ທີ່ອາຣາບີຊາອຸດິດ: ໂດຍສືບຕໍ່ປະຕິຮູບມາດຕະຖານດ້ານສິດທິຂອງແມ່ຍິງ ທີ່ດຳເນີນມາຢ່າງຕໍ່ເນື່ອງ ໃນຊຸມປີຫຼັງໆມານີ້ ແມ່ຍິງອາຣາບີຊາອຸດິດ ໄດ້ເລີ່ມຊົມໃຊ້ສິດທິທີ່ພວກຕົນບໍ່ເຄີຍໄດ້ຮັບມາກ່ອນ ເຊັ່ນ: ສິດທິສະເໝີພາບໃນຄອບຄົວ ສິດທິອອກນອກເຮືອນ ໂດຍບໍ່ມີສະມາຊິກເພດຊາຍໃນຄອບຄົວຄຸ້ມຄອງ ສິດທິຂັບລົດເຂົ້າຊົມກີລາ ຊົມລະຄອນ-ຮູບເງົາ ແລະ ອື່ນໆ ໃນປັດຈຸບັນ ແມ່ຍິງຂອງປະເທດນີ້ ມີສິດຮອດເຂົ້າຮັບໃຊ້ໃນກອງທັບ ແລ້ວໃນເດືອນເມສາປີ 2018 ທາງສະພາທີ່ປຶກສາຊູຣາ (ລັດຖະສະພາ) ຂອງປະເທດນີ້ ກໍໄດ້ອອກຄຳສັ່ງໃຫ້ຄະນະລັດຖະບານ ຄົ້ນຄວ້າ ແລະ ຮ່າງກົດໝາຍ ກຳນົດຄວາມຜິດໃນຄະດີໃຊ້ຄວາມຮຸນແຮງ ຫຼື ລະເມີດທາງເພດຕໍ່ແມ່ຍິງດ້ວຍການລົງໂທດປັບໃໝສູງສຸດເຖິງ 300.000 ຣີຢານ (ສະກຸນເງິນຂອງອາຣາບີຊາອຸດິດ-ກວ່າ 100 ລ້ານກີບ) ທ່ານນາງ ລາຕີຢາ ອານຊາລານ (Latifa al Shaalan) ສະມາຊິກສະພາທີ່ປຶກສາຊູຣາ ກ່າວກ່ຽວກັບຮ່າງກົດໝາຍສະບັບນີ້ວ່າ “ຈະສາມາດປິດຊ່ອງຫວ່າງດ້ານກົດໝາຍຂອງປະເທດ ແລະ ຈະມີອຳນາດໃນການສະກັດກັ້ນ ການລະເມີດສິດຂອງແມ່ຍິງ”.
ທີ່ເຊຍຣາອອນ: ປະເທດເຊຍຣາອອນນີ້ ຕັ້ງຢູ່ໃນທະວີບອາຟຣິກາຕາເວັນຕົກ ມີພົນລະເມືອງຈຳນວນ 7,5 ລ້ານຄົນ ເປັນປະເທດທີ່ປະເຊີນກັບບັນຫາການລວນລາມ ແລະ ຂົ່ມຂືນຝືນໃຈແມ່ຍິງຫຼາຍທີ່ສຸດ ດັ່ງນັ້ນ ທາງການຂອງປະເທດນີ້ ໃນຍຸກທີ່ທ່ານ ຈູລຽດ ມາດາບີໂອ ເປັນປະທານາທິບໍດີ ຈຶ່ງໄດ້ມີການເອົາຈິງເອົາຈັງ ໃນການແກ້ໄຂບັນຫາລະເມີດສິດທິທາງເພດຕໍ່ແມ່ຍິງ ໂດຍໄດ້ປະກາດໃຫ້ການຂົ່ມຂືນ ແລະ ເຫດການຮຸນແຮງທາງເພດ ເປັນບັນຫາສຸກເສີນລະດັບຊາດ ພ້ອມດຽວກັນນີ້ ກໍໄດ້ປັບປຸງກົດໝາຍອາຍາ ທີ່ມີການລົງໂທດໜັກຂຶ້ນ ສຳລັບຜູ້ຕິດຄະດີລະເມີດທາງເພດຕໍ່ເພດຍິງ ຕົວຢ່າງ ໃນກົດໝາຍສະບັບເກົ່ານັ້ນ ຜູ້ທີ່ມີເພດສຳພັນກັບເດັກທີ່ບໍ່ທັນບັນລຸນິຕິພາວະ ຈະຖືກລົງໂທດຕິດຄຸກສູງສຸດ 15 ປີ ແຕ່ກົດໝາຍສະບັບປັບປຸງໄດ້ເພີ່ມໂທດຕິດຄຸກເປັນຕະຫຼອດຊີວິດ ນອກຈາກນັ້ນ ທາງການຍັງໄດ້ກຳນົດການປິ່ນປົວບໍ່ເສຍຄ່າໃນໂຮງໝໍທຸກໆແຫ່ງ ສຳລັບຜູ້ຕົກເປັນເຫຍື່ອການໃຊ້ຄວາມຮຸນແຮງທາງເພດທຸກລາຍ ລັດຖະບານໄດ້ສ້າງຕັ້ງເຄືອຄ່າຍປະສານງານກັບທຸກພາກສ່ວນທີ່ກ່ຽວຂ້ອງ ເພື່ອເຮັດໜ້າທີ່ສະກັດກັ້ນການໃຊ້ຄວາມຮຸນແຮງທາງເພດໃນທຸກໆກໍລະນີ ແລະ ໃນທຸກຮູບການສະຖິຕິໃນປີ 2018 ຊີ້ໃຫ້ເຫັນວ່າ ເຊຍຣາອອນ ມີຄະດີຂົ່ມຂືນ ແລະ ທຳຮ້າຍຮ່າງກາຍແມ່ຍິງຢ່າງໜ້ອຍ 8.500 ຄະດີ ເພີ່ມຂຶ້ນເກືອບ 4.000 ຄະດີ ທຽບກັບປີກ່ອນໜ້ານັ້ນ.
ທີ່ມາເລເຊຍ-ອິນໂດເນເຊຍ: ໜັງສືພິມວຽງຈັນທາມ ສະບັບວັນທີ 18 ມັງກອນ 2018 ໂດຍອີງຕາມແຫຼ່ງຂ່າວ The Star (ເດິສະຕາ) ໄດ້ເປີດເຜີຍວ່າ ນັກຂ່າວ ຫຼື ນັກໜັງສືພິມເພດຍິງ ໃນມາເລເຊຍ ແລະ ອິນໂດເນເຊຍນັ້ນ ເຄີຍປະເຊີນກັບບັນຫາລວນລາມທາງເພດມາເປັນເວລານານແລ້ວ ແຕ່ບໍ່ມີໃຜຫົວຊາຍົກຂຶ້ນມາເປັນບັນຫາ ເພາະບໍ່ພຽງແຕ່ບໍ່ຖືວ່າເປັນເລື່ອງສຳຄັນ ແຕ່ຍັງຖືວ່າເປັນ “ເລື່ອງທຳມະດາ” ທີ່ພົວພັນກັບການເຄື່ອນໄຫວເອົາຂ່າວປະຈຳວັນຂອງນັກຂ່າວຍິງ ສຳນັກຂ່າວຂອງມາເລເຊຍ ແລະ ອິນໂດເນເຊຍ ທີ່ອອກມາເປີດເຜີຍເລື່ອງນີ້ ໄດ້ແກ່ ເກຣາກັນ ເມເດຍ ເມີເດກາ (Geramm ຂອງມາເລເຊຍ) ແລະ ອາລຽນ ຊີຊູນາລິດ ອິນເດເປັນເດັນ ຂອງອິນໂດເນເຊຍ ສ່ວນໜ່ວຍງານສື່ເອກະລາດເອຊຽນ “ກໍເຣສປົນເດັນ” (Asian Correspondent) ນັ້ນ ກໍໄດ້ລາຍງານກ່ຽວກັບເລື່ອງນີ້ວ່າ ບັນດານັກການເມືອງ ມີພຶດຕິກຳລວນລາມທາງເພດຕໍ່ນັກຂ່າວເພດຍິງ ຢູ່ມາເລເຊຍ ອິນໂດເນເຊຍ ແລະ ຟິລິບປິນ.