ວັນທີ 27 ກຸມພາ 2020 ເວລາປະມານ 11:30 ໂມງ ໄດ້ເກີດເຫດໄຟໄໝ້ປ່າຫຍ້າຢູ່ແຄມຂອງ ເຂດບ້ານສີຖານເໜືອ ເມືອງສີໂຄດຕະບອງ ນະຄອນຫຼວງວຽງຈັນ (ນວ) ເຊິ່ງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານອັກຄີໄພ ນວ ໄດ້ນຳກຳລັງ ພ້ອມລົດມອດໄຟ 3 ຄັນ ອອກໄປມອດໄຟຢູ່ສະຖານທີ່ເກີດເຫດເພື່ອບໍ່ໃຫ້ແຜ່ລາມໄປເຂດຊຸມຊົນ ເຊິ່ງການມອດໄຟຄັ້ງນີ້ມີຄວາມລຳບາກ ເພາະຈຸດເກີດເຫດເປັນປ່າຫຍ້າແຫ້ງມີເນື້ອທີ່ກວ້າງຂວາງ ແລະ ມີລົມພັດແຮງ ຍາກຕໍ່ການມອດໄຟ ຈາກເຫດການທີ່ເກີດຂຶ້ນຄັ້ງນີ້ເຈົ້າໜ້າທີ່ໃຊ້ເວລາປະມານ 3 ຊົ່ວໂມງຈຶ່ງສາມາດຄວບຄຸມເພີງໄດ້ ແລະ ຍັງຢູ່ໃນການເຝົ້າລະວັງຂອງເຈົ້າໜ້າທີ່ຕະຫຼອດ 24 ຊົ່ວໂມງ ໂຊກດີການເກີດອັກຄີໄພຄັ້ງນີ້ ບໍ່ມີຄົນເສຍຊີວິດ ແລະ ບາດ ເຈັບ ສ່ວນຜົນເສຍຫາຍມີແຕ່ໄໝ້ປ່າຫຍ້າເປັນບໍລິເວນກວ້າງ ປັດຈຸບັນເຈົ້າໜ້າທີ່ກຳລັງຢູ່ໃນຂັ້ນຕອນດຳເນີນການສືບສວນຫາສາເຫດທີ່ແທ້ຈິງຂອງການເກີດໄຟໄໝ້ຄັ້ງນີ້.
ນັບແຕ່ຕົ້ນປີ 2020 ເປັນຕົ້ນມາໄດ້ເກີດເຫດໄຟໄໝ້ປ່າຫຍ້າຢູ່ແຄມຂອງ 3 ຄັ້ງ ເພື່ອຮັບມືກັບເຫດການດັ່ງກ່າວທີ່ອາດເກີດຂຶ້ນໃນລະດູແລ້ງປີ 2020 ໃຫ້ໄດ້ຮັບຜົນດີ ທ່ານເຈົ້າຄອງ ນວ ໄດ້ອອກຄຳສັ່ງເລກທີ 001/ຈນວ ລົງວັນທີ 7 ກຸມພາ 2020 ໃຫ້ທຸກເມືອງ ທຸກບ້ານ ສຳນັກງານ-ອົງການ ບໍລິສັດ ແລະ ປະຊາຊົນຜູ້ທີ່ດຳລົງຊີວິດຢູ່ໃນ ນວ ຈົ່ງເພີ່ມທະວີຄວາມຮັບຜິດຊອບໃນການສະກັດກັ້ນ ຄວບຄຸມແລະ ແກ້ໄຂການຈູດຂີ້ເຫຍື້ອ ການຈູດປ່າ ແລະ ຈູດທົ່ງນາ ຮົ້ວສວນຊະຊາຍ ທັງໃນເຂດຕົວເມືອງ ແລະຊານເມືອງ ໃຫ້ໄດ້ຢ່າງທັນການ ເມື່ອມີເຫດການເກີດຂຶ້ນຢູ່ບ່ອນໃດໃຫ້ຫົວໜ້າອົງກອນຢູ່ບ່ອນນັ້ນເປັນຜູ້ຮັບຜິດຊອບຄວບຄຸມ ແລະ ໄກ່ເກ່ຍໂດຍກົງ.
ໃນເດືອນມັງກອນ 2020 ທົ່ວ ນວ ມີອັກຄີໄພເກີດຂຶ້ນທັງໝົດ 7 ຄັ້ງ ເປັນໄຟໄໝ້ນ້ອຍ ຜົນເສຍຫາຍມີເຮືອນກໍ່ຊັ້ນເຄິ່ງມຸງກະເບື້ອງ 1 ຫຼັງ ເຮືອນສອງຊັ້ນລຸ່ມກໍ່ ເທິງແອ້ມດ້ວຍໄມ້ ມຸງສັງກະສີ 2 ຫຼັງ ລົດຕູ້ຍີ່ຫໍ້ສະຕາແລັກ 12 ບ່ອນນັ່ງ 1 ຄັນ ລົດຈັກ 6 ຄັນ ໄໝ້ປ່າຫຍ້າ 2 ແຫ່ງ ຫໍພັກກຳມະກອນຍິງຂອງບໍລິສັດທີໂອລາວ 9 ຫ້ອງ ແລະ ມີຄົນເສຍຊີວິດ 1 ຄົນ ຈາກເຫດການໄຟໄໝ້ປ່າຫຍ້າຢູ່ເຂດຜາມໄຊແຄມຂອງດອນຈັນ ເມືອງຈັນທະບູລີ ໃນວັນທີ 30 ມັງກອນ 2020 ມູນຄ່າເສຍຫາຍເງິນກີບ 778.000.000 ກີບ ເງິນບາດ 110.000 ບາດ ແລະ ເງິນໂດລາສະຫະລັດ 13.000 ໂດລາ ສ່ວນສາເຫດທີ່ພາໃຫ້ເກີດອັກຄີໄພແມ່ນເກີດຍ້ອນໄຟຟ້າຊ໋ອດ 3 ລາຍ ຈູດທູບອູດຍຸງ 1 ລາຍ ຈູດປ່າຊະຊາຍ 2 ລາຍ ແລະ ລະບົບໄຟຟ້າຂອງລົດມີບັນຫາ 1 ລາຍ.