ການສອບເສັງຈົບຊັ້ນ ມ4 ທົ່ວເມືອງຈັນທະບູລີ ນະຄອນຫຼວງວຽງຈັນ (ນວ) ສົກຮຽນ 2019-2020 ຈັດຂຶ້ນວັນທີ 22-24 ກໍລະກົດ 2020 ຢູ່ສູນສອບເສັງໂຮງຮຽນມັດທະຍົມສຶກສາສົມບູນວຽງຈັນ ໂດຍມີທ່ານ ແກ້ວປະເສີດ ໄຊປັນຍາ ຮອງເຈົ້າເມືອງຈັນທະບູລີ ທ່ານ ພູທອນ ແສງດາວົງ ຮອງຫົວໜ້າພະແນກສຶກສາທິການ ແລະ ກີລາ ນວ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ຈັນທະຄານ ລັດຕະນາ ຮອງຫົວໜ້າຫ້ອງການສຶກສາທິການ ແລະ ກີລາເມືອງຈັນທະບູລີ ກ່າວວ່າ: ເພື່ອຕິດຕາມ ກວດກາ ແລະ ປະເມີນຜົນການບໍລິຫານຄຸ້ມຄອງໂຮງຮຽນສາມັນສຶກສາທົ່ວເມືອງຈັນທະບູລີ ໂດຍສະເພາະການຮຽນ-ການສອນ ການປະຕິບັດໂຄງການຫຼັກສູດ ກໍຄື 3 ຂໍ້ແຂ່ງຂັນທີ່ກະຊວງສຶກສາທິການ ແລະ ກີລາວາງອອກໃຫ້ປາກົດຜົນເປັນຈິງ ທັງເປັນການປະຕິບັດຕາມແຜນພັດທະນາການສຶກສາຂອງຫ້ອງການສຶກສາທິການ ແລະ ກີລາເມືອງຈັນທະບູລີ ເຊິ່ງສົກຮຽນນີ້ ເມືອງຈັນທະບູລີ ມີນັກຮຽນຊັ້ນ ມ4 ຈຳນວນ 1.380 ຄົນ ຍິງ 730 ຄົນ ຈາກ 16 ໂຮງຮຽນ ມີ 1 ສູນສອບເສັງ ລວມມີ 69 ຫ້ອງ ສອບເສັງ 6 ວິຊາ ຄື: ພາສາລາວ-ວັນນະຄະດີ ສຶກສາພົນລະເມືອງ ວິທະຍາສາດທຳມະສາດ ວິທະຍາສາດ-ສັງຄົມ ຄະນິດສາດ ແລະ ພາສາອັງກິດ.
ທ່ານ ແກ້ວປະເສີດ ໄຊປັນຍາ ໄດ້ເນັ້ນໃຫ້ຄະນະກຳມະການທຸກທ່ານ ເອົາໃຈໃສ່ປະຕິບັດໜ້າທີ່ຂອງຕົນດ້ວຍຄວາມ ຮັບຜິດຊອບສູງ ທີ່ສຳຄັນ ໃຫ້ປະຕິບັດຕາມລະບຽບຫຼັກການຂອງການສອບເສັງຢ່າງເຄັ່ງຄັດ ໂປ່ງໃສ ເປັນກາງ ຍຸດຕິທຳ ພ້ອມທັງເອົາໃຈໃສ່ປະຕິບັດມາດຕະການປ້ອງກັນພະຍາດໂຄວິດ-19 ເພື່ອຮັບປະກັນໃຫ້ການສອບເສັງມີຄຸນນະພາບ ແລະ ປະສົບຜົນສຳເລັດຕາມຄາດໝາຍ.