ກອງປະຊຸມໃຫຍ່ ຄັ້ງທີ 4 ຂອງຄະນະພັກຮາກຖານພະແນກສຶກສາທິການ ແລະ ກີລາ ນະຄອນຫຼວງວຽງຈັນ (ນວ) ຈັດຂຶ້ນວັນທີ 27 ກໍລະກົດ 2020 ທີ່ສູນການຄ້າລາວໄອເຕັກ ນວ ໂດຍເປັນປະທານ ສະຫາຍ ສົມພອນ ສອນດາລາ ຄະນະພັກຮາກຖານ ຫົວໜ້າພະແນກສຶກສາທິການ ແລະ ກີລາ ນວ ກອງປະຊຸມເປັນກຽດຕ້ອນຮັບສະຫາຍ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງ ນວ ມີສະຫາຍຄະນະພັກຮາກຖານ ແຂກຖືກເຊີນ ແລະ ສະຫາຍສະມາຊິກພັກທີ່ຂຶ້ນກັບຄະນະພັກຮາກຖານພະແນກ ສສກ ນວ ເຂົ້າຮ່ວມ.
ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າຕີລາຄາຄືນ ບັນຫາຈຸດດີ ຈຸດອ່ອນ ຂໍ້ຄົງຄ້າງ ໃນການຊີ້ນຳ-ນຳພາຂອງຄະນະພັກຮາກຖານ ທີ່ປະຊຸມໄດ້ພ້ອມກັນຮັບຝັງຮ່າງລາຍງານການເມືອງທັງສອງພາກ ຈາກສະຫາຍ ສົມພອນ ສອນດາລາ ເຊິ່ງໄດ້ຍົກໃຫ້ເຫັນຜົນງານການເຄື່ອນໄຫວຫຼາຍດ້ານທີ່ພົ້ນເດັ່ນ ໃນໄລຍະຜ່ານມາ ແລະ ໄດ້ປ່ອນບັດຄັດເລືອກເອົາຄະນະພັກຮາກຖານ ພະແນກ ສສກ ນວ ຊຸດໃໝ່ ເຊິ່ງມີຜູ້ລົງສະ ໝັກ 11 ສະຫາຍ ຍິງ 1 ສະຫາຍ ຜົນການຄັດເລືອກ ໄດ້ຄະນະປະຈຳພັກ 3 ສະຫາຍ ຄະນະພັກ 9 ສະຫາຍ ເລືອກເອົາສະຫາຍ ສົມພອນ ສອນດາລາ ເປັນເລຂາຄະນະພັກຮາກຖານພະແນກ ສສກ ນວ ສະຫາຍ ບຸນທັນ ແສງມະນີ ເປັນຮອງເລຂາ ສະຫາຍ ແສງອາລຸນ ວົງພູທອນ ເປັນປະທານກວດກາ ແລະ ເລືອກຮອງປະທານກວດກາອີກສອງສະຫາຍ ພ້ອມດຽວກັນນັ້ນ ທີ່ປະຊຸມຍັງຄັດເລືອກເອົາຄະນະຜູ້ແທນ ສົມບູນເຂົ້າຮ່ວມກອງປະຊຸມໃຫຍ່ອົງຄະນະພັກ ນວ.