ທ່ານ ວຽງຄຳ ຫຼວງລາດ ຊາວນາບ້ານທົ່ງມັ່ງ ເມືອງໄຊທານີ ນະຄອນຫຼວງວຽງຈັນ ໃຫ້ສຳພາດເມື່ອບໍ່ດົນມານີ້ວ່າ: ຄອບຄົວຕົນໄດ້ຢຶດຖືອາຊີບກະສິກຳເປັນຕົ້ນຕໍ ໂດຍມີເນື້ອທີ່ 6 ເຮັກຕາ ໂດຍໄດ້ນຳໃຊ້ດິນສ່ວນໜຶ່ງປູກເຂົ້າ ແລະ ລ້ຽງສັດ ສາມາດສ້າງລາຍຮັບ 25 ລ້ານກີບຕໍ່ປີ ແຕ່ທຽບໃສ່ລາຍຈ່າຍແມ່ນບໍ່ພຽງພໍ ຍ້ອນມີແນວທາງປ່ຽນແປງໃໝ່ດ້ານເສດຖະກິດ ຕາມທິດກຸ້ມຕົນເອງ ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ບວກໃສ່ການປຸກລະດົມຊຸກຍູ້ຂອງພາກລັດ ໂດຍສະເພາະຫ້ອງການກະສິກຳ ແລະ ປ່າໄມ້ເມືອງ ກໍຄືຄະນະພັກແຕ່ລະຂັ້ນ ຄະນະບໍລິຫານງານຊາວໜຸ່ມເມືອງ ໃນການຫັນເອົາເນື້ອໃນຂໍ້ແຂ່ງຂັນ 4 ບຸກຂອງຊາວໜຸ່ມ ໂດຍສະເພາະບຸກດ້ານວິຊາຊີບ ສ້າງວຽກເຮັດງານທຳ ແລະ ຍ້ອນມີຄວາມຕື່ນຕົວສະໝັກໃຈຢາກສ້າງຄອບຄົວໃຫ້ເປັນແບບຢ່າງທີ່ດີແກ່ຄອບຄົວອື່ນ.
ປີ 2014 ມີໂຄງການກະສິກຳອິນຊີ ລົງມາຊຸກຍູ້-ສົ່ງເສີມການປູກພືດ-ຜັກອິນຊີເປັນສິນຄ້າ ຕົນກໍໄດ້ປຶກສາກັບຄອບຄົວແລ້ວຕັດສິນໃຈເຂົ້າຮ່ວມກຸ່ມ ເນື່ອງຈາກຕົນມັກ-ຮັກໃນອາຊີບກະສິກຳຢູ່ແລ້ວ ແລະ ໄດ້ຮິບໂຮມທຶນຮອນຈຳນວນໜຶ່ງ ບວກກັບການຊ່ວຍເຫຼືອຂອງຫ້ອງການກະສິກຳ ແລະ ປ່າໄມ້ເມືອງ ເພື່ອສ້າງເຮືອນຮົ່ມຂຶ້ນ 2 ຫຼັງ ຢູ່ພື້ນທີ່ດິນເຊົ່າຂອງຄົນອື່ນ ປີທຳອິດພືດ-ຜັກບໍ່ທັນໄດ້ຮັບຜົນດີເທົ່າທີ່ຄວນ ແຕ່ຕົນກໍບໍ່ທໍ້ຖອຍ ພ້ອມທັງໄດ້ຮັບການເອົາໃຈໃສ່ຈາກຂະແໜງການກ່ຽວຂ້ອງ ຊຸກຍູ້ຊ່ວຍເຫຼືອເຂົ້າຮ່ວມເຝິກອົບຮົມ ມາຮອດປີ 2017 ຜົນຜະລິດພືດ-ຜັກຄ່ອຍໆດີຂຶ້ນ ສາມາດຕອບສະໜອງໃຫ້ຜູ້ບໍລິໂພກດີ ເຮັດໃຫ້ມີລາຍຮັບເພີ່ມຂຶ້ນ ສະເລ່ຍ 4-5 ລ້ານກີບຕໍ່ເດືອນ.
ຮອດປີ 2018 ໄດ້ຂະຫຍາຍເນື້ອທີ່ປູກ ແລະ ເຮັດເຮືອນຮົ່ມຕື່ມອີກ 4 ຫຼັງ ແລະ ປີ 2019 ໄດ້ຂະຫຍາຍເພີ່ມອີກ 3 ຫຼັງ ລວມເປັນ 9 ຫຼັງ ພ້ອມທັງຂະຫຍາຍເນື້ອທີ່ປູກໄມ້ໃຫ້ໝາກ 5 ເຮັກຕາ ປັດຈຸບັນສາມາດຂາຍຜົນຜະລິດບວກໃສ່ກັບການຂາຍລ້ຽງສັດ ຂາຍເຂົ້າ ສາມາດສ້າງລາຍຮັບໃຫ້ຄອບຄົວ 70 ລ້ານກີບຕໍ່ປີ ສະເລ່ຍແລ້ວ ລາຍຮັບຈາກການຂາຍຜັກກະສິກຳອິນຊີກວມເອົາ 85% ຂອງລາຍຮັບທັງໝົດ ຈິ່ງເຮັດໃຫ້ຄອບຄົວສາມາດກຸ້ມຢູ່ກຸ້ມກິນ ສ່ວນແຜນໃນອະນາຄົດ ຈະຂະຫຍາຍເຮືອນຮົ່ມໃຫ້ໄດ້ 15 ຫຼັງ ຂະຫຍາຍເນື້ອທີ່ປູກໄມ້ໃຫ້ໝາກໃຫ້ໄດ້ 2 ເຮັກຕາ ຕື່ມອີກ.