ອົງການປົກຄອງເມືອງເຊບັ້ງໄຟ ສົມທົບກັບບັນດາຫ້ອງການອ້ອມຂ້າງ ອຳນາດການປົກຄອງບ້ານໃນທົ່ວເມືອງ ເອົາໃຈໃສ່ໃນການຈັດຕັ້ງປະຕິບັດການສັກຢາກັນພະຍາດໝາກແດງນ້ອຍ ແລະ ໝາກແດງໃຫຍ່ ເພື່ອໃຫ້ເດັກໃນເກນອາຍຸໄດ້ຮັບວັກຊີນບັນລຸເປົ້າ 95% ຂຶ້ນໄປ.
ທ່ານ ລົດວິໄລ ຈັນທະນຸວົງ ຮອງເຈົ້າເມືອງເຊບັ້ງໄຟ ຜູ້ຊີ້ນຳວຽກງານວັດທະນະທຳ-ສັງຄົມ ໃຫ້ສຳພາດຕໍ່ສື່ວມນຊົນຈາກສູນກາງໃນວັນທີ 21 ພຶດສະພາ ຜ່ານມາວ່າ: ເຊບັ້ງໄຟ ໜຶ່ງໃນຈຳນວນ 9 ຕົວເມືອງຂອງແຂວງຄຳມ່ວນ ມີເນື້ອທີ່ທັງໝົດ 971 ກິໂລຕາແມັດ ມີ 45 ບ້ານ ມີປະຊາກອນທັງໝົດກວ່າ 33.000 ຄົນ ໃນໄລຍະຜ່ານມາ ອົງການປົກຄອງເມືອງ ໄດ້ເອົາໃຈໃສ່ຢ່າງຕັ້ງໜ້າຕໍ່ວຽກງານສັກຢາກັນພະຍາດໝາກແດງນ້ອຍ-ໝາກແດງໃຫຍ່ ໂດຍໄດ້ປະສານສົມທົບກັບຫ້ອງການກ່ຽວຂ້ອງ ກໍຄື ຫ້ອງການສາທາລະນະສຸກເມືອງ ໃນການຈັດຕັ້ງປະຕິບັດແຕ່ລະແຜນງານ ມາຮອດປັດຈຸບັນແມ່ນໄດ້ສຸມໃສ່ແຜນງານປ້ອງກັນ ແລະ ຄວບຄຸມພະຍາດຕິດຕໍ່ ແລະ ສູ້ຊົນປະຕິບັດຕາມ 11 ໂຕຊີ້ວັດ ແລະ ນັ້ນກໍແມ່ນ ການປ້ອງກັນ ແລະ ຄວບຄຸມການລະບາດຂອງພະຍາດໃນແຕ່ລະປີ.
ໃນແຕ່ລະປີ ອົງການປົກຄອງໄດ້ເຮັດແຈ້ງການໃຫ້ແຕ່ລະຫ້ອງການອ້ອມຂ້າງ ຮາກຖານບ້ານທົ່ວເມືອງ ໃນການເກັບກຳຂໍ້ມູນ ເດັກໃນກຸ່ມເປົ້າໝາຍສັກຢາກັນພະຍາດຢູ່ໃນຄວາມຮັບຜິດຊອບຂອງຕົນ ເພື່ອໃຫ້ພໍ່ແມ່ ຜູ້ປົກຄອງ ໄດ້ນຳເອົາລູກຫຼານຂອງຕົນໄປສັກຢາກັນພະຍາດຢູ່ຕາມຈຸດບໍລິການ ໂດຍສະເພາະໂຮງໝໍເມືອງ ໂຮງໝໍນ້ອຍແຫ່ງຕ່າງໆ ສ່ວນຄອບຄົວທີ່ເຄື່ອນໄຫວເຮັດວຽກຢູ່ບ້ານອື່ນໆ ທາງບ້ານກໍຈະແຈ້ງໃຫ້ອຳນາດການປົກຄອງບ້ານທີ່ເຂົາເຈົ້າອາໃສຢູ່ ເພື່ອໃຫ້ເຂົາເຈົ້າໄດ້ນຳເອົາລູກຫຼານໄປສັກຢາກັນພະຍາດໃຫ້ຄົບຕາມຈຳນວນ.
ຜ່ານການຈັດຕັ້ງປະຕິບັດໃນໄລຍະຜ່ານມາ ຖືວ່າເມືອງເຮົາຍັງປະສົບກັບສິ່ງທ້າທາຍຫຼາຍຢ່າງ ເຊິ່ງສົ່ງຜົນໃຫ້ການຈັດຕັ້ງປະຕິບັດວຽກງານດັ່ງກ່າວໃນໄລຍະຜ່ານມາຍັງບໍ່ທັນບັນລຸຕາມແຜນການເຊັ່ນ: ໃນປີ 2021 ວາງຄາດໝາຍໄວ້ 95% ສາມາດປະຕິບັດໄດ້ພຽງ 80% ປີ 2022 ປະຕິບັດໄດ້ 87% ສ່ວນປີ 2023 ແມ່ນສາມາດບັນລຸຕາມຄາດໝາຍທີ່ວາງໄວ້.
ສຳລັບຂະບວນສັກຢາກັນພະຍາດໝາກແດງນ້ອຍ-ໝາກແດງໃຫຍ່ ທີ່ທົ່ວແຂວງໄດ້ເປີດຂະບວນການຢ່າງເປັນທາງການໃນວັນທີ 20-30 ພຶດສະພາ 2024 ທາງເມືອງພວກເຮົາກໍໄດ້ມີການກະກຽມໄວ້ເປັນຢ່າງດີ ໄດ້ມີການແຕ່ງຕັ້ງຄະນະຮັບຜິດຊອບ ໄດ້ຈັດກອງປະຊຸມກັບສູນແມ່ ແລະ ເດັກ ແລະ ພາກສ່ວນທີ່ກ່ຽວຂ້ອງ ເພື່ອປຶກສາຫາລືໃນການຈັດຕັ້ງປະຕິບັດວຽກງານສັກຢາກັນພະຍາດ ຫຼັງຈາກນັ້ນກໍໄດົ້ງໂຄສະນາຜ່ານສື່ມວນຊົນ ລົງສຸຂະສຶກສາຢູ່ຮາກຖານບ້ານ ເພື່ອເຮັດໃຫ້ພໍ່ແມ່ປະຊາຊົນໄດ້ຮັບຮູ້ເຂົ້າໃຈກ່ຽວກັບຜົນດີຂອງການສັກຢາກັນພະຍາດ ຫຼັງຈາກນັ້ນພິທີເປີດຂະບວນການດັ່ງກ່າວໃນວັນທີ 20 ພຶດສະພາ 2024 ທີ່ໂຮມໝໍເມືອງດັ່ງກ່າວ ໂດຍມີພໍ່ແມ່ຜູ້ປົກຄອງໄດ້ນຳພາລູກຫຼານເຂົ້າມາຮັບວັກຊີນເປັນຈຳນວນຫຼາຍ.
ສ່ວນການບໍລະການສັກຢາກັນພະຍາດໝາກແດງນ້ອຍ ແລະ ໝາກແດງໃຫຍ່ ພໍ່ແມ່ຜູ້ປົກຄອງສາມາດນຳພາລູກຫຼານໄປສັກຢາຕາມຈຸດທີ່ທາງຄະນະຮັບຜິດຊອບກຳນົດໄວ້ເຊັ່ນ: ໂຮງໝໍເມືອງ ໂຮງໝໍນ້ອຍ ພ້ອມນັ້ນກໍຍັງທີມງານເຄື່ອນທີ່ 10 ທີມ ໂດຍຈະລົງເຄື່ອນໄຫວຕາມຮາກຖານບ້ານເພື່ອອຳນວຍຄວາມສະດວກໃຫ້ກັບພໍ່ແມ່ປະຊາຊົນ.
ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວບັນລຸໂຕເລກຄາດໝາຍທີ່ວາງໄວ້ ຂ້າພະເຈົ້າຂໍເຊີນຊວນພໍ່ແມ່ຜຢູ້ປົກຄອງຕ້ອງເປັນເຈົ້າການນຳພາດລູກຫຼາຍມາສັກຢາກັນພະຍາດ ຕາຈຸດບໍລິການຕ່າງໆ ແນໃສ່ເພື່ອບັນລຸ 95% ໃນຈຳນວນກຸ່ມເປົ້າໝາຍເດັກອາຍຸນັບແຕ່ 9 ເດືອນຂຶ້ນໄປຮອດ 5ປິ ຈຳນວນ 2.375 ຄົນ ໃນທົ່ວເມືອງ.