ທົ່ວເມືອງຫາດຊາຍຟອງ
ໂດຍໄດ້ຮັບການສະໜັບສະໜູນຈາກ ອົງການ ແຮັບປີ້ດຣີມເມີສ ອົງການ ກູດເນເບີສ ລາວ ບໍລິສັດ ນາໂຊ ຈໍາກັດ (ຜະລິດອຸປະກອນກິລາ) ແລະ ບໍລິສັດ ດີເອສໄອ ຈຳກັດ ດັ່ງນັ້ນ ຫ້ອງການສຶກສາທິການ ແລະ ກີລາ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ຈັດກິດຈະກຳແຂ່ງຂັນກິລາເຕະບານ ຊັ້ນປະຖົມສຶກສາສົມບູນ ຄັ້ງທີ 1 ຮອບຕັດສິນ ຂຶ້ນວັນທີ 16 ທັນວາ 2023 ຜ່ານມາ ທີ່ເດີ່ນຫຍ້າທຽມ ນີວແອນາ ເມືອງດັ່ງກ່າວ ໂດຍມີທ່ານ ຈອງຢອງຊູ ເອກອັກຄະລັດທະທູດ ແຫ່ງສາທາລະນະລັດເກົາຫຼີ ປະຈຳ ລາວ ທ່ານ ຄຳແພງ ແປງປະເສີດ ຫົວໜ້າໜ່ວຍງານກິລາ ເມືອງຫາດຊາຍຟອງ ພ້ອມດ້ວຍຄະນະອໍານວຍການບໍລິສັດ ອົງການ ສະມາຄົມ ຄະນະກໍາມະການແຂ່ງຂັນ ພະນັກງານຄູ-ອາຈານ ແລະ ນັກກີລາເຂົ້າຮ່ວມ.
ໂດຍປະຕິບັດຕາມ 5 ຫຼັກມູນການສຶກສາແຫ່ງຊາດທີ່ກະຊວງສຶກສາທິການ ແລະ ກີລາ ວາງອອກ ແລະ ແຜນການເຄື່ອນໄຫວກິດຈະກຳປະຈຳສົກຮຽນ 2022-2023 ຂອງຫ້ອງການສຶກສາທິການ ແລະ ກິລາມືອງ ວາງອອກ ພ້ອມນັ້ນ ກໍເພື່ອເປັນການສ້າງຂະບວນການຟົດຟື້ນ ຮັບໃຊ້ການຮຽນ-ການສອນ ໃຫ້ມີບັນຍາກາດຄຶກຄື້ນ ເປັນການເສີມສ້າງທັກສະດ້ານກີລາ ແລະ ສ້າງຄວາມສາມັກຄີ ລະຫວ່າງໂຮງຮຽນ ນັກຮຽນກັບຄູ-ອາຈານໄດ້ແລກປ່ຽນບົດຮຽນ ແລະ ທັກສະກີລານໍາກັນ ເປັນການຮ່ວມມືກັນກັບຫ້ອງການສຶກສາ ປະຈຳເມືອງ ເພື່ອພັດທະນາຊຸມຊົນ ແລະ ໂຮງຮຽນ.
ກິດຈະກໍາ ການແຂ່ງຂັນກິລາບານເຕະ ຊັ້ນປະຖົມສຶກສາສົມບູນ ຄັ້ງທີ 1 ເຊິ່ງໄດ້ດໍາເນີນຈັດກິດຈະກໍາແຂ່ງຂັນຮອບຄັດເລືອກມາແຕ່ວັນທີ 24 ຕຸລາ ມາຮອດວັນທີ 16 ທັນວາ 2023 ແມ່ນສໍາເລັດ ໃນຮອບສຸດທ້າຍ ມີ 8 ທີມເຂົ້າຮ່ວມແຂ່ງຂັນ ຄື: ໂຮງຮຽນປະຖົມ ດົງຄໍາຊ້າງ ໜອງແຫ້ວ ຫາດຊາຍຂາວ ໜອງແວງ ສາລະຄໍາ ໜົງພົງ ທ່າເດື່ອ ແລະ ໂຮງຮຽນປະຖົມນໍ້າຮອນ ໃນນັ້ນ ການແຂ່ງຂັນແບ່ງເປັນ 2 ກຸ່ມ ຄື: ກຸ່ມເອ ມີ ໂຮງຮຽນປະຖົມ ຫາດຊາຍຂາວ ໜອງແວງ ທ່າເດື່ອ ສາລະຄໍາ ກຸ່ມບີ ມີ ໂຮງຮຽນປະຖົມ ໜອງພົງ ດົງຄໍາຊ້າງ ໜອງແຫ້ວ ແລະ ນໍ້າຮອນ ເຊິ່ງ ຜົນການແຂ່ງຂັນກິລາເຕະບານ ຄັ້ງນີ້ ທີ1 ໂຮງຮຽນປະຖົມ ໜອງພົງ ທີ2 ສາລະຄໍາ ທີ3 ໂຮງຮຽນປະຖົມ ທ່າເດື່ອ ແລະ 5 ທີມແມ່ນໄດ້ຮັບລາງວັນຊົມເຊີຍ ໃນໂອກາດດຽວກັນນີ້ ກໍໄດ້ມອບຊຸດກິລາ ແລະ ອຸປະກອນກິລາໃຫ້ 8 ທີມທີ່ເຂົ້າຮ່ວມ ອີກດ້ວຍ.
