ເປັນຜູ້ຄຸ້ມຄອງໄວ້ ຫຼັງຈາກນັ້ນ 2 ປີ ຫົກເດືອນ ນາງ ຖ ກໍຍັງບໍ່ມີເວລາມາຂໍແບ່ງປັນນຳ ທ້າວ ຈ ແຕ່ບັງເອີນໃນໄລຍະເວລາຂອງປີທີສາມ ໄດ້ເກີດໄພນ້ຳຖ້ວມ ແຕ່ວັນທີ 20 ສິງຫາ 2013 ຫາວັນທີ 20 ພະຈິກ 2013 ຈາກນັ້ນ ຈຶ່ງຄືນສູ່ສະພາບປົກກະຕິ ໃນໄລຍະເວລາສາມເດືອນທີ່ເກີດໄພທຳມະຊາດ ເຮັດໃຫ້ ນາງ ຖ ບໍ່ສາມາດໄປຫາ ທ້າວ ຈ ໄດ້ນັ້ນ ຖືວ່າເປັນໄລຍະເວລາຂອງອາຍຸຄວາມຖືກໂຈະ ຊຶ່ງໄລຍະເວລາດັ່ງກ່າວ ບໍ່ໃຫ້ໄລ່ເຂົ້າໃສ່ກຳນົດເວລາຂອງອາຍຸຄວາມໃນການຮ້ອງຟ້ອງ ນາງ ຖ ສາມາດໄປທວງເອົາມູນມໍລະດົກໄດ້ຈົນຮອດວັນທີ 31 ມີນາ 2014 ຈຶ່ງໝົດ ແທນທີ່ຈະແມ່ນວັນທີ 31 ມັງກອນ 2014.
ໂດຍ: ໄມ້ງັດ