ທ່ານ ນາງ ມະນີຈັນ ຜັນຫວາດວົງສຸກ ເຈົ້າຂອງບ້ານສວນມະນີຈັນ ໃຫ້ສຳພາດວັນທີ 28 ກໍລະກົດ 2020 ວ່າ: ເພື່ອຕອບສະໜອງຕາມຄວາມຕ້ອງການຂອງລູກຄ້າ ທີ່ມາທ່ຽວຊົມສະຖານທີ່ທ່ອງທ່ຽວບ້ານສວນມະນີຈັນ ທີ່ຕັ້ງຢູ່ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ ມາຮຽນຮູ້ເຮັດອາຫາຍພື້ນບ້ານ ມາຮັບປະທານອາຫານຕອນທ່ຽງ ແລະ ຕອນແລງ ຊົມກິດຈະກຳສິລະປະຊົນເຜົ່າ ນຸ່ງເຄື່ອງຊຸດຊົນເຜົ່າໄຕແດງ ແລະ ຖ່າຍຮູບ ເຊິ່ງເປີດບໍລິການມາແຕ່ວັນທີ 13 ມິຖຸນາ 2020 ອາທິດໜຶ່ງສອງຄັ້ງຄື ວັນເສົາ ແລະ ວັນອາທິດ ເວລາ 9-19:00 ໂມງ ເພື່ອສົ່ງເສີມລາວທ່ຽວລາວ ໃຊ້ວິກິດພະຍາດໂຄວິດ-19 ເປັນໂອກາດ ມາຮອດວັນທີ 28 ກໍລະກົດ 2020 ບ້ານສວນມະນີຈັນໄດ້ຍົກລະດັບເພີ່ມຈຳນວນມື້ເປີດບໍລິການຈາກ 2 ວັນເປັນ 6 ວັນຕໍ່ອາທີດ ແຕ່ວັນອັງຄານຫາວັນອາທິດ ພັກວັນດຽວຄືວັນຈັນເທົ່ານັ້ນ.
ດັ່ງນັ້ນ ຜູ້ທີ່ຕ້ອງການໄປທ່ຽວຊົມ ໄປຮັບປະທານອາຫານທ່ຽງ ອາຫານແລງ ຈັດກອງປະຊຸມຂະໜາດນ້ອຍ ແລະ ຮ່ວມກິດຈະກຳຕ່າງໆ ກໍສາມາດໄປໄດ້ຕາມວັນເວລາດັ່ງກ່າວ ທາງເຂົ້າສະຖານທີ່ບ້ານສວນມະນີຈັນເບື້ອງເສັ້ນທາງນາທົ່ມ-ໂນນແສງຈັນ-ໄຟອຳນາດໂນນສະອາດ-ລາດຄວາຍ ເມືອງໄຊທານີ.