ໂດຍ: ສ.ແສງງາມ
ໃນຍຸກທີ່ປັນຍາປະດິດ (AI) ກຳລັງເຂົ້າມາມີບົດບາດໃນທຸກຂະແໜງການ ລວທໄປເຖິງວົງການສື່ມວນຊົນ. ທ່ານ ແອນດຣູ ດຣາມ ມອນ ບັນນາທິການໃຫຍ່ ສະມາຄົມນັກຂ່າວອົດສະຕຣາລີ (Australian Associated Press, AAP) ໄດ້ໃຫ້ທັດສະນະທີ່ໜ້າສົນໃຈກ່ຽວກັບແນວທາງການນຳໃຊ້ AI ໃນອຸດສາຫະກຳຂ່າວ ພ້ອມທັງໂອກາດ ແລະ ສິ່ງທ້າທາຍທີ່ພາກພື້ນອາຊີ-ປາຊີຟິກ ໂດຍສະເພາະປະເທດກຳລັງພັດທະນາຕ້ອງໄດ້ຮັບມື.
ທ່ານ ແອນດຣູ ດຣາມມອນ ໄດ້ເນັ້ນໜັກວ່າ: ອຸດສາຫະກຳສື່ບໍ່ສາມາດເມີນເສີຍຕໍ່ເທັກໂນໂລຊີ AI ໄດ້ອີກຕໍ່ໄປ ແຕ່ສິ່ງສຳຄັນແມ່ນວິທີການນຳໃຊ້ໃຫ້ຖືກຕ້ອງ. “ຕ້ອງໃຫ້ມະນຸດຍັງຢູ່ໃນຂະບວນການ (human in the loop) ແລະ ຕ້ອງມີການກວດສອບຈາກບັນ ນາທິການຕະຫຼອດຂະບວນການ” ຕົວຢ່າງທີ່ຊັດເຈນຄື ວຽກງານປະຈຳວັນທີ່ນັກຂ່າວອາດບໍ່ມັກເຮັດ ເຊັ່ນ: ການສ້າງລາຍການວຽກ ຫຼື ວຽກທີ່ຕ້ອງເຮັດປະຈຳວັນ ເຊິ່ງບໍ່ໄດ້ນຳໃຊ້ທັກສະການເປັນນັກຂ່າວຢ່າງເຕັມທີ່. ນີ້ຄືຈຸດທີ່ AI ແລະ ລະບົບອັດຕະໂນມັດ ສາມາດເຂົ້າມາຊ່ວຍແບ່ງເບົາພາລະ ໃຫ້ນັກຂ່າວມີເວລາໄປສຸມໃສ່ວຽກທີ່ຕ້ອງໃຊ້ຄວາມສາມາດດ້ານການເປັນນັກຂ່າວແທ້ໆ.
ເມື່ອຖືກຖາມກ່ຽວກັບຄວາມທ້າທາຍໃນການພັດທະນາສື່ຢູ່ໃນປະເທດກຳລັງພັດທະນາ ທ່ານ ແອນດຣູ ດຣາມມອນ ຊີ້ໃຫ້ເຫັນວ່າ ບັນຫາຫຼັກແມ່ນ ຊັບພະຍາກອນ ທັງເງິນທຶນ ແລະ ເວລາ ເຊິ່ງເປັນສິ່ງທີ່ປະເທດກຳລັງພັດທະນາມັກຈະຂາດແຄນ.
ທ່ານ ແອນດຣູ ດຣາມມອນ ໄດ້ຍົກຕົວຢ່າງເລື່ອງລາວອັນມີຊື່ສຽງຂອງບໍລິສັດລົດແຫ່ງໜຶ່ງ ທີ່ໄດ້ແບ່ງປັນເທັກໂນໂລຊີເຂັມຂັດນິລະໄພແບບ 3 ຈຸດໃຫ້ທົ່ວອຸດສາຫະກຳລົດຍົນນຳໃຊ້ບໍ່ມີຄ່າໃຊ້ຈ່າຍ ເພື່ອຄວາມປອດໄພຂອງທຸກຄົນ ໂດຍຕັ້ງຄຳຖາມທີ່ໜ້າສົນໃຈວ່າ ວົງການ AI ໃນສື່ອາດຈະຕ້ອງເດີນທາງໄປໃນທິດທາງດຽວກັນ ນັ້ນຄື ອົງການສື່ໃຫຍ່ໆ ຊ່ວຍແບ່ງປັນເທັກໂນໂລຊີໃຫ້ອົງການສື່ທີ່ມີຊັບພະຍາກອນໜ້ອຍກວ່າ ເພື່ອຫຼຸດຄວາມແຕກຕ່າງດ້ານເຕັກໂນໂລຊີດິຈິຕອນ ໃນພາກພື້ນ.
ທ່ານ ແອນດຣູ ດຣາມມອນ ເປີດເຜີຍວ່າ: AAP ໄດ້ເລືອກໃຊ້ Google Gemini ເປັນເຄື່ອງມື AI ຫຼັກໃນອົງກອນ ໂດຍພະນັກງານທຸກຄົນສາມາດເຂົ້າເຖິງໄດ້ໃນລະຫວ່າງການເຮັດວຽກ ແຕ່ບໍ່ໄດ້ບັງຄັບໃຫ້ໃຊ້. ອົງກອນເນັ້ນການໃຫ້ຄຳແນະນຳວ່າ AI ຈະຊ່ວຍວຽກປະຈຳວັນແນວໃດ ພ້ອມທັງມີ ນະໂຍບາຍ AI ທີ່ໄດ້ຮັບການປັບປຸງຢ່າງຕໍ່ເນື່ອງ ເພື່ອຮັບປະກັນວ່າການນຳໃຊ້ AI ຈະສອດຄ່ອງກັບກົດບັດຄວາມເປັນອິດສະຫຼະດ້ານບັນນາທິການ (editorial charter of independence) ຂອງອົງກອນ.
ເມື່ອຖາມເຖິງຄວາມກັງວົນສ່ວນຕົວກ່ຽວກັບການນຳໃຊ້ AI ໃນສື່ ທ່ານ ແອນດຣູ ດຣາມມອນ ຕອບຢ່າງກົງໄປກົງມາວ່າ “ມັນເປັນເສັ້ນແບ່ງທີ່ບາງຫຼາຍ ລະຫວ່າງສິ່ງທີ່ຍອມຮັບໄດ້ ກັບສິ່ງທີ່ອາດສ່ຽງ ‘ເກີນໄປ’.” ສິ່ງທີ່ລາວໝາຍເຖິງ “ເກີນໄປ” ຄື ການທີ່ຂ່າວຖືກຜະ ລິດອອກມາໂດຍປາສະຈາກການແຊກແຊງ ຫຼື ກວດສອບຈາກມະນຸດເລີຍ ເຊິ່ງເປັນສິ່ງທີ່ອາດສ່ຽງຕໍ່ຄວາມໜ້າເຊື່ອຖືຂອງອົງການຂ່າວ.
ທັດສະນະຂອງ ແອນດຣູ ດຣາມມອນ ສະທ້ອນໃຫ້ເຫັນທ່າອ່ຽງລວມຂອງອຸດສາຫະກຳສື່ທົ່ວໂລກ ນັ້ນຄື AI ບໍ່ແມ່ນສັດຕູ ແຕ່ເປັນເຄື່ອງມືທີ່ຕ້ອງນຳໃຊ້ຢ່າງມີສະຕິ, ມີການກວດສອບ ແລະ ຮັກສາຄວາມເປັນມະນຸດໄວ້ໃນທຸກຂັ້ນຕອນຂອງການຜະລິດຂ່າວ ໂດຍສະເພາະໃນຂະນະທີ່ພາກພື້ນອາຊີ-ປາຊີຟິກ ຍັງຕ້ອງຫາທາງແກ້ໄຂບັນຫາຂາດແຄນຊັບພະ ຍາກອນ ເພື່ອບໍ່ໃຫ້ຕົກຂະບວນເທັກໂນ ໂລຊີນີ້.
