ທີ່ຍີ່ປຸ່ນ: ໃນທ້າຍເດືອນມີນາ 2017 ລັດຖະບານຍີ່ປຸ່ນ ໄດ້ມີມະຕິເຫັນດີໃຫ້ປັບປຸງກົດໝາຍວ່າດ້ວຍອາຊະຍາກຳ ແນໃສ່ຕ້ານອົງການກໍ່ການຮ້າຍ ແລະ ບັນດາກຸ່ມອາຊະຍາກຳອື່ນໆ ທີ່ໃຊ້ຄວາມຮຸນແຮງ ເຊິ່ງເປັນການລະເມີດກົດໝາຍຂອງຍີ່ປຸ່ນ ກົດໝາຍໄດ້ກຳນົດຄວາມຜິດຕໍ່ບັນດາການກະທຳດັ່ງຕໍ່ໄປນີ້ຄື: ການລະດົມທຶນ ການຈັດຊື້ວັດຖຸສິ່ງຂອງ ການເຄື່ອນໄຫວເພື່ອກະກຽມໃຫ້ແກ່ການກໍ່ການຮ້າຍ ການຄາຕະກຳ ການໃຊ້ກຳລັງເຂົ້າຢຶດພາຫະນະ ກໍຄື ອາຊະຍາກຳທີ່ພົວພັນກັບຢາເສບຕິດ ເຊິ່ງຈະຕ້ອງໄດ້ຮັບໂທດຈຳຄຸກ 5 ປີ ເຖິງໂທດປະຫານຊີວິດ ຮ່າງກົດໝາຍທີ່ກຳນົດເນື້ອໃນເຄັ່ງຄັດເຊັ່ນນີ້ ເຄີຍໄດ້ສະເໜີມາແລ້ວ 3 ຄັ້ງ ແຕ່ບໍ່ຜ່ານ ຍ້ອນມີສຽງວິຈານວ່າ ການກຳນົດຄວາມຜິດທີ່ກວ້າງຂວາງເກີນໄປ ອາດຈະຖືກນຳໃຊ້ເພື່ອປິດປາກພວກເຄື່ອນໄຫວຕໍ່ຕ້ານລັດຖະບານ ຫຼື ກຸ່ມພົນລະເມືອງທີ່ຕໍ່ຕ້ານຖານທັບຂອງ ສ ອາເມຮິກາ ທີ່ເກາະໂອກິນາວາ ສ່ວນສະພາທະນາຍຄວາມຍີ່ປຸ່ນເອງ ກໍມີຄຳເຫັນຄັດຄ້ານກົດໝາຍສະບັບນີ້ເຊັ່ນກັນ ໂດຍອ້າງວ່າ ມັນຈະແຕະຕ້ອງສິດເສລີພາບຂອງປະຊາຊົນ ແລະ ວ່າກົດໝາຍອາຍາທີ່ໃຊ້ຢູ່ໃນປັດຈຸບັນ ກໍໄດ້ກຳນົດມາດຕະການຢັບຢັ້ງການກະກຽມການກໍ່ອາຊະຍາກຳຮ້າຍແຮງຢູ່ແລ້ວ ເຊັ່ນ: ການຄາຕະກຳ ການວາງເພີງ ຫຼື ການກໍ່ວິນາດສະກຳ ແລະ ອື່ນໆ ດັ່ງນັ້ນ ຈຶ່ງບໍ່ເຫັນມີຄວາມຈຳເປັນຕ້ອງອອກກົດໝາຍສະເພາະຕື່ມອີກ ສ່ວນທາງເບື້ອງລັດຖະບານນັ້ນ ໄດ້ຢັ້ງຢືນຄວາມຈຳເປັນຕ້ອງມີກົດໝາຍນີ້ສະເພາະ ເພື່ອເພີ່ມມາດຕະການປ້ອງກັນການກໍ່ການຮ້າຍ ກ່ອນທີ່ນະຄອນຫຼວງໂຕກຽວ ຈະເປັນເຈົ້າພາບມະຫະກຳກີລາໂອລິປິກ 2020.
ທີ່ມຽນມາ: ໃນເດືອນກຸມພາ 2019 ທາງການມຽນມາ ໄດ້ຈັບກຸມນັກທ່ອງທ່ຽວຄົນຝຣັ່ງທີ່ໄດ້ປ່ອຍເຄື່ອງບິນແບບບໍ່ມີຄົນຂັບ (ໂດຼນ) ເວີ່ນຢູ່ເທິງບໍລິເວນອາຄານສະພາແຫ່ງຊາດ ມຽນມາ ທີ່ນະຄອນຫຼວງເນປີດໍ ອີງຕາມກົດໝາຍກ່ຽວຂ້ອງຂອງມຽນມາແລ້ວ ຄວາມຜິດໃນສະຖານນີ້ ຕ້ອງໄດ້ຮັບໂທດຈຳຄຸກເປັນເວລາສູງສຸດ 3 ປີ ໃນປີ 2017 ນັກຂ່າວ 3 ຄົນ ກໍໄດ້ຖືກຕັດສິນຈຳຄຸກໃນຄວາມຜິດແບບດຽວກັນນີ້ມາແລ້ວ.
ທີ່ມາເລເຊຍ: ຂ່າວໜັງສືພິມວຽງຈັນທາມ ສະບັບວັນທີ 17 ພະຈິກ 2017 ໄດ້ໃຫ້ຮູ້ວ່າ ທາງການມາເລເຊຍ ເລີກຮື້ກຸ່ມຫົວຮຸນແຮງທີ່ເປັນເຄືອຄ່າຍຂອງກຸ່ມກໍ່ການຮ້າຍອາບູໄຊຢັບ (Abu Sayyaf) ທີ່ເລັດລອດເຂົ້າໄປເຄື່ອນໄຫວຢູ່ດິນແດນຂອງມາເລເຊຍ (ທີ່ ປູຕຼາຈາຢາ ແລະ ເກາະຊາບາ) ໂດຍໄດ້ຈັບຜູ້ຕ້ອງສົງໄສໄດ້ທັງໝົດ 8 ຄົນ ໃນນັ້ນ ເປັນຄົນຟີລິບປິນ 7 ຄົນ ແລະ ຄົນມາເລເຊຍ 1 ຄົນ ເປົ້າໝາຍການເຄື່ອນໄຫວຂອງກຸ່ມຫົວຮຸນແຮງດັ່ງກ່າວ ແມ່ນເພື່ອເກັບເກນເອົາເດັກນ້ອຍໄປເປັນປ້ອມກຳບັງຂອງພວກເຂົາ ເວລາຕໍ່ສູ້ກັບທາງການຂອງຟີລິບປິນ ກຸ່ມກໍ່ການຮ້າຍອາບູຊາຢັບ ມີຖານທີ່ໝັ້ນຢູ່ເກາະມິນດານາວ ທາງພາກໃຕ້ຂອງຟີລິບປິນ ກຸ່ມດັ່ງກ່າວ ເຄື່ອນໄຫວເພື່ອແບ່ງແຍກດິນແດນ ດ້ວຍວິທີການຈັບຕົວປະກັນເອົາໄປຂ້າໂຫດ ເພື່ອຮຽກຄ່າໄຖ່ ແລະ ອື່ນໆ.