ກອງປະຊຸມສື່ມວນຊົນ ອາຊີ-ປາຊີຟິກ 2026 ຫຼື Asia-Pacific Media Forum 2026 ບໍ່ໄດ້ເປັນພຽງເວທີແລກປ່ຽນຂ່າວສານ ແລະ ປະສົບການຂອງນັກຂ່າວຈາກຫຼາຍປະເທດ ແຕ່ຍັງເປັນໂອກາດໃຫ້ນັກຂ່າວຈາກປະເທດກຳລັງພັດ ທະນາໄດ້ເຫັນກັບຕາວ່າ ເຕັກໂນໂລຊີຂອງຈີນກຳລັງປ່ຽນແປງໄປໄວພຽງໃດ. ພ້ອມກັນນັ້ນ ກໍເປັນການຕັ້ງຄຳຖາມສຳຄັນວ່າ: ໃນຍຸກ AI ແລະ ສື່ດິຈິຕອນ ນັກຂ່າວຈະນຳໃຊ້ເຕັກໂນໂລຊີໃຫ້ເກີດປະໂຫຍດ ໂດຍບໍ່ສູນເສຍບົດບາດຂອງຄົນໄດ້ແນວໃດ?
ສຳລັບນັກຂ່າວຈາກປະເທດກຳລັງພັດທະນາ, ການປ່ຽນແປງດ້ານເຕັກໂນໂລຊີ ບາງຄັ້ງອາດເບິ່ງຄືເປັນເລື່ອງຢູ່ໄກຕົວ. ພວກເຮົາອາດເຫັນມັນຜ່ານໜ້າຈໍ ຫຼື ອ່ານຈາກຂ່າວ, ແຕ່ການໄດ້ເຫັນກັບຕາ ແລະ ສຳຜັດກັບຄວາມເປັນຈິງໂດຍກົງ ເປັນອີກເລື່ອງໜຶ່ງ. ນີ້ແມ່ນເຫດຜົນໜຶ່ງທີ່ ທ່ານ Soy Sopheap ປະທານສຳນັກຂ່າວ DAP ກຳປູເຈຍ ເຫັນວ່າ ເວທີສື່ມວນຊົນອາຊີ-ປາຊີຟິກ 2026 ມີຄວາມສຳຄັນຫຼາຍກວ່າການເປັນພຽງການພົບປະຂອງນັກຂ່າວ, ເນື່ອງຈາກການນຳນັກຂ່າວຈາກຫຼາຍປະເທດໃນອາຊີ ແລະ ປະ ເທດໃນພາກພື້ນ Global South ມາ ສປ ຈີນ ເປັນການເປີດໂອກາດໃຫ້ພວກເຂົາໄດ້ເຫັນການພັດທະນາດ້ວຍຕາຕົນເອງ ແລະ ນຳເລື່ອງລາວເຫຼົ່ານັ້ນໄປບອກເລົ່າໃຫ້ຄົນທົ່ວໂລກຮັບຮູ້.
ປະທານສຳນັກຂ່າວ DAP ກ່າວວ່າ: ເວທີດັ່ງກ່າວຊ່ວຍໃຫ້ນັກຂ່າວຈາກຫຼາຍປະເທດໄດ້ເຫັນຄວາມກ້າວໜ້າຂອງ ສປ ຈີນ ໃນຄວາມທັນສະໄໝທາງດ້ານເຕັກໂນໂລຊີ, ເຊິ່ງ ສປ ຈີນ ກຳລັງເປັນຜູ້ນຳໜ້າດ້ານເຕັກໂນໂລຊີໃນອາຊີ ໂດຍສະເພາະດ້ານບໍລິການ, ອຸປະ ກອນ ແລະ ລະບົບດິຈິຕອນຕ່າງໆ. ແຕ່ການມີເຕັກໂນໂລຊີທີ່ທັນສະໄໝຢ່າງດຽວອາດຍັງບໍ່ພຽງພໍ ຖ້າບໍ່ມີຄົນຮັບຮູ້ ຫຼື ເຂົ້າໃຈມັນ. ພ້ອມນັ້ນທ່ານຍັງໄດ້ເນັ້ນວ່າ: “ທ່ານອາດມີເຕັກໂນໂລຊີ ແລະ ອຸປະກອນທີ່ທັນສະໄໝ, ແຕ່ຖ້າບໍ່ເອົາອອກມາໃຫ້ຄົນເຫັນ ກໍບໍ່ມີໃຜຮູ້,” ດັ່ງນັ້ນ ການເຊີນນັກຂ່າວຈາກຕ່າງປະເທດມາສຳຜັດໂດຍກົງ ຈຶ່ງກາຍເປັນຂົວເຊື່ອມຕໍ່ລະຫວ່າງ “ເຕັກໂນໂລຊີ” ກັບ “ການສື່ສານ”. ສຳລັບປະເທດກຳລັງພັດທະນາ ການແລກປ່ຽນລັກສະນະນີ້ ຍັງສາມາດນຳໄປສູ່ການຮຽນຮູ້, ການຝຶກອົບຮົມ ແລະ ການພັດທະນາຄົນຮຸ່ນໃໝ່.
ເມື່ອຖືກຖາມວ່າ ໃນ 2-3 ປີຂ້າງໜ້າ ສື່ມວນຊົນຈະປ່ຽນແປງແນວໃດ ໃນຂະນະທີ່ AI ແລະ ເຕັກໂນໂລຊີໃໝ່ກຳລັງເຕີບໂຕ, ທ່ານຕອບວ່າ: ສິ່ງສຳຄັນຄື ຕ້ອງຮຽນຮູ້ ແລະ ຕ້ອງພະຍາຍາມຕາມໃຫ້ທັນ. ສຳລັບປະເທດເຊັ່ນ ກຳປູເຈຍ ການຝຶກອົບຮົມນັກຂ່າວຮຸ່ນໃໝ່ຖືເປັນສິ່ງຈຳເປັນ. ເຊິ່ງທ່ານໄດ້ກ່າວວ່າ: “ພວກເຮົາຕ້ອງຮຽນຮູ້ເຕັກໂນໂລຊີ. ພວກເຮົາຢາກໃຫ້ຈີນຊ່ວຍຝຶກອົບ ຮົມນັກຂ່າວຮຸ່ນໃໝ່. ຖ້າເຮົາໄດ້ຮັບຄວາມຮູ້ ເຮົາກໍສາມາດກ້າວໄປໄດ້ໄວຂຶ້ນ,” ທ່ານຍອມຮັບວ່າ ຊ່ອງວ່າງດ້ານດິຈິຕອນຍັງເປັນບັນຫາສຳລັບຫຼາຍປະເທດ.ໃນຂະນະທີ່ນັກຂ່າວຮຸ່ນໃໝ່ສາມາດໃຊ້ຄອມພິວເຕີ ແລະ ເຄື່ອງມືດິຈິຕອນໄດ້ຢ່າງວ່ອງໄວ, ຄົນຮຸ່ນເກົ່າອາດຕ້ອງໃຊ້ເວລາປັບຕົວ. ທ່ານເອົາຕົນເອງມາເປັນຕົວຢ່າງພ້ອມຮອຍຍິ້ມວ່າ: “ແມ່ນແຕ່ຂ້ອຍເອງກໍຍັງພິມຄອມພິວເຕີບໍ່ຄ່ອຍເກັ່ງ. ບາງຄັ້ງພິມຜິດ. ແຕ່ຄົນຮຸ່ນໃໝ່ພິມໄວຫຼາຍ.” ຄຳເວົ້ານີ້ສະ ທ້ອນໃຫ້ເຫັນຊ່ອງວ່າງລະຫວ່າງຄົນ ຫຼື ສື່ສອງຮຸ່ນ ແລະ ການປ່ຽນແປງທີ່ກຳລັງເກີດຂຶ້ນໃນຫ້ອງຂ່າວ.
ການນຳ AI ມາໃຊ້ໃນວົງການສື່ຂອງກຳປູເຈຍ ໃນອະດີດຍັງມີຈຳກັດ. ແຕ່ສະຖານະການກຳລັງປ່ຽນໄປ. ທ່ານກ່າວວ່າ: ໂດຍສະເພາະໃນກຸ່ມຄົນຮຸ່ນໃໝ່ຢູ່ເຂດຕົວເມືອງ ການໃຊ້ AI ກຳລັງເພີ່ມຂຶ້ນຢ່າງໄວ. ຄົນຮຸ່ນໃໝ່ໃນເຂດຕົວເມືອງປະມານ 95% ມີຄວາມຮູ້ ຫຼື ສາມາດໃນການນຳໃຊ້ AI ໄດ້ໃນລະດັບໃດໜຶ່ງ, ແຕ່ເຂດຊົນນະບົດຍັງມີຂໍ້ຈຳກັດ. ສຳລັບຕົນເອງ, ທ່ານກ່າວວ່າ: “ຂ້ອຍຫາກໍເລີ່ມຮຽນ AI ປະມານ 6 ເດືອນ. ໂດຍໄດ້ລອງໃຊ້ເພື່ອແປພາສາ ແລະ ນຳເນື້ອໃນຈາກພາສາອື່ນມາຊ່ວຍເຮັດວຽກ. ມັນຊ່ວຍໄດ້ຫຼາຍ.” ສຳລັບນັກຂ່າວທີ່ບໍ່ແມ່ນເຈົ້າຂອງພາສາອັງກິດ, AI ຈຶ່ງສາມາດເປັນຕົວຊ່ວຍສຳຄັນໃນການແປພາສາ, ເຂົ້າໃຈຂໍ້ມູນ ແລະ ສື່ສານກັບຄົນຈາກຕ່າງປະເທດ.
ເຖິງວ່າຈະເຫັນປະໂຫຍດຂອງ AI ຫຼາຍຢ່າງ, ແຕ່ປະທານສຳນັກຂ່າວ DAP ເນັ້ນວ່າ: AI ຄວນເປັນ ເຄື່ອງມືຊ່ວຍນັກຂ່າວ ບໍ່ແມ່ນເຄື່ອງມືມາແທນນັກຂ່າວ. ເພາະ “AI ມາຈາກຄົນ, ມາຈາກສະໝອງຂອງຄົນ. ສະໝອງຂອງຄົນຍັງສະຫຼາດກວ່າ AI,” ເຖິງວ່າ AI ສາມາດຊ່ວຍແປພາສາ, ສະຫຼຸບຂໍ້ມູນ, ຊ່ວຍຄິດຫົວຂໍ້ ແລະ ຊ່ວຍຫຼຸດເວລາໃນວຽກບາງຢ່າງ. ແຕ່ສຳລັບວຽກຂ່າວ ການກວດສອບຂໍ້ມູນ, ການເຂົ້າໃຈບໍລິບົດ, ການຕັດສິນໃຈວ່າສິ່ງທີ່ຄວນເຜີຍແຜ່ ແລະ ບໍ່ຄວນເຜີຍແຜ່ ຍັງຕ້ອງເປັນໜ້າທີ່ຂອງຄົນ. “ທຸກຢ່າງມີສອງດ້ານ. ຢາກໍຄືກັນ ຖ້າໃຊ້ໃນປະລິມານທີ່ເໝາະສົມກໍຮັກສາໂລກໄດ້, ແຕ່ຖ້າໃຊ້ຫຼາຍເກີນໄປ ກໍອາດເກີດຜົນຮ້າຍ.” ດັ່ງນັ້ນ ການນຳ AI ມາໃຊ້ໃນວຽກຂ່າວຈຶ່ງຕ້ອງມີຄວາມຮູ້, ຄວາມຮອບຄອບ ແລະ ການກວດສອບຈາກມະນຸດຢູ່ສະເໝີ. “ຖ້າບໍ່ຮູ້ໃຊ້ AI, AI ອາດເປັນຝ່າຍໃຊ້ເຮົາ”
ໃນທ້າຍການສຳພາດ, ປະໂຫຍກໜຶ່ງຂອງທ່ານເປັນຄຳເວົ້າທີ່ຈື່ຈຳໄດ້ງ່າຍ: “ຖ້າເຈົ້າຮູ້ວິທີໃຊ້ AI, ເຈົ້າກໍໃຊ້ AI ໄດ້. ແຕ່ຖ້າເຈົ້າບໍ່ຮູ້ວິທີໃຊ້ AI, ມັນກໍໝາຍຄວາມວ່າ AI ອາດຈະເປັນຝ່າຍໃຊ້ເຈົ້າ.” ຄຳເວົ້ານີ້ອາດສະທ້ອນພາບຂອງວົງການສື່ໃນອະນາຄົດໄດ້ດີ. ເຕັກໂນໂລຊີຈະປ່ຽນວິທີທີ່ນັກຂ່າວເຮັດວຽກ. AI ຈະເຂົ້າມາຊ່ວຍຫຼາຍຂຶ້ນ. ສື່ດິຈິຕອນຈະກາຍເປັນສ່ວນສຳຄັນຫຼາຍຂຶ້ນ. ແລະ ການປ່ຽນແປງຈະເກີດຂຶ້ນໄວກວ່າເກົ່າ.
ແຕ່ບໍ່ວ່າເຕັກໂນໂລຊີຈະກ້າວໜ້າໄປໄກພຽງໃດ, ຫົວໃຈຂອງວຽກຂ່າວຍັງຄົງເປັນຄົນ. ນັກຂ່າວຍັງຕ້ອງຮູ້ຈັກຕັ້ງຄຳຖາມ, ຄົ້ນຫາຄວາມຈິງ, ກວດສອບຂໍ້ມູນ, ເຂົ້າໃຈບັນຫາ ແລະ ຄິດວິເຄາະກ່ອນຈະເຜີຍແຜ່. ໃນມຸມນີ້, ຄຸນຄ່າຂອງ Asia-Pacific Media Forum 2026 ອາດບໍ່ໄດ້ຢູ່ພຽງແຕ່ການພົບປະຂອງນັກຂ່າວຈາກຫຼາຍປະເທດ. ມັນຍັງເປັນເວທີໃຫ້ນັກຂ່າວໄດ້ເຫັນໂລກທີ່ກຳລັງປ່ຽນໄປ, ໄດ້ຮຽນຮູ້ຈາກກັນ ແລະ ກັນ, ແລະ ກຽມພ້ອມສຳລັບຍຸກໃໝ່ຂອງວົງການສື່.