ໃນບົດນີ້ ຜູ້ຂຽນຍັງຂໍສືບຕໍ່ເລື່ອງບັນຫາຢາເສບຕິດ ທີ່ກາຍເປັນຂ່າວດັງຢູ່ບາງປະເທດ ໃນນັ້ນ ລວມທັງເຫດການທີ່ບໍ່ມີໃຜຄາດຄິດວ່າຊິເປັນໄປໄດ້ ເຊັ່ນ:
ທີ່ມຽນມາ: ຂ່າວເລື່ອງພະສົງ ຫຼື ຄູບາໃນຜ້າເຫຼືອງ ລົງມືຄ້າຢາເສບຕິດເອງ ຢູ່ມຽນມາ ເມື່ອກວ່າ 3 ປີຜ່ານມານັ້ນ ຊີ້ໃຫ້ພວກເຮົາເຫັນວ່າ ອາຊະຍາກອນຄ້າຢາມໍລະນະນີ້ ສາມາດເປັນໄດ້ໃນທຸກຄົນ ໂດຍບໍ່ເລືອກຊັ້ນວັນນະ ເຊື້ອຊາດ ຜິວພັນ ກໍຄື ການເຊື່ອຖື ຖ້າເຂົາຄົນນັ້ນຕົກເປັນທາດພະຍາດໂລພາຕາຮ້ອນ ເຫັນເງິນໜ້າດຳ ເຫັນຄຳໜ້າເສົ້າ (ຍ້ອນຢ້ານບໍ່ໄດ້) ຂ່າວນີ້ເກີດຂຶ້ນຢູ່ລັດຍະໄຂ່ ທາງພາກເໜືອຂອງມຽນມາ ໃນຂະນະທີ່ຄູບາເຈົ້າບັນຫາອົງໜຶ່ງ ຂັບລົດເລາະຢູ່ ໂດຍອາໄສຂ່າວລັບທີ່ໄດ້ຮັບລ່ວງໜ້າ ເຈົ້າໜ້າທີ່ຕຳຫຼວດໄດ້ຢຸດລົດຄູບາອົງນີ້ ເພື່ອກວດຄົ້ນ ແລະ ພົບຢາບ້າຈຳນວນ 4 ແສນເມັດ ແລະ ເງິນສົດ 769 ໂດລາສະຫະລັດ ຕໍ່ຈາກນັ້ນ ເຈົ້າໜ້າທີ່ຕຳຫຼວດປາບປາມຢາເສບຕິດ ກໍໄດ້ເຂົ້າໄປຄົ້ນກຸດຕິຂອງພະອົງນີ້ຢູ່ວັດ ແລະ ພົບຢາບ້າໃນຫ້ອງນອນຂອງເພິ່ນຕື່ມອີກ 4,2 ລ້ານເມັດ ພ້ອມດ້ວຍລູກລະເບີດໜຶ່ງໜ່ວຍ ພ້ອມອາວຸດປືນ ທ່ານ ຈໍ ເມຍ ວິນ (Kyaw Mia Win) ເຈົ້າໜ້າທີ່ຕຳຫຼວດໃນເຫດການ ໄດ້ເວົ້າກ່ຽວກັບຄູບາຄ້າຢາເສບຕິດນີ້ວ່າ: ນີ້ມັນບໍ່ແມ່ນຄະດີທຳມະດາຈັກດີ້ ພວກເຮົາຕ່າງກໍຕົກສະເງີ້ ເມື່ອໄດ້ຮັບຂ່າວວ່າ ຄູບາໃນຜ້າເຫຼືອງ ຖືກຈັບຍ້ອນຄ້າຢາເສບຕິດ ສ່ວນທ່ານ ໂຊ ມິນ ຕຸນ (Soe Min Tun) ຫົວໜ້າກົມໃນກະຊວງກິດຈະການສາສະໜານັ້ນ ໄດ້ສະແດງການຕື່ນຕົກໃຈ ແລະ ບອກວ່າ ຄະດີລັກສະນະນີ້ບໍ່ຄ່ອຍມີໃຫ້ເຫັນ ແຕ່ກໍບໍ່ແມ່ນວ່າຊິເປັນໄປບໍ່ໄດ້ ສຳລັບຄະດີນີ້ ກ່ອນອື່ນໝົດ ພວກເຮົາຈະໄລ່ຄູບາອົງນີ້ສິກ ແລ້ວເຂົ້າສູ່ການດຳເນີນຄະດີຄືກັບຄົນທຳມະດາທົ່ວໄປ ກ່ອນໜ້າເຫດການນີ້ 1 ປີ ຄື: ໃນປີ 2016 ທາງການມຽນມາ ໄດ້ຢຶດຢາບ້າຈຳນວນ 21 ລ້ານເມັດ ຢູ່ໃກ້ກັບຊາຍແດນລະຫວ່າງມຽນມາ ກັບ ສປ ຈີນ ມູນຄ່າຂອງຢາບ້າທີ່ຢຶດໄດ້ນີ້ສູງເຖິງ 35,5 ລ້ານໂດລາສະຫະລັດ.
ທີ່ອິນໂດເນເຊຍ: ຢູ່ບາງປະເທດການເສບຢາເສບຕິດນັ້ນຖືເປັນໂທດອາຍາ ຄື: ຕ້ອງໄດ້ຮັບໂທດຈຳຄຸກ ແຕ່ຢູ່ບາງປະເທດນັ້ນບໍ່ຖືເປັນໂທດອາຍາ ຄື: ຜູ້ກະທຳຜິດຈະຖືກດັດສ້າງ ຫຼື ສົ່ງເຂົ້າສູນປິ່ນປົວ ສຳລັບຢູ່ອິນໂດເນເຊຍ ໃນເມື່ອກ່ອນ ການເສບຢາເສບຕິດນັ້ນຖືເປັນຄະດີອາຍາ ເຊິ່ງຜູ້ກະທຳຜິດຕ້ອງຖືກຕັດສິນຈຳຄຸກ ແຕ່ແລ້ວພໍຕົກມາໃນຕົ້ນປີ 2014 ກໍມີຂ່າວທີ່ບອກວ່າ ທາງການຂອງປະເທດນີ້ ໄດ້ອອກກົດລະບຽບໃໝ່ ທີ່ກຳນົດໃຫ້ຜູ້ຕິດຢາເສບຕິດເຂົ້າສູນຟັກຟື້ນປິ່ນປົວ ແທນການລົງໂທດຕິດຄຸກຄືເມື່ອກ່ອນ ກົດລະບຽບສະບັບນີ້ໄດ້ມີການລົງລາຍເຊັນໂດຍລັດຖະມົນຕີກະຊວງສາທາລະນະສຸກ ລັດຖະມົນຕີກະຊວງສັງຄົມ ທ່ານລັດຖະມົນຕີກະຊວງກົດໝາຍ ແລະ ສິດທິມະນຸດ ຜູ້ບັນຊາການກອງກຳລັງຕຳຫຼວດສືບຄວາມລັບ ແລະ ຫົວໜ້າຫ້ອງການຕ້ານຢາເສບຕິດແຫ່ງຊາດ ທ່ານລັດຖະມົນຕີກະຊວງກົດໝາຍ ແລະ ສິດທິມະນຸດ ໄດ້ໃຫ້ເຫດຜົນກ່ຽວກັບການປ່ຽນແປງໃນການກຳນົດໂທດຜູ້ເສບຢາເສບຕິດຄັ້ງນີ້ວ່າ: ພວກຕິດຢາເສບຕິດນັ້ນ ຕ້ອງຖືກສົ່ງເຂົ້າສູນຟັກຟື້ນປິ່ນປົວ ເພາະວ່າພວກເຂົາເຈົ້າເອງ ກໍໄດ້ຮັບຄວາມທຸກທໍລະມານຈາກຜົນຮ້າຍຂອງຢາເສບຕິດ ດັ່ງນັ້ນ ພວກເຂົາຄວນໄດ້ຮັບການປິ່ນປົວ ກົດລະບຽບໄດ້ກຳນົດເງື່ອນໄຂຂອງຜູ້ຕິດຢາເສບຕິດ ທີ່ມີສິດໄດ້ຮັບການປິ່ນປົວນັ້ນວ່າ ຜູ້ກ່ຽວຕ້ອງມີໃບຢັ້ງຢືນຈາກທາງການກ່ຽວຂ້ອງ ວ່າຜູ້ຕິດຢາເສບຕິດມີຄວາມຈຳເປັນຕ້ອງໄດ້ຮັບການຟັກຟື້ນປິ່ນປົວແທ້ ນີ້ຄືການປ່ຽນແປງຄັ້ງສຳຄັນ ເພາະໃນເມື່ອກ່ອນນັ້ນ ຜູ້ມີສ່ວນພົວພັນກັບຢາເສບຕິດ ບໍ່ວ່າຈະເປັນຜູ້ຜະລິດ ຜູ້ຄ້າ ຫຼື ຜູ້ເສບ ກໍລ້ວນແຕ່ໄດ້ຮັບໂທດຕິດຄຸກ ໂດຍບໍ່ມີການຈຳແນກເລີຍ.