ສະພາບການສັນຈອນໃນນະຄອນຫຼວງວຽງຈັນ ປັດຈຸບັນເຫັນວ່າມີຄວາມຫຍຸ້ງຍາກສົມຄວນ ໂດຍສະເພາະແມ່ນໃນໂມງຮີບດ່ວນ ສາເຫດກໍຍ້ອນຈຳນວນພາຫະນະເພີ່ມຂຶ້ນ ບວກກັບການເປັນເຈົ້າການຕໍ່ການຈັດຕັ້ງປະຕິບັດລະບຽບການສັນຈອນຂອງນັກຂັບຂີ່ ນອກຈາກສົ່ງຜົນໃຫ້ການສັນຈອນມີຄວາມຫຍຸ້ງຍາກແລ້ວ ຍັງກໍ່ໃຫ້ເກີດອຸບັດເຫດຕາມມາ ຈາກສະພາບການດັ່ງກ່າວ ທາງເຈົ້າໜ້າທີ່ຕຳຫຼວດຈະລາຈອນນະຄອນຫຼວງວຽງຈັນ ກໍໄດ້ເອົາໃຈໃສ່ໃນການແກ້ໄຂ ໂດຍຈະໄດ້ສຸມໃສ່ປະຕິບັດບັນດາໜ້າວຽກຕ່າງໆ ເພື່ອແກ້ໄຂບັນຫາທີ່ເກີດຂຶ້ນ.
ຕາມຂໍ້ມູນຈາກໜັງສືພິມປ້ອງກັນຄວາມສະຫງົບ ເຫັນວ່າ: ທ່ານ ພັທ ສັງຄົມ ພົມມະລາດ ຮອງຫົວໜ້າພະແນກຕຳຫຼວດຈະລາຈອນ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນໄລຍະທີ່ຜ່ານມາ ພະແນກຕຳຫຼວດຈະລາຈອນ ປກສ ນະຄອນຫຼວງວຽງຈັນ ກໍໄດ້ສຸມໃສ່ຫຼາຍວຽກງານ ເພື່ອຫຼຸດຜ່ອນອຸບັດເຫດ ແລະ ແກ້ໄຂສະພາບການຈະລາຈອນແອອັດ ໂດຍເລີ່ມຈາກວຽກງານຈັດລະບຽບຕົວເມືອງ: ເອົາໃຈໃສ່ລົງລະບາຍການສັນຈອນຕາມ 3 ແຍກ 4 ແຍກ ຈັດລະບຽບການສັນຈອນຕາມສາຍທາງຕ່າງໆທີ່ມີຄວາມສັບສົນ ຈັດຄວາມເປັນລະບຽບຮຽບຮ້ອຍຕາມຕະຫຼາດຄິວລົດ ສະຖານທີ່ຊຸມນຸມຊົນ ເອົາໃຈໃສ່ສຶກສາອົບຮົມກ່າວເຕືອນຜູ້ລ່ວງລະເມີດກົດລະບຽບການສັນຈອນ ເພື່ອໃຫ້ຫັນເຂົ້າສູ່ລະບຽບຫຼັກການຕາມກົດໝາຍ ແຈ້ງການ ແລະ ລະບຽບການຕ່າງໆ ຫັນເຂົ້າສູ່ຄວາມເປັນລະບຽບຮຽບຮ້ອຍຂອງສັງຄົມ ໂດຍປະສານສົມທົບກັບພາກສ່ວນ ຍທຂ ແລະ ຄບຕ.
ວຽກງານຈັດການ-ປະຈຳປ້ອມ: ພະນັກງານນັກຮົບແຕ່ລະສະຫາຍໄດ້ເອົາໃຈໃສ່ຕາມໜ້າທີ່ ທີ່ໄດ້ຮັບການມອບໝາຍປະຈຳຈຸດ-ປະຈຳປ້ອມຊົ່ວຄາວ ແລະ ຖາວອນ ເພື່ອຕິດຕາມການກວດກາພາຫະນະຂອງຜູ້ໃຊ້ລົດ-ໃຊ້ຖະໜົນ ອອກລະບາຍລົດໃນໂມງເຂົ້າການ-ເລີກການ ເພື່ອເຮັດໃຫ້ການສັນຈອນສະດວກຄ່ອງຕົວ ເຮັດໃຫ້ມີຄວາມປອດໄພ ຄວາມເປັນລະບຽບຮຽບຮ້ອຍ ສາມາດກັກເອກະສານລົດທີ່ລ່ວງລະເມີດລະບຽບການສັນຈອນ.
ວຽກງານຄຸ້ມຄອງພາຫະນະ ແລະ ການຂັບຂີ່: ສົມທົບກັບພາກສ່ວນກວດກາເຕັກນິກຢູ່ 3 ຈຸດ ສູນກວດກາເຕັກນິກທົ່ງສ້າງນາງ ກວດກາເຕັກນິກທົ່ງປົ່ງ ແລະ ກວດກາເຕັກນິກປານມໍເຕີ້ ນອກນັ້ນຍັງໄດ້ສົ່ງພະນັກງານເຂົ້າຮ່ວມ ເປັນຄະນະກຳມະການສອບເສັງໃບຂັບຂີ່ ຢູ່ກອງຄຸ້ມຄອງພາຫະນະຢູ່ທົ່ງປົ່ງ ເຂົ້າຮ່ວມເປັນຄະນະກຳມະການແກ້ໄຂຄະດີ.
ວຽກງານໂຄສະນາ: ຖືວ່າເປັນປາຍແຫຼມຂອງວຽກງານຈະລາຈອນ ເພື່ອໂຄສະນາ ສຶກສາອົບຮົມ ແລະ ກ່າວເຕືອນຜູ້ໃຊ້ລົດ-ໃຊ້ຖະໜົນ ຮັບຮູ້ເຖິງລະບຽບການຈະລາຈອນ ກົດໝາຍຂົນສົ່ງ ແລະ ແຈ້ງການຕ່າງໆ ໂດຍມີການເຄື່ອນໄຫວໂຄສະນາຕາມໄຟອຳນາດ 3 ແຍກ 4 ແຍກ ກຸ່ມບ້ານ ສຳນັກງານ ອົງການ ໂຮງຮຽນ ໂຮງຈັກ ໂຮງງານ ເພື່ອຍົກໃຫ້ເຫັນແຈ້ງເຖິງຜົນເສຍຫາຍຈາກການເກີດອຸບັດເຫດ ນອກນັ້ນຍັງໄດ້ໂຄສະນາຜ່ານສື່ມວນຊົນ ໜັງສືພິມ ວິທະຍຸ ແລະ ໂທລະພາບ ເພື່ອແຊກຊ້ອນໄປໃນທຸກພື້ນທີ່.
ວຽກງານທາງຫຼວງ: ໄດ້ລົງເຮັດໜ້າທີ່ ລົງລະບາຍການສັນຈອນຕາມສາຍທາງ ທີ່ມີຄວາມສັບສົນຕາມສາຍທາງຕ່າງໆ ອອກກວດກາພາຫະນະຕາມຈຸດສຳຄັນ ອອກທິດຈະລາຈອນ ອອກກວດກາຄວາມໄວທາດເຫຼົ້າ ການຮັດສາຍນິລະໄພ ປ້ອງກັນເປີດທາງໃຫ້ແຂກພາຍໃນ ແລະ ຕ່າງປະເທດ ສຶກສາອົບຮົມຜູ້ທີ່ໃຊ້ລົດ-ໃຊ້ຖະໜົນທີ່ຮູ້ເທົ່າບໍ່ເຖິງການ.
ວຽກງານແກ້ໄຂຄະດີອຸບັດເຫດ: ເປັນວຽກງານທີ່ມີຄວາມຫຍຸ້ງຍາກສັບສົນ ດັ່ງນັ້ນ ຈຶ່ງໄດ້ເນັ້ນໃຫ້ພະນັກງານ-ນັກຮົບແຕ່ລະສະຫາຍຕ້ອງເອົາໃຈໃສ່ຕໍ່ໜ້າທີ່ວິຊາສະເພາະຢ່າງເຂັ້ມງວດ ໂດຍສະເພາະ ແມ່ນປະຈຳການຄອຍເຫດ 24 ຊົ່ວໂມງ ເພື່ອແກ້ໄຂອຸບັດເຫດທີ່ເກີດຂຶ້ນໃຫ້ທັນເວລາ ສະພາບການລົງວັດແທກສະຖານທີ່ເກີດເຫດວ່ອງໄວ ແລະ ຊັດເຈນ ການດຳເນີນຄະດີອຸບັດເຫດ ແມ່ນດຳເນີນໄປຕາມຂັ້ນຕອນຂອງກົດໝາຍ ຖືກຕ້ອງຕາມຫຼັກການວິຊາສະເພາະເພື່ອຫຼີກລ້ຽງຫາງສຽງ.
ເຖິງຢ່າງໃດກໍຕາມ ເພື່ອເຮັດໃຫ້ການສັນຈອນໃນນະຄອນຫຼວງວຽງຈັນ ມີຄວາມເປັນລະບຽບຮຽບຮ້ອຍ ແລະ ອຸບັດເຫດຫຼຸດລົງ ນອກຈາກເຈົ້າໜ້າທີ່ຕຳຫຼວດຈະລາຈອນ ສຸມໃສ່ຈັດຕັ້ງປະຕິບັດໜ້າທີ່ວິຊາສະເພາະຢ່າງຕັ້ງໜ້າແລ້ວ ຜູ້ໃຊ້ລົດໃຊ້ຖະໜົນເອງກໍຕ້ອງເປັນເຈົ້າການ ໃນການປະຕິບັດລະບຽບການສັນຈອນຢ່າງເຂັ້ມງວດ ຈຶ່ງຈະເຮັດໃຫ້ການຈັດຕັ້ງປະຕິວັດວຽກງານດັ່ງກ່າວໄດ້ຮັບປະສິດທິຜົນ.