ມື້ນີ້, ພັກ, ລັດ ແລະ ປະຊາຊົນລາວບັນດາເຜົ່າ ພ້ອມກັນລະນຶກວັນຄ້າຍ ວັນເກີດຂອງປະທານສຸພານຸວົງ, ນັກຮັກຊາດຜູ້ຍິ່ງໃຫຍ່, ວິລະບຸລຸດແຫ່ງຊາດລາວ ທີ່ໄດ້ສ້າງຄຸນງາມຄວາມດີ ອັນໃຫຍ່ຫຼວງໃຫ້ແກ່ປະເທດຊາດ ແລະ ປະຊາຊົນລາວບັນດາເຜົ່າ ຄົບຮອບ 111 ປີ (13/7/1909-13/7/2020) ເພື່ອຈົດຈຳຄຸນງາມຄວາມດີ ອັນລ້ຳເລີດ ແລະ ຜົນງານອັນຍິ່ງໃຫຍ່ຂອງເພິ່ນ.
ຊີວິດ ແລະ ພາລະກິດຂອງປະທານ ສຸພານຸວົງ ແມ່ນຊີວິດ ແລະ ພາລະກິດແຫ່ງການຕໍ່ສູ້ ແລະ ການອຸທິດສະຕິປັນຍາ, ກຳລັງວັງຊາເພື່ອຊາດ ແລະ ປະຊາຊົນ. ນໍ້ໃຈຮັກຊາດ, ຮັກປະຊາຊົນຂອງເພິ່ນ ແມ່ນໃສແຈ້ງ, ເລິກເຊິ່ງ ແລະ ກວ້າງໃຫຍ່ ຈົນຍາກທີ່ຈະພັນລະນາໄດ້.
ປະທານສຸພານຸວົງ ໄດ້ກຳເນີດເກີດຂຶ້ນຢູ່ໃນຄອບຄົວເຊື້ອພະວົງຂອງລະບອບສັກດິນາລາວ ແລະ ເຕີບໃຫຍ່ຂຶ້ນຢູ່ໃນທ່າມກາງສະພາວະທີ່ປະເທດຊາດ ໄດ້ສູນເສຍຄວາມເປັນເອກະລາດ, ຕົກເປັນເມື້ອງຂຶ້ນເມືອງສ່ວຍຂອງຈັກກະພັດຕ່າງດ້າວ; ປະຊາຊົນລາວບັນດາເຜົ່າຕົກເປັນຂ້ອຍຂ້າ, ໄດ້ຮັບຄວາມທຸກທໍລະມານ ແລະ ເຈັບປວດຢ່າງແສນສາຫັດຈາກການກົດຂີ່ຂົ່ມເຫັງຂອງພວກລ່າເມືອງຂຶ້ນຊຶ່ງສິ່ງດັ່ງກ່າວໄດ້ສ້າງໃຫ້ປະທານສຸພານຸວົງ ມີຄວາມຕື່ນຕົວຮັກຊາດ ແລະ ຄຽດແຄ້ນສັດຕູຕັ້ງແຕ່ເຍົາໄວ.
ຄາວຍັງນ້ອຍ, ປະທານ ສຸພານຸວົງ ໄດ້ເລີ່ມຮຽນໜັງສືລາວ ໃນຊັ້ນປະຖົມຢູ່ຫຼວງພະບາງ, ຈາກນັ້ນຈຶ່ງໄປຮຽນຕໍ່ຊັ້ນມັດທະຍົມທີ່ຮ່າໂນ້ຍ ສສ. ຫວຽດນາມໃນປີ 1920 ແລະ ເດີນທາງໄປຮຽນຕໍ່ຂັ້ນມະຫາວິທະຍາໄລທີ່ນະຄອນຫຼວງປາຣີ, ປະເທດຝຼັ່ງໃນຂະແໜງວິສະວະກອນຂົວ-ທາງ ໃນປີ 1937.
ໃນສະໄໝທີ່ເປັນນັກສຶກສາຢູ່ປະເທດຝຼັ່ງ, ປະທານສຸພານຸວົງ ກໍໄດ້ເລີ່ມຕົ້ນເຄື່ອນໄຫວດ້ານການເມືອງ ໂດຍມີການພົວພັນທີ່ສະໜິດແໜ້ນກັບນັກສຶກສາຂອງບັນດາປະເທດເມືອງຂຶ້ນ ທີ່ພວມສຶກສາຢູ່ປະເທດຝຼັ່ງໃນເວລານັ້ນ. ຈາກນັ້ນ, ປະທານສຸພານຸວົງ ໄດ້ເຂົ້າເຮັດວຽກຢູ່ໂຮງງານຕໍ່ກຳປັ່ນຊຶ່ງນະທີ່ນີ້, ເພິ່ນໄດ້ມີໂອກາດໄກ້ຊິດຕິດແທດ, ກິ້ງເກືອກລີເລືອກັບບັນດາກຳມະກອນ. ພ້ອມດຽວກັນນີ້, ເພິ່ນກໍໄດ້ເລີ້ມຄົ້ນຄວ້າ ແລະ ເຫັນໄດ້ວິຖີຊີວິດຂອງຊາວຊົນນະບົດທີ່ປະເທດຝຼັ່ງ ແລະ ບາງປະເທດໃນເຂດອາຟຼິກາເໜືອຢ່າງເລິກເຊິ່ງ. ຕໍ່ມາ, ຜ່ານການເຂົ້າຮ່ວມເຄື່ອນໄຫວໃນແນວຮ່ວມປະຊາຊົນຕ້ານຟາດຊິດ, ເຮັດໃຫ້ ປະທານສຸພານຸວົງ ໄດ້ສຶກສາຄົ້ນຄວ້າ ແລະ ເຫັນໄດ້ທາດແທ້, ຄວາມເປັນຈິງພາຍໃຕ້ລະບອບລ່າເມືອງຂຶ້ນ ຊຶ່ງໄດ້ເປັນການສ້າງໃຫ້ສະຕິຕື່ນຕົວ ແລະ ແນວຄວາມຄິດປະຕິວັດ ໃນການເຂົ້າຮ່ວມເຄື່ອນໄຫວຕໍ່ສູ້ຕ້ານພວກລ່າເມືອງຂຶ້ນ ໄດ້ຮັບກາພັດທະນາຂະຫຍາຍຕົວຢ່າງໄວວາ ແລະ ໜັກແໜ້ນ.
ພາຍຫຼັງທີ່ປະທານໂຮ່ຈິມິນ ໄດ້ນຳພາສ້າງຕັ້ງພັກກອມມູນິດອິນດູຈີນຂຶ້ນໃນປີ 1930 ແລະ ນຳພາຂະບວນການຕໍ່ສູ້ຂອງປະຊາຊົນອິນດູຈີນ; ປະທານ ສຸພານຸວົງ ໄດ້ກັບຄືນມາອິນດູຈີນ ແລະ ໄດ້ເຂົ້າຮ່ວມນຳພາການຕໍ່ສູ້ປະຕິວັດຂອງປະຊາຊົນລາວ ນັບແຕ່ເວລານັ້ນເປັນຕົ້ນມາ.
ໃນຕະຫຼອດຊີວິດຂອງເພິ່ນ, ປະທານ ສຸພານຸວົງ ໄດ້ອຸທິດໝົດຊີວິດຂອງຕົນເພື່ອພາລະກິດປະຕິວັດລາວ ແລະ ເພື່ອຄວາມຢູ່ດີກິນດີຂອງປະຊາຊົນລາວບັນດາເຜົ່າ, ປະທານ ສຸພານຸວົງ ແມ່ນນັກຮັກຊາດຜູ້ຍິ່ງໃຫຍ່, ແມ່ນວິລະບຸລຸດແຫ່ງຊາດລາວ ທີ່ໄດ້ສ້າງຄຸນງາມຄວາມດີອັນໃຫຍ່ຫຼວງໃຫ້ແກ່ປະເທດຊາດ ແລະ ປະຊາຊົນລາວບັນດາເຜົ່າ.
ຊີວິດ ແລະ ການເຄື່ອນໄຫວຂອງປະທານສຸພານຸວົງ ແມ່ນຊີວິດປະຕິວັດທີ່ມີກຽດສະຫງ່າງາມ. ພາຍໃຕ້ການນຳພາຂອງພັກປະຊາຊົນປະຕິວັດລາວ, ປະທານ ສຸພານຸວົງ ໄດ້ເລີ່ມຈາກນັກຮັກຊາດທີ່ແທ້ຈິງຜູ້ໜຶ່ງ ຈົນກາຍເປັນນັກປະຕິວັດຜູ້ກ້າແກ່ນ, ເປັນຜູ້ນຳຂັ້ນສູງຂອງພັກແລະລັດເຮົາ, ເພິ່ນແມ່ນຜູ້ນຳທີ່ມີຜົນງານອັນໃຫຍ່ຫຼວງ ຊຶ່ງໄດ້ອຸທິດໃຫ້ແກ່ຂະບວນການຕໍ່ສູ້ ແລະ ການຂະຫຍາຍຕົວຂອງການປະຕິວັດລາວ ກໍຄືຂະບວນການຕໍ່ສູ້ຂອງບັນດາປະຊາດຢູ່ໃນທົ່ວໂລກ.
ຊີວິດ ແລະ ພາລະກິດຂອງປະທານສຸພານຸວົງ ແມ່ນຊີວິດ ແລະ ການເຄື່ອນໄຫວທີ່ສູງສົ່ງ, ຈົບງາມໃນທຸກໆສະພາວະ, ຍາມໃດເພິ່ນກໍເປັນແບບຢ່າງທີ່ດີເລີດ ດ້ານຄຸນທາດປະຕິວັດທີ່ເດັດຂາດ, ມີນ້ຳໃຈອົດທົນ, ໜຽວແໜ້ນມີຄວາມດຸໝັ່ນ, ປະຢັດ, ສັດທ່ຽງ, ຮັກສາໄດ້ແບບແຜນດຳລົງຊີວິດທີ່ປົກກະຕິ, ງ່າຍດາຍ. ໃນຕະຫຼອດຊີວິດຂອງເພິ່ນແມ່ນໄດ້ອຸທິດໝົດສະຕິປັນຍາ, ກຳລັງວັງຊາໃຫ້ແກ່ປະເທດຊາດແລະປະຊາຊົນບັນດາເຜົ່າ; ນ້ຳໃຈຮັກຊາດ, ຮັກປະຊາ ຊົນ, ນ້ຳໃຈສາກົນກຳມະຊີບຂອງປະທານສຸພານຸວົງແມ່ນໃສແຈ້ງ, ເລິກເຊິ່ງ ແລະ ກວ້າງຂວາງຈົນຫາສິ່ງໃດມາປຽບທຽບ ແລະ ພັນລະນາບໍ່ໄດ້ເລີຍ.
ປະທານ ສຸພານຸວົງ ແມ່ນຜູ້ນຳທີ່ມີນ້ຳໃຈອາດຫານ, ຍາມໃດກໍໄດ້ຍົກສູງນ້ຳໃຈຕໍ່ສູ້ໂດຍບໍ່ຢ້ານກົວຕໍ່ຄວາມເສຍສະຫຼະ ໃນເວລາທີ່ຢືນຢູ່ໃນສະພາບທີ່ເຄັ່ງຮ້ອນ, ຫົວລ້ຽງຫົວຕໍ່ຂອງບັ້ນຮົບປ້ອງກັນທ່າແຂກ, ກອງກຳລັງປະກອບອາວຸດ ແລະ ປະຊາຊົນຜູ້ຮັກຊາດ ພາຍໃຕ້ການບັນຊາໂດຍກົງຂອງປະທານສຸພານຸວົງ ໄດ້ຕ່າວໂຈມຕີສັດຕູຢ່າງອົງອາດກ້າຫານ, ສາມາດດັບສູນກຳລັງສັດຕູໄດ້ຢ່າງຫຼວງຫຼາຍ ແລະ ຢັບຢັ້ງການຍຶດຄອງຂອງພວກເຂົາໄດ້ໃນເບື້ອງຕົ້ນ; ເພື່ອຮັກສາກຳລັງຈັ້ງທ່າ, ປະທານສຸພານຸວົງໄດ້ຖອນກຳລັງຂ້າມໄປສູ່ເຂດປອດໄພ ຊຶ່ງໃນຂະນະນັ້ນ, ສັດຕູໄດ້ໃຊ້ຍົນສູ້ຮົບແລະປືນໃຫຍ່ລະດົມຍິງຢ່າງໜັກໜ່ວງ ເຮັດໃຫ້ກຳລັງຂອງພວກເຮົາຖືກບາດເຈັບ ແລະ ລົ້ມຕາຍເປັນຈຳນວນຫຼວງຫຼາຍ ແລະ ໃນເວລານັ້ນ, ປະທານສຸພານຸວົງກໍຖືກບາດເຈັບເຊັ່ນດຽວກັນ.
ໃນເວລາທີ່ຢູໃນສະພາບຄັບຂັນ, ສ່ຽງເປັນສ່ຽງຕາຍໃນເວລາຖືກຈັບ ແລະ ຖືກຄຸມຂັງຢູ່ຄຸກໂພນເຄັງ, ປະທານສຸພານຸວົງຍາມໃດກໍທຸ່ນທ່ຽງ, ໜຽວແໜ້ນ, ບໍ່ຄອນແຄນ; ເຖິງວ່າລັດຖະບານຫຸ່ນວຽງຈັນໄດ້ໃຊ້ທຸກກົນອຸບາຍ ແລະມາດຕາການທີ່ຜິດກົດໝາຍຕໍ່ປະທານສຸພານຸວົງ ແລະ ບັນດາຜູ້ນຳປະຕິວັດເຮົາ, ແຕ່ກໍບໍ່ໄດ້ເຮັດໃຫ້ພວກເພິ່ນມີຄວາມສະທ້ານຢ້ານກົວແຕ່ປະການໃດ, ຍາມໃດເພີ່ນແລະຜູ້ນຳເຮົາກໍເຊື່ອໝັ້ນຕໍ່ການນຳພາຂອງພັກ ແລະ ເຊື່ອໝັ້ນຕໍ່ກຳລັງແຮງຂອງມະຫາຊົນຢູ່ສະເໝີ.
ພັກເຮົາໄດ້ຕີລາຄາວ່າ ປະທານ ສຸພານຸວົງ ແມ່ນປັນຍາຊົນຜູ້ຍິ່ງໃຫຍ່, ແມ່ນນັກປະຕິວັດທີ່ກ້າແກ່ນ, ນັກການເມືອງທີ່ໂດດເດັ່ນ, ນັກການທະຫານທີ່ເກັ່ງກ້າ, ນັກການຕ່າງປະເທດທີ່ສະຫຼຽວສະຫຼາດ; ປະທານ ສຸພານຸວົງ ສົມກຽດແມ່ນຜູ້ນຳຂັ້ນສູງລຸ້ນທຳອິດທີ່ມີອິດທິພົນສູງຂອງພັກ ແລະ ການປະຕິວັດລາວ, ແມ່ນລູກຮັກຫຼານປະເສີດຂອງປະຊາຊົນລາວບັນດາເຜົ່າ, ຜູ້ນຳພາທີ່ມີທາດແທ້ປະຕິວັດທີ່ໜຽວແໜ້ນ, ອາດຫານ, ຍາມໃດກໍມີຄວາມເຊື່ອໝັ້ນຢ່າງເລິກເຊິ່ງຕໍ່ປະຊາຊົນ, ຖືເອົາປະຊາຊົນເປັນກົກ, ເປັນກຳລັງແຮງຕັດສິນທຸກໄຊຊະນະຂອງພາລະກິດປະຕິວັດ, ຍາມໃດເພິ່ນກໍໄກ້ຊິດສະໜິດສະໜົມ, ເປັນຫ່ວງເປັນໄຍນຳຄວາມສຸກທຸກຂອງປະຊາຊົນຢູ່ສະເໝີ. ສະນັ້ນ, ຕະຫຼອດຊີວິດຂອງເພິ່ນ, ປະທານສຸພານຸວົງໄດ້ອຸທິດເພື່ອອິດສະຫຼະພາບ ແລະ ຄວາມຢູ່ດີກິນດີຂອງປະຊາຊົນບັນດາເຜົ່າ ໂດຍບໍ່ມີວັດຖຸປະສົງອື່ນໃດທີ່ເໜືອກວ່າ.
ທົ່ວພັກ, ທົ່ວລັດ ແລະ ປະຊາຊົນລາວບັນດາເຜົ່າ, ຍາມໃດກໍຄິດຄະນິງເຖິງ, ຈາລຶກໄວ້ຢູ່ສະເໝີຊຶ່ງຄຸນງາມຄວາມດີ, ຜົນງານ ແລະ ແບບຢ່າງທີ່ໃສແຈ້ງທີ່ ປະທານ ສຸພານຸວົງ ໄດ້ອຸທິດໃຫ້ແກ່ປະເທດຊາດ ແລະ ພາລະກິດປະຕິວັດຂອງປະຊາຊົນເຮົາ.