ທີ່ກຳປູເຈຍ: ບັນຫາໜັກໃຈໜຶ່ງໃນຂະແໜງອຸດສາຫະກຳທ່ອງທ່ຽວຂອງກຳປູເຈຍນັ້ນ ພົວພັນກັບການເຄື່ອນໄຫວຂອງບັນດາຜູ້ນຳທ່ຽວເຖື່ອນ ຫຼື ຜິດກົດໝາຍ ທີ່ຍາດຊີງອາຊີບຂອງຜູ້ນຳທ່ຽວ ທີ່ຈົດທະບຽນເຄື່ອນໄຫວຢ່າງຖືກຕ້ອງຕາມກົດໝາຍ ຂ່າວທີ່ອອກມາໃນຕົ້ນເດືອນກຸມພາ 2019 ໃຫ້ຮູ້ວ່າ ເຈົ້າໜ້າທີ່ແຂວງສຽມຣຽບຂອງກຳປູເຈຍ ໄດ້ເລີ່ມເອົາມາດຕະການເດັດຂາດ ເພື່ອແກ້ໄຂຜູ້ນຳທ່ຽວມືດ ເຊິ່ງໝາຍເຖິງຄົນຕ່າງປະເທດ ທີ່ລັກລອບປະກອບອາຊີບນຳທ່ຽວຢູ່ຕາມບໍລິເວນອັງກໍວັດ-ສະຖານທີ່ທ່ອງທ່ຽວທີ່ລືຊື່ຂອງກຳປູເຈຍ ແລະ ດັງໄປທົ່ວໂລກ ຜູ້ນຳທ່ຽວມືດທີ່ວ່ານັ້ນມີຈຳນວນຫຼວງຫຼາຍ ເຊິ່ງສ່ວນໃຫຍ່ແມ່ນຄົນຕ່າງປະເທດທີ່ຕັ້ງຫຼັກປັກແຫຼ່ງຢູ່ນະຄອນສຽມຣຽບ ເປັນເວລາດົນນານ ເພື່ອແກ້ໄຂບັນຫາດັ່ງກ່າວ ຫ້ອງການຕຳຫຼວດສາລະວັດທະຫານ ສະມາຄົມຜູ້ນຳທ່ຽວ ແລະ ຫ້ອງການທ່ອງທ່ຽວ ປະຈຳແຂວງສຽມຣຽບ ໄດ້ສ້າງກົນໄກປະສານງານ ເພື່ອແລກປ່ຽນຂໍ້ມູນຂ່າວສານນຳກັນ ຊ່ວຍກັນເປັນຫູເປັນຕາ ຮີບຮ້ອນແຈ້ງໃຫ້ກັນຮູ້ຢ່າງທັນການ ຖ້າພົບເຫັນຄົນຕ່າງປະເທດ ເຮັດອາຊີບນຳທ່ຽວຢ່າງຜິດກົດໝາຍ ກໍຄື ເມື່ອມີເຫດການສຸກເສີນອື່ນໆ ທີ່ແຕະຕ້ອງເຖິງຄວາມປອດໄພຂອງນັກທ່ອງທ່ຽວ ກໍຄື ຂະແໜງການທ່ອງທ່ຽວ ໜ້າທີ່ອັນຮີບດ່ວນຂອງຄະນະປະສານງານພາກສ່ວນດັ່ງກ່າວ ກໍຄື ຕ້ອງໄດ້ຮີບຮ້ອນສຳຫຼວດຈົດທະບຽນຄົນຕ່າງປະເທດ ທີ່ອາໄສຢູ່ແຂວງສຽມຣຽບເປັນເວລາດົນນານມາແລ້ວ ເພາະວ່າຄົນເຫຼົ່ານີ້ເອງ ທີ່ສວຍໂອກາດເປັນຜູ້ນຳທ່ຽວແບບຜິດກົດໝາຍ.
ທີ່ ສປ ຈີນ: ໃນຊຸມປີຫຼັງໆມານີ້ ທາງການຈີນ ໄດ້ອອກຂໍ້ກຳນົດກົດລະບຽບຫຼາຍຢ່າງ ເພື່ອຄຸ້ມຄອງການປະພຶດຂອງນັກທ່ອງທ່ຽວ ຜູ້ນຳທ່ຽວ ກໍຄື ບັນດາຜູ້ປະກອບການທຸລະກິດທ່ອງທ່ຽວ ສຳລັບນັກທ່ອງທ່ຽວທີ່ອອກໄປທ່ອງທ່ຽວຢູ່ຕ່າງປະເທດນັ້ນ ທາງການໄດ້ເນັ້ນໃຫ້ພວກເຂົາຍົກສູງສະຕິເຄົາລົບ ແລະ ປະຕິບັດຕາມລະບຽບກົດໝາຍ ເຄົາລົບຮີດຄອງປະເພນີ ແລະ ວັດທະນະທຳຂອງປະເທດທີ່ໄປທ່ຽວ ຫ້າມປະພຶດແບບແຕກປອກນອກທາງທີ່ຈະກາຍເປັນບັນຫາ ແລະ ກະທົບຕໍ່ກຽດສັກສີຂອງນັກທ່ອງທ່ຽວເອງ ແລະ ຂອງປະເທດຊາດ ໃນໄລຍະຜ່ານມາ ເຄີຍມີເຫດການບໍ່ສົມມາພາຄວນຈຳນວນໜຶ່ງ ທີ່ນັກທ່ອງທ່ຽວຈີນກໍ່ຂຶ້ນຢູ່ຕ່າງປະເທດ ເຊັ່ນ: ການຫຼິ້ນການພະນັນ ການມົ້ວສຸມກັບໂສເພນີ ການໃຊ້ອາລົມຢູ່ຕາມຮ້ານຄ້າ ຮ້ານອາຫານ ແລະ ເຄື່ອງບິນ ຕົວຢ່າງໜຶ່ງທີ່ອ່າວໜັກໜ່ວງ ກໍຄື ເລື່ອງນັກທ່ອງທ່ຽວຈີນ 2 ຄົນ ຖືກເຈົ້າໜ້າທີ່ຕຳຫຼວດເຢຍລະມັນຈັບກຸມ ປັບໃໝ ແລະ ເນລະເທດຢູ່ນະຄອນຫຼວງແບກແລງ (ວຽງຈັນທາມ 12 ສິງຫາ 2017) ຍ້ອນສະແດງທ່າຄຳນັບແບບນາຊີ ຮິດເລີ ອະດີດຈອມຜະເດັດການຂອງເຢຍລະມັນ ຕາມກົດໝາຍເຢຍລະມັນແລ້ວ ຜູ້ທີ່ສະແດງທ່າທາງ ຕິດເຄື່ອງໝາຍທີ່ເປັນສັນຍະລັກ ນຸ່ງເຄື່ອງແບບຂອງອົງການທີ່ຕ້ອງຫ້າມ ກໍຄື ການປະພຶດທຸກຢ່າງທີ່ພົວພັນກັບພວກຟາດຊິດຮິດເລີ ແລະ ນາຊີ ຈະຕ້ອງໄດ້ຮັບໂທດຕາມກົດໝາຍ ນັກທ່ອງທ່ຽວຈີນສອງຄົນນັ້ນ ໄດ້ອອກທ່າຄຳນັບແບບພວກຟາດຊິດ ຮິດເລີ ເວລາຖ່າຍຮູບຢູ່ຂ້າງໆສຳນັກງານລັດຖະສະພາເຢຍລະມັນ.