ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະ ໄດ້ລົງເຄື່ອນໄຫວຊຸກຍູ້ຂະບວນການຜະລິດເປັນສິນຄ້າ ຢູ່ເມືອງໄຊທານີ ນະຄອນຫຼວງວຽງຈັນ (ນວ) ຖືກຕ້ອນຮັບຈາກທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ທ່ານ ຄຳປະດິດ ເຂັມມານິດ ເຈົ້າເມືອງໄຊທານີ ຕະຫຼອດຮອດຊາວກະສິກອນ.
ການລົງເຄື່ອນໄຫວຄັ້ງນີ້ ໄດ້ລົງເບິ່ງວິທີການປູກຜັກກຸ່ມຜະລິດກະສິກຳອິນຊີ ບ້ານທົ່ງມັ່ງ ເຊິ່ງທ່ານນາງ ຄຳມອນ ຫຼວງລາດ ປະທານກຸ່ມຜະລິດກະສິກຳອິນຊີທົ່ງມັ່ງ ໄດ້ລາຍງານໃຫ້ຮູ້ກ່ຽວກັບຂໍ້ສະດວກ ຂໍ້ຫຍຸ້ງຍາກ ແລະ ສິ່ງທ້າທາຍວ່າ: ປັດຈຸບັນ ກຸ່ມຜະລິດກະສິກຳອິນຊີທົ່ງມັ່ງ ໄດ້ມີການຂະຫຍາຍຕົວນັບມື້ເພີ່ມຂຶ້ນ ມີສະມາຊິກທັງໝົດ 48 ຄອບຄົວ ມີເຮືອນຮົ່ມທັງໝົດ 116 ຫຼັງ ຜົນຜະລິດບໍ່ພຽງພໍຕໍ່ຄວາມຕ້ອງການຂອງຕະຫຼາດ ໄປຄຽງຄູ່ກັນນັ້ນ ກຸ່ມຍັງພົບຄວາມຫຍຸ້ງຍາກ ເປັນຕົ້ນ ການເຂົ້າເຖິງແຫຼ່ງທຶນ ຂາດພື້ນທີ່ທຳການຜະລິດ ຍາມແລ້ງນ້ຳບໍ່ພຽງພໍ ຄ່າໄຟຟ້າທຳການຜະລິດຄິດໄລ່ເປັນອັດຕາທຸລະກິດ ຄວາມຮູ້ດ້ານວິຊາການຍັງຢູ່ໃນຂີດຈຳກັດ ນອກນັ້ນ ຍັງມີດອກເບ້ຍເງິນກູ້ສູງ ແລະ ອື່ນໆ ພ້ອມນັ້ນ ຄະນະດັ່ງກ່າວຍັງໄດ້ໄປຢ້ຽມຢາມ ບໍລິສັດ ລາວໂຄຄາ-ໂຄລາ ບ໊ອຕຕລິງ ຈຳກັດ ໂດຍທ່ານ ລີແອນໂດ ມາຕີນ ຄາຊາເຣຕ້າ ຜູ້ຈັດການທົ່ວໄປບໍລິສັດ ໄດ້ລາຍງານຫຍໍ້ກ່ຽວກັບສະພາບຄວາມເປັນມາວ່າ: ນັບແຕ່ປີ 2012 ບໍລິສັດ ລາວໂຄຄາ-ໂຄລາ ບ໊ອຕຕລິງ ຈຳກັດ ໄດ້ນຳຜະລິດຕະພັນນ້ຳໂຄກ ນ້ຳຫວານໂຄຄາໂຄລາ ເຂົ້າມາຈຳໜ່າຍຢູ່ ສປປ ລາວ ມາຮອດປີ 2014 ໄດ້ສ້າງຕັ້ງໂຮງງານຜະລິດ ມາຮອດປີ 2015 ໄດ້ເລີ່ມການຜະລິດຢູ່ປະເທດລາວ ເຊິ່ງສາມາດຜະລິດໄດ້ 22 ພັນແພັກຕໍ່ມື້ ໂດຍມີສາງຈຳໜ່າຍຢູ່ແຂວງສະຫວັນນະເຂດ ຫຼວງພະບາງ ຈຳປາສັກ ແລະ ນວ ມີຕົວແທນຈຳໜ່າຍ 24 ຫົວໜ່ວຍທົ່ວປະເທດ ນອກນີ້ ຍັງໄດ້ລົງຢ້ຽມຢາມໂຮງງານຜະລິດອາຫານສັດພູຄຳ ຂອງບໍລິສັດ ຊີພີລາວ ຈຳກັດ ຖືກຕ້ອນຮັບຈາກທ່ານ ທຳນອງ ພົນທອງມາກ ຜູ້ອຳນວຍການບໍລິສັດ ຊີພີລາວ ຈຳກັດ ແລະ ຢ້ຽມຢາມໂຮງງານອຸດສາຫະກຳທໍ່ໂຕໂຢລາວ ຖືກຕ້ອນຮັບຈາກທ່ານ ລັງກອນ ໄຊຍະວົງ ປະທານໂຮງງານອຸດສາຫະກຳທໍ່ໂຕໂຢລາວ.
ໂອກາດນີ້ ທ່ານນາຍົກລັດຖະມົນຕີ ໄດ້ມີຄຳເຫັນເຊິ່ງໄດ້ຍ້ອງຍໍຊົມເຊີຍຜົນສຳເລັດ ເປົ້າໝາຍທີ່ກຸ່ມ ແລະ ຫົວໜ່ວຍການຜະລິດ ທີ່ພະຍາຍາມຊຸກຍູ້ສົ່ງເສີມໃຫ້ປະຊາຊົນມີລາຍໄດ້ ພ້ອມນັ້ນ ຍັງໄດ້ເນັ້ນໃຫ້ບໍລິສັດ ຊີພີລາວ ຈຳກັດ ສືບຕໍ່ຊຸກຍູ້ສົ່ງເສີມ ສະໜອງແນວພັນ ເຕັກນິກວິຊາການໃຫ້ປະຊາຊົນປູກ ລ້ຽງ ຖືກຕ້ອງຕາມຫຼັກວິຊາການ ແນໃສ່ຊຸກຍູ້ສົ່ງເສີມໃຫ້ປະຊາຊົນມີວຽກເຮັດງານທຳຫຼາຍຂຶ້ນ ສ່ວນກຸ່ມຜະລິດກະສິກຳອິນຊີທົ່ງມັ່ງແມ່ນມອບໃຫ້ ນວ ແລະ ອົງການປົກຄອງເມືອງໄຊທານີ ລົງເລິກຊອກຫາດິນເປົ່າຫວ່າງທີ່ລັດຄຸ້ມຄອງໃຫ້ກຸ່ມໄດ້ທຳການຜະລິດ ເພື່ອຫຼຸດຜ່ອນຕົ້ນທຶນ ແລະ ສະໜອງພືດຜັກໃຫ້ພຽງພໍຕໍ່ຄວາມຕ້ອງການຂອງຕະຫຼາດ ພ້ອມນັ້ນ ຍັງໄດ້ມອບເງິນຊຸກຍູ້ກຸ່ມຈຳນວນ 20 ລ້ານກີບ ກະຊວງພະລັງງານ ແລະ ບໍ່ແຮ່ ກະຊວງໂຍທາທິການ ແລະ ຂົນສົ່ງ ແລະ ນວ ພາກສ່ວນລະ 10 ລ້ານກີບ ເພື່ອປະກອບສ່ວນສະໜອງທຶນເຂົ້າໃນການຜະລິດຕື່ມອີກ.
