ນອກຈາກການຫຼຸດຄວາມຕຶງຄຽດ ອັນເປັນບໍ່ເກີດຂອງໂລກທີ່ສຳຄັນຕໍ່ລະບົບພູມຕ້ານທານ ໃນຮ່າງກາຍບົກຜ່ອງ ເຮົາຄວນຕ້ອງນອນຫຼັບພັກຜ່ອນໃຫ້ພຽງພໍ ເພື່ອໃຫ້ຮ່າງກາຍສ້າງ “ແອນຕີ້ບໍດີ” ເຊລລະບົບພູມຕ້ານທານ ດື່ມນ້ຳວັນລະ 8 ຈອກ ເພື່ອຊ່ວຍເພີ່ມການຄັດຫຼັ່ງ ແລະ ຄວາມຊຸ່ມຊື່ນຂອງເຍື້ອບຸຜິວທາງເດີນຫາຍໃຈ ທີ່ຈະຊ່ວຍປ້ອງກັນ ແລະ ດັກຈັບຝຸ່ນລະອອງຂອງເຊື້ອໂລກ ລວມໄປເຖິງມົນລະພິດ.
ໃນວັນທີ່ສະພາບອາກາດເຕັມໄປດ້ວຍມົນພາວະທີ່ບໍ່ດີຕໍ່ຮ່າງກາຍ “ອາຫານ” ກໍເປັນສິ່ງສຳຄັນດັ່ງຄຳທີ່ວ່າ “ກິນອັນໃດໄດ້ຢ່າງນັ້ນ” ນັ້ນເອງ ເຮົາຈຶ່ງມີຄຳແນະນຳອາຫານທີ່ຈະເປັນອີກໜຶ່ງສິ່ງເສີມ ສ້າງຄວາມແຂງແຮງ ແລະ ສຸຂະພາບດີ ເພື່ອໃຫ້ຫ່າງໄກຄວາມເຈັບປ່ວຍ.
ໝາກໄມ້ຕະກູນສີສົ້ມເຫຼືອງ
ບໍ່ວ່າຈະໝາກກ້ຽງ ໝາກນາວ ໝາກຂີ້ຫູດ ນອກຈາກນີ້ ຍັງມີການຊຽມ ວິຕາມິນ A ວິຕາມິນ B ໂປຕັສຊຽມ ການຊຽມ ໄຍອາຫານ ຟົສຟໍຣັສ ແລະ ເຫຼັກ ຍັງມີວິຕາມິນ C ສູງ ຊຶ່ງວິຕາມິນ C ນັ້ນ ເປັນເຄື່ອງຊ່ວຍຊັ້ນດີສຳລັບສ້າງລະບົບພູມຕ້ານທານ ແລະ ຊ່ວຍສ້າງເມັດເລືອດຂາວ ອັນເປັນກຸນແຈສຳຄັນໃນການຕໍ່ສູ້ກັບເຊື້ອໂຣກນັ້ນເອງ.
ເຄື່ອງເທດ
ເພາະອຸດົມໄປດ້ວຍຄຸນຄ່າທາງໂພຊະນາການ ແລະ ຍັງເປັນຢາໃນຕົວ ເຊັ່ນ: ຂີງ ກະທຽມ ແລະ ໝາກເຜັດແດງ ທີ່ເຕັມໄປດ້ວຍແຮ່ທາດ ແລະ ວິຕາມິນ ໂດຍ ຂີງ ນອກຈາກຊ່ວຍຫຼຸດການອັກເສບ ຍັງສາມາດຊ່ວຍຫຼຸດອາການເຈັບຄໍອາການປຸ້ນທ້ອງ ຊ່ວຍຫຼຸດອາການປວດຊ້ຳເຮື້ອ ທີ່ສຳຄັນຊ່ວຍສ້າງຕ້ານທານກັນໃຫ້ແຂງແຮງອີກ ສ່ວນກະທຽມເຄື່ອງເທດທີ່ມີລິດໃນການເສີມພູມຕ້ານທານ ໂດຍມີສານອັນລິຊິນທີ່ຊ່ວຍເພີ່ມປະສິດທິພາບການ ເຮັດວຽກຂອງເຊລໃນລະບົບພູມຕ້ານທານ ມີລິດໃນການຕ້ານເຊື້ອແບກທີເຣຍ ໄວຣັສ ທີ່ສຳຄັນເປັນສານຕ້ານອະນຸມູນອິດສະຫຼະຊັ້ນດີ ທີ່ຫາງ່າຍໃນຄົວເຮືອນ ທ້າຍທີ່ສຸດ “ໝາກເຜັດແດງ” ທີ່ເຕັມປ່ຽມໄປດ້ວຍສານເບຕາແຄໂຣທີນ ທີ່ຈະເສີມລະບົບພູມຕ້ານທານ ວິຕາມິນ C ໃນໝາກເຜັດຍັງມີຫຼາຍ ເອີ້ນໄດ້ວ່າທີ່ສຸດ ຄິດສອງເທົ່າຂອງໝາກໄມ້ຍອດນິຍົມຢ່າງໝາກກ້ຽງ.
ຜັກໃບຂຽວ
ນອກຈາກສານຄລໍໂຣຟິວ ທີ່ຊ່ວຍໃນການຂັບສານພິດ ຄຸນຄ່າ ແລະ ວິຕາມິນໃນຜັກໃບຂຽວ ຍັງລົ້ນເຫຼືອຫຼາຍອະນັນ ທີ່ເປັນສ່ວນປະກອບສຳຄັນ ໃນການເສີມສ້າງສ້ອມແຊມຮ່າງກາຍໃຫ້ແຂງແຮງຢູ່ສະເໝີ ຜັກໃບຂຽວທີ່ແນະນຳໄດ້ແກ່ “ຜັກຫົມ” ທີ່ຊ່ວຍໃນການເສີມສ້າງລະບົບພູມຕ້ານທານ ເພາະມີວິຕາມິນ A ເປັນຈຳນວນຫຼາຍ ສົ່ງຜົນໃຫ້ຮ່າງກາຍສາມາດທີ່ຈະຮັກສາລະດັບທີ່ເໝາະສົມຂອງເຊລເມັດເລືອດຂາວ ທີ່ປົກປ້ອງຮ່າງກາຍຈາກການຕິດເຊື້ອ ແລະ ໂລກຕ່າງໆ ເຊັ່ນດຽວກັບກະລ່ຳດອກຂຽວ “ບຣັອກໂຄລີ” ທີ່ອຸດົມໄປດ້ວຍວິຕາມິນ A ແຖມດ້ວຍ C ແລະ E ມີສານຕ້ານອະນຸມູນອິດສະຫຼະ ແລະ ເສັ້ນໄຍທີ່ຈະເປັນປະໂຫຍດຕໍ່ຮ່າງກາຍ ແລະ ສຸຂະພາບອັນເປັນກຸນແຈສຳຄັນ ເສີມສ້າງພູມຕ້ານທານໃຫ້ຮ່າງກາຍເຕັມປ່ຽມໄປ ດ້ວຍພະລັງງານ ແລະ ຄວາມແຂງແຮງ.
ນົມສົ້ມ
ແຫຼ່ງໂປຣຕີນຊັ້ນເລີດ ເພາະໃນນົມສົ້ມນັ້ນ ຈະມີໂປຣຕີນຫຼາຍກວ່າໃນນົມເຖິງ 20% ນອກຈາກນີ້ ຍັງຂຶ້ນຊື່ໃນເລື່ອງແລກໂຕບາຊິວລັສແບກທີເຣຍຊັ້ນດີທີ່ຈະເສີມ ແລະ ສ້າງພູມຕ້ານທານບໍ່ໃຫ້ຮ່າງກາຍອ່ອນແອ.
ສັດນ້ຳມີເປືອກ
ເພາະເຕັມໄປດ້ວຍໂອເມກາ 3 ກົດໄຂມັນຈຳເປັນຕໍ່ຮ່າງກາຍ ທີ່ຊ່ວຍເສີມສ້າງລະບົບການເຮັດວຽກຕ່າງໆຂອງຮ່າງກາຍ ທີ່ຈຳເປັນຢ່າງທີ່ເຮົາຮູ້ກັນດີ ນອກຈາກນີ້ ສານອາຫານໃນສັດນ້ຳມີເປືອກ ເຊັ່ນ ກຸ້ງ ແລະ ປູ ຍັງມີ “ສານຊີລີນຽມ” (Selenium) ທີ່ຊ່ວຍເສີມສ້າງເຊລເມັດເລືອດຂາວໃຫ້ຜະລິດໂປຣຕີນ “ໄຊໂຕຄານ” (Cytokines) ສານທີ່ຈະຊ່ວຍກຳຈັດໄວຣັສຕ່າງໆອອກຈາກຮ່າງກາຍນັ້ນເອງ.
ວ. ດາລາວົງ – ນຳສະເໜີ