ກອງປະຊຸມປຶກສາຫາລື ເພື່ອກະກຽມເປີດກອງປະຊຸມທຸລະກິດທ່ອງທ່ຽວ ນະຄອນຫຼວງວຽງຈັນ (ນວ) ຈັດຂຶ້ນວັນທີ 29 ກໍລະກົດ 2020 ຢູ່ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນວ ມີທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນວ ທ່ານ ບົວຂາວ ພົມສຸວັນ ປະທານທີ່ປຶກສາ ສະມາຄົມທຸລະກິດທ່ອງທ່ຽວລາວ ແລະ ກຸ່ມທຸລະກິດທ່ອງທ່ຽວ ນວ ທ່ານ ຄຳຄູນ ໃບລາຕຣີ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນວ ທ່ານຮອງປະທານສະມາຄົມ ແລະ ຂະແໜງການກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ສອງຝ່າຍໄດ້ປຶກສາຫາລືກັນຫຼາຍບັນຫາ ໂດຍສະເພາະການຫ້າງຫາກະກຽມເນື້ອໃນກອງປະຊຸມ ພາຍຫຼັງເກີດຜົນກະທົບຈາກການລະບາດຂອງພະຍາດໂຄວິດ-19 ພ້ອມທັງຫາລືການປັບປຸງຮ່າງກົດລະບຽບຂອງກຸ່ມທຸລະກິດທ່ອງທ່ຽວ ນວ ວ່າຈຸດໃດທີ່ເຫັນວ່າເນື້ອໃນຍັງບໍ່ທັນສອດຄ່ອງ ເພື່ອນຳມາປັບປຸງແກ້ໄຂຕໍ່ໄປ.
ທ່ານນາງ ວິໄລວອນ ຈັນທະລາຕີ ກ່າວວ່າ: ຜ່ານການຮັບຟັງການປະກອບຄຳຄິດຄຳເຫັນຂອງສອງຝ່າຍ ໂດຍພື້ນຖານແລ້ວ ພະແນກ ຖວທ ນວ ເຫັນດີໃຫ້ການສະໜັບສະໜູນເປີດກອງປະຊຸມດັ່ງກ່າວ ໂດຍການຮ່ວມມືລະຫວ່າງກຸ່ມທຸລະກິດທ່ອງທ່ຽວ ນວ ແລະ ພະແນກ ຖວທ ນວ ໃນນີ້ ພວກເຮົາອາດຈະເຊື້ອເຊີນສະມາຄົມທຸລະກິດທ່ອງທ່ຽວລາວ ກົມທີ່ກ່ຽວຂ້ອງ ພະແນກການທີ່ກ່ຽວຂ້ອງ ເຂົ້າຮ່ວມໃນການປຶກສາຫາລື ພ້ອມທັງຮັບຟັງຄຳຄິດເຫັນຂອງບັນດາຜູ້ປະກອບການທຸລະກິດທ່ອງທ່ຽວ ເພື່ອຫາວີທີແກ້ໄຂໃນອະນາຄົດ.
ສຳລັບເນື້ອໃນວາລະກອງປະຊຸມຈະແບ່ງອອກເປັນ 2 ເນື້ອໃນຫຼັກຄື: ຮ່ວມກັນປຶກສາຫາລືກ່ຽວກັບວິທີທາງແກ້ໄຂຊ່ວຍເຫຼືອ ບັນດາບໍລິສັດທຸລະກິດທ່ອງທ່ຽວ ພາຍຫຼັງທີ່ເກີດມີການແຜ່ລະບາດຂອງພະຍາດໂຄວິດ-19 ເຊິ່ງບັນດາຜູ້ປະກອບການທຸລະກິດທ່ອງທ່ຽວ ມີຜົນກະທົບຫຼາຍໜ້ອຍຊ່ຳໃດ ແລະ ພວກເຮົາຈະມີວິທີຊ່ວຍເຫຼືອກັນແນວໃດ ສ່ວນເນື້ອໃນທີສອງ ແຜນການປັບປຸງການຈັດຕັ້ງ ກໍຄືການຜ່ານຮ່າງລະບຽບ ແລະ ສະເໜີສິດຜົນປະໂຫຍດ ເພື່ອລະດົມເອົາບັນດາຜູ້ປະກອບການ ເຂົ້າມາເປັນຄະນະບໍລິຫານງານກຸ່ມທຸລະກິດທ່ອງທ່ຽວ ນວ ສ່ວນວັນ ແລະ ເວລາເປີດກອງປະຊຸມທຸລະກິດທ່ອງທ່ຽວ ນວ ຄາດວ່າຈະຈັດຂຶ້ນໄວໆນີ້.