ຂໍ້ມູນຈາກສະຫະພັນບານເຕະແຫ່ງຊາດລາວ (ສຕລ) ແຈ້ງໃຫ້ຊາບເມື່ອບໍ່ດົນມານີ້ວ່າ: ສຕລ ກຽມຄັດເລືອກນັກກີລາ ຮຸ່ນອາຍຸບໍ່ເກີນ 19 ປີ (U-19) ຢູ່ແຂວງຈຳປາສັກ ຮອບທີ 2 ຈຶ່ງຂໍແຈ້ງໃຫ້ນັກກີລາ U-19 ທີ່ຖືກຄັດເລືອກ 35 ຄົນ ໃນວັນທີ 18-19 ມັງກອນ 2020 ຮັບຊາບ ແລະ ເຂົ້າຮ່ວມຄັດເລືອກຮອບທີ 2 ເຊິ່ງຈະມີຂຶ້ນວັນທີ 27 ມິຖຸນາ 2020 ເວລາ 15:00-17:00 ໂມງ ວັນທີ 28 ມິຖຸນາ 2020 ເວລາ 9:00-11:30 ໂມງ ຢູ່ສະໜາມກີລາແຂວງຈຳປາສັກ ໂດຍທ່ານ ຊູນດຣາມ ມູທຣີ ຫົວໜ້າຄູເຝິກທີມຊາດລາວຊຸດໃຫຍ່ ພ້ອມດ້ວຍຜູ້ຊ່ວຍຄູເຝິກຊາວສິງກະໂປ ຈະເປັນຜູ້ຄັດເລືອກ.
ສຳລັບຜູ້ທີ່ຜ່ານການຄັດເລືອກຮອບນີ້ ຈະໄດ້ເກັບຕົວເຝິກຊ້ອມຢູ່ ສຕລ ເພື່ອກຽມຄວາມພ້ອມເຂົ້າຮ່ວມແຂ່ງຂັນເຕະບານເຍົາວະຊົນຊາຍ U-19 ຊີງແຊັມອາຊີ ປະຈຳປີ 2020 ທີ່ປະເທດອຸດສະເບກິດສະຖານ ເປັນເຈົ້າພາບ ວັນທີ 14-31 ຕຸລາ 2020 ໃນນີ້ກຸ່ມ A ມີ ອຸດສະເບກິດສະຖານ ອິນໂດເນເຊຍ ອີຣານ ກຸ່ມ B ມີ ສ ເກົາຫຼີ ຍີ່ປຸ່ນ ອີຣັກ ບາເຣນ ກຸ່ມ C ມີ ຊາອຸດິອາຣາບີ ອົດສະຕຣາລີ ຫວຽດນາມ ລາວ ກຸ່ມ D ມີ ກາຕາ ທາຈິກິສະຖານ ມາເລເຊຍ ເຢເມນ ເຊິ່ງທີມທີ່ໄດ້ອັນດັບ 1-4 ຈະໄດ້ສິດເຂົ້າຮ່ວມແຂ່ງຂັນເຕະບານຊາຍ ຮຸ່ນອາຍຸບໍ່ເກີນ 20 ປີ (U-20) ຊີງແຊັມໂລກ ປະຈຳປີ 2021 ຢູ່ປະເທດອິນໂດເນເຊຍ.
ທີມຊາດລາວ U-19 ຜ່ານເຂົ້າຮອບສຸດທ້າຍ ການແຂ່ງຂັນເຕະບານຊາຍ ຊີງແຊັມອາຊີ 2020 ໃນຖານະອັນດັບ 2 ທີ່ມີຄະແນນດີທີ່ສຸດ (ຮອງແຊັມກຸ່ມ H) ຈາກການລົງສະໜາມ 3 ນັດ ຊະນະ 2 ນັດ ສະເໝີ 1 ນັດ ມີ 7 ຄະແນນ ໂດຍນັດທີ 1 ວັນທີ 6 ພະຈິກ 2019 ສະເໝີ ອົດສະຕຣາລີ 2-2 ປະຕູ ນັດທີ 2 ວັນທີ 8 ພະຈິກ 2019 ຊະນະ ໄຕ້ຫວັນ 2-1 ປະຕູ ນັດທີ 3 ວັນທີ 10 ພະຈິກ 2019 ຊະນະ ມາເກົາ 6-0 ປະຕູ.