ລະຫວ່າງທີ່ຫຼາຍຄົນກຳລັງເປັນຫ່ວງເປັນໄຍ ວຽກງານໃນພາກອຸດສາຫະກຳ ວ່າຈະຖືກຈັກກົນຍາດແຍ່ງວຽກຫັນມາອີກຄັ້ງ ລະບົບປັນຍາປະດິດ ຫຼື AI ອາດຈະເຂົ້າມາແທນທີ່ຕຳແໜ່ງງານຂອງພະນັກງານຫ້ອງການໃນເວລາອັນໃກ້ນີ້ແລ້ວ ໂດຍໃນການສຶກສາຈາກ Brookings Institute ຢືນຢັນເລີຍວ່າ AI ຈະສະເທືອນຕຳແໜ່ງງານທີ່ຕ້ອງໃຊ້ວຸດທິການສຶກສາລະດັບປະລິນຍາ ແລະ ໃນຕຳແໜ່ງທີ່ຈະໄດ້ຮັບຄ່າຈ່າງສູງໆອີກດ້ວຍ.
ທ່ານ ມາກ ມູໂຣ ນັກວິໄຈ ອາວຸໂສຈາກ Brookings Institute ບອກວ່າ ຈາກເດີມທີ່ຄິດວ່າ AI ຈະທົດແທນຕຳແໜ່ງງານຄ່າຈ້າງໜ້ອຍ ແຕ່ຕອນນີ້ ພົບວ່າປັນຍາປະດິດຈະສາມາດທົດແທນວຽກງານຂອງຄົນລາຍໄດ້ປານກາງຢ່າງພະນັກງານຫ້ອງການ ຊຶ່ງເປັນສິ່ງທີ່ໜ້າປະຫຼາດໃຈຢ່າງສູງ.
ລະບົບປັນຍາປະດິດ ອອກແບບມາເພື່ອເຮັດສິ່ງທີ່ຕ້ອງເພິ່ງພາມັນສະໝອງຂອງມະນຸດ ເຊັ່ນ ການວາງແຜນ ການຮຽນຮູ້ ການໃຫ້ເຫດຜົນ ແລະ ການແກ້ບັນຫາ ຊຶ່ງທີມວິໄຈຂອງ Brookings Institute ວິເຄາະ ອາຊີບທີ່ຈະໄດ້ຮັບຜົນກະທົບຈາກ AI ໂດຍກົງ ແລະ ພົບວ່າບໍ່ມີຕຳແໜ່ງງານໃດທີ່ລອດພົ້ນຈາກເງື້ອມມືຂອງ AI ໄປໄດ້.
ທ່ານ ມູໂຣ ຊີ້ແຈງວ່າ ຕຳແໜ່ງງານທີ່ໃຊ້ວຸດທິການສຶກສາປະລິນຍາຕີ 4 ປີ ຈະໄດ້ຮັບຜົນກະທົບຈາກ AI ຫຼາຍກວ່າຕຳແໜ່ງງານ ທີ່ໃຊ້ວຸດທິການສຶກສາລະດັບມັດທະຍົມປາຍເຖິງ 5 ເທົ່າຕົວ ຢ່າງຕຳແໜ່ງງານທີ່ມີຮູບແບບການເຮັດວຽກແບບຊັດເຈນຕາຍຕົວ ເຊັ່ນ ນັກວິເຄາະຕະຫຼາດ ຜູ້ຈັດການຝ່າຍຂາຍ ໂປຣແກຣມເມີ ນັກວິເຄາະຝ່າຍ ບໍລິຫານ ແລະ ວິສະວະກອນ ນັ້ນ ເປັນເພາະວ່າ AI ຖືກອອກແບບໃຫ້ມີທັກສະທີ່ຈຳເປັນຂອງມະນຸດຫ້ອງການ ໂດຍສະເພາະ ຕຳແໜ່ງຝ່າຍບໍລິຫານຢ່າງຜູ້ຈັດການ ແລະ ຝ່າຍວິເຄາະ ເຊິ່ງເປັນວຽກຖະໜັດຂອງ AI ໃນແງ່ຂອງການໃຊ້ທັກສະການຕັດສິນໃຈ ແລະ ການເພີ່ມປະສິດທິພາບໃນການເຮັດວຽກ.
ຈາກຄວາມທ້າທາຍທີ່ຄືບຄານເຂົ້າມາໃກ້ທຸກຂະນະ ທີມວິໄຈຂອງ Brookings Institute ແນະນຳວ່າ ການປັບຕົວເປັນສິ່ງຈຳເປັນຮີບດ່ວນສຳລັບມະນຸດໃນທຸກແຫ່ງຫົນ ໃນການເພີ່ມຄຸນຄ່າໃຫ້ກັບວຽກທີ່ເຮັດຢູ່.
ຂະນະທີ່ທ່ານ ເອນິມາ ອະນັນກຸມາຣ໌ ຫົວໜ້າຝ່າຍ Machine Learning ຂອງ Nvidia ກ່າວວ່າ ພະນັກງານທຸກຄົນຄວນປະເມີນອະນາຄົດຂອງບົດບາດໜ້າທີ່ ທີ່ໄດ້ຮັບໃນວຽກທີ່ເຮັດດ້ວຍ 3 ຄຳຖາມສຳຄັນຄື ວຽກທີ່ເຮັດຢູ່ ເປັນວຽກທີ່ເຮັດຊ້ຳຊາກຫຼືບໍ່ ? ມີຮູບແບບການປະເມີນຜົນງານທີ່ຊັດເຈນຫຼືບໍ່ ? ແລະ ວຽກທີ່ເຮັດກ່ຽວຂ້ອງກັບຂໍ້ມູນມະຫາສານ ເພື່ອໃຊ້ໃນການເຝິກຝົນ AI ດ້ວຍຫຼືບໍ່ ? ຖ້າຄຳຕອບທັງໝົດຄື “ແມ່ນ” ກໍຢືນຢັນໄດ້ວ່າ AI ໃກ້ຍາດແຍ່ງວຽກງານນີ້ຂອງທ່ານໄປໃນອີກບໍ່ເທົ່າໃດສິບປີຂ້າງໜ້າແນ່ນອນ.
ທ່ານ ອະນັນກຸມາຣ໌ ແນະນຳວ່າ ພະນັກງານທີ່ສ່ຽງຕໍ່ການຖືກ AI ຍາດແຍ່ງວຽກ ຄວນມຸ່ງເປົ້າໄປທີ່ຕຳແໜ່ງງານທີ່ຕ້ອງໃຊ້ຄວາມຄິດສ້າງສັນ ແລະ ສັນຊາດຕະຍານມະນຸດ ເພີ່ມທັກສະແບບ Soft Skill ແລະ ດ້ານເຕັກໂນໂລຊີຊຶ່ງໃຫ້ຮູ້ເທົ່າທັນ AI ຂະນະດຽວກັນ ຕ້ອງມີ growth mindset ໃນແງ່ຂອງການຍອມຮັບ ແລະ ປັບເພີ່ມການຮຽນຮູ້ທັກສະໃໝ່ ເພື່ອເປີດປະຕູແຫ່ງໂອກາດທີ່ຈະເຂົ້າມາໃນອະນາຄົດ.