ພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ ແລະ ຮັບຮອງເມືອງສີໂຄດຕະບອງ ເປັນເມືອງສະຫະພັນແມ່ຍິງ 3 ດີ ປະຈຳປີ 2015-2020 ຈັດຂຶ້ນວັນທີ 28 ກໍລະກົດ 2020 ຢູ່ສະໂມສອນປົກຄອງເມືອງສີໂຄດຕະບອງ ໂດຍມີທ່ານ ວິລະສັກ ນາມມຸນຕີ ເຈົ້າເມືອງສີໂຄດຕະບອງ ທ່ານນາງ ບົວລອນ ວົງດາລາແສນ ປະທານສະຫະພັນແມ່ຍິງ ນະຄອນຫຼວງວຽງຈັນ ມີຄະນະບໍລິຫານງານສະຫະພັນແມ່ຍິງເມືອງສີໂຄດຕະບອງ ມີບັນດາອະດີດຄະນະບໍລິຫານງານສະຫະພັນແມ່ຍິງເມືອງ ປ້າອາວຸໂສ ສະມາຊິກສະຫະພັນແມ່ຍິງເມືອງ ແລະ ແຂກຖືກເຊີນເຂົ້າຮ່ວມ.
ທ່ານນາງ ອາລຸນນີ ສີພາຄຳ ປະທານຄະນະບໍລິຫານງານສະຫະພັນແມ່ຍິງເມືອງສີໂຄດຕະບອງ ໄດ້ລາຍງານການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງເມືອງສີໂຄດຕະບອງ ໃນໄລຍະ 5 ປີຜ່ານມາ (2015-2020) ບາງຕອນວ່າ: ສະຫະພັນແມ່ຍິງເມືອງສີໂຄດຕະບອງ ໄດ້ນຳພາຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ຄື: ພົນລະເມືອງດີ ພັດທະນາດີ ສ້າງຄອບຄົວດີ ຕິດພັນກັບການຈັດຕັ້ງປະຕິບັດ 3 ສ້າງ ຂະບວນການແຂ່ງຂັນຮັກຊາດ ແລະ ພັດທະນາ ສ້າງໜ່ວຍພັກປອດໃສ ເຂັ້ມແຂງໜັກແໜ້ນ ສ້າງຄອບຄົວ ແລະ ບ້ານພັດທະນາ ບ້ານແບບຢ່າງສາທາລະນະສຸກ ບ້ານວັດທະນະທຳ ບ້ານປອດຄະດີ ຕ້ານ ແລະ ສະກັດກັ້ນປະກົດການຫຍໍ້ທໍ້ ນະໂຍບາຍ 6 ສ ຂອງນະຄອນຫຼວງວຽງຈັນ ເຊິ່ງສະຫະພັນແມ່ຍິງພວກເຮົາ ໄດ້ນຳພາຄະນະສະຫະພັນແມ່ຍິງຢູ່ແຕ່ລະຮາກຖານບ້ານ ຮາກຖານໂຮງຮຽນ ຮາກຖານຫ້ອງການອ້ອມຂ້າງ ໜ່ວຍຫ້ອງການ ແລະ ໜ່ວຍໂຮງຮຽນ ເກັບກຳຂໍ້ມູນ ແລະ ວາງແຜນເພື່ອເປີດຂະບວນການແຂ່ງຂັນເຜີຍແຜ່ເນື້ອໃນຂໍ້ແຂ່ງຂັນ 3 ດີ ໃຫ້ບັນດາກຸ່ມເປົ້າໝາຍ.