ກອງປະຊຸມປະກາດຜົນການສຳຫຼວດການຊົມໃຊ້ ແລະ ການໃຊ້ຈ່າຍຂອງຄົວເຮືອນໃນລາວ ຄັ້ງທີ 6 ໄລຍະປີ 2018-2019 ຈັດຂຶ້ນວັນທີ 28 ກໍລະກົດ 2020 ທີ່ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ (ຜທ) ໂດຍເປັນປະທານທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງ ຜທ ມີທ່ານນາງ ພອນສະຫຼີ ສຸກສະຫວັດ ຮອງຫົວໜ້າສູນສະຖິຕິແຫ່ງຊາດ ບັນດາຫົວໜ້າກົມ ຮອງກົມ ຜູ້ຕາງໜ້າອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ພອນສະຫຼີ ສຸກສະຫວັດ ກ່າວວ່າ: ການສຳຫຼວດການຊົມໃຊ້ ແລະ ການໃຊ້ຈ່າຍຂອງຄົວເຮືອນໃນລາວ ແມ່ນການສຳຫຼວດຕົວແທນຂະໜາດໃຫຍ່ໃນຂອບເຂດທົ່ວປະເທດ ໂດຍໄດ້ຮັບການອະນຸມັດຈາກລັດຖະບານ ກໍຄືກະຊວງແຜນການ ແລະ ການລົງທືນ ມອບໃຫ້ສູນສະຖິຕິແຫ່ງຊາດເປັນຜູ້ຈັດຕັ້ງປະຕິບັດ ເຊິ່ງໄດ້ສືບຕໍ່ຈັດຕັ້ງປະຕິບັດມາທຸກໆ 5 ປີ ເລິ່ມແຕ່ປີ 1992-1993 ເປັນຕົ້ນມາ ຕາມແຜນຍຸດທະສາດພັດທະນາລະບົບສະຖິຕິແຫ່ງຊາດແຕ່ລະໄລຍະ ເພື່ອຕອບສະໜອງຂໍ້ມູນຂ່າວສານທີ່ຄົບຖ້ວນ ມີຄຸນນະພາບ ແລະ ບັນດາຕົວຊີ້ບອກໃຫ້ແກ່ການຕີລາຄາ-ປະເມີນຜົນສຳເລັດ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແຕ່ຂັ້ນສູນກາງລົງຮອດທ້ອງຖີ່ນໃນແຕ່ລະໄລຍະ ລວມທັງການຈັດຕັ້ງປະຕິບັດເປົ້າໝາຍການ ພັດທະນາແບບຍືນຍົງໃຫ້ມີຜົນສຳເລັດເທື່ອລະກ້າວ.
ຜ່ານການຈັດຕັ້ງປະຕິບັດ ເກັບກຳຂໍ້ມູນສຳຫຼວດຕົວຈິງ ຊີ້ໃຫ້ເຫັນວ່າ ດ້ານຄຸນລັກສະນະຂອງຄົວເຮືອນ ການຊົມໃຊ້ ແລະ ການໃຊ້ຈ່າຍຂອງຄົວເຮືອນ ປີ 2018-2019 ຈຳນວນຄົວເຮືອນໃນລາວ ມີທັງໝົດປະມານ 1,2 ລ້ານກວ່າຄົວເຮືອນ ມີຂະໜາດຂອງຄົວເຮືອນສະເລ່ຍແມ່ນ 4,7 ຄົນຕໍ່ຄົວເຮືອນ ທຽບໃສ່ໃນປີ 2012-2013 ຫຼຸດລົງ 5,2 ຄົນ ໃນນີ້ ອາໄສຢູ່ໃນຕົວເມືອງມີ 34,8% ອາໄສໃນຊົນນະບົດທີ່ມີຫົນທາງ 58,8% ແລະ ອາໄສໃນຊົນນະບົດທີ່ບໍ່ມີເສັ້ນທາງ 6,6% ການຊົມໃຊ້ຕໍ່ເດືອນຂອງຄົວເຮືອນຄົນລາວ ສະເລ່ຍຢູ່ໃນລະດັບ 2,63 ລ້ານກີບ ເພີ່ມຂຶ້ນຈາກ 2,05 ລ້ານກີບໃນປີ 2012-2013 ໃນນັ້ນ ການຊົມໃຊ້ໝວດສະບຽງອາຫານ ຍັງກວມເອົາອັດຕາເພີ່ມຂຶ້ນຈາກ 70,4% ເປັນ 73,6% ການຊົມໃຊ້ຜົນຜະລິດຂອງຕົວເອງ ຫຼຸດລົງຈາກ 39,9%ໃນ 5 ຜ່ານມາເປັນ 34,8% ການບໍລິໂພກເຂົ້າ ຫຼຸດລົງຈາກ 34,2% ໃນ 5 ປີຜ່ານມາ ເປັນ30,8% ໃນປີ 2018-2019.
ການເຂົ້າເຖິງການບໍລິການດ້ານສຶກສາ ແລະ ສາທາລະນະສຸກ ການຜະລິດ ແລະ ກິດຈະກຳທຸລະກິດຂອງຄົວເຮືອນ ການນຳໃຊ້ເວລາ ແລະ ຄວາມທຸກຍາກໃນລາວ ຜົນສຳຫຼວດຊີ້ໃຫ້ເຫັນວ່າ ການເປັນຢູ່ຂອງປະຊາຊົນລາວແມ່ນນັບມື້ດີຂື້ນເປັນກ້າວໆ ເມື່ອທຽບໃສ່ 5 ປີ ຜ່ານມາ ອັດຕາສ່ວນຄວາມທຸກຍາກຢູ່ໃນລາວ ຫຼຸດລົງຈາກ 23,2% ໃນປີ 2012-2013 ເປັນ 18,3% ໃນປີ 2018-2019.
ພາຍຫຼັງການປະກາດຜົນຂອງການສຳຫຼວດ ທ່ານຮອງລັດຖະມົນຕີກະຊວງ ຜທ ຍັງໄດ້ສະແດງຄວມຂອບໃຈຕໍ່ການຈັດຕັ້ງທຸກຂັ້ນ ນັບແຕ່ສູນກາງຮອດທ້ອງຖິ່ນທີ່ໄດ້ປະກອບສ່ວນຢ່າງຕັ້ງໜ້າໃນການສຳຫຼວດການໃຊ້ຈ່າຍ ແລະ ການຊົມໃຊ້ຈ່າຍຂອງຄົວເຮືອນຄັ້ງທີນີ້ ມີຜົນສຳເລັດຢ່າງຈົບງາມ.