ໂດຍປະຕິບັດຕາມແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ຄະນະພັກ-ຄະນະບັນຊາກອງບັນຊາການ ປກສ ເມືອງນາຊາຍທອງ ໄດ້ເອົາໃຈໃສ່ນຳພາກຳລັງປ້ອງກັນຄວາມສະຫງົບ ເມືອງສຸມໃສ່ວຽກງານການເມືອງ-ແນວຄິດໃຫ້ສະມາຊິກພັກ ພະນັກງານ ນັກຮົບພາຍໃນກົມກອງມີແນວຄິດຫຼັກໝັ້ນ ອຸ່ນອ່ຽງ ທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ-ລັດ ຄົ້ນຄວ້າເຊື່ອມຊຶມມະຕິຄຳສັ່ງ ຄຳແນະນຳຂອງພັກ ກົດໝາຍຂອງລັດ ຈັດຕັ້ງຜັນຂະຫຍາຍໃຫ້ນາຍ ແລະ ພົນຕຳຫຼວດໃນກຳລັງຂອງຕົນ ຮັບຮູ້ເຂົ້າໃຈແຈ້ງຕໍ່ແນວທາງປ່ຽນແປງໃໝ່ຢ່າງມີຫຼັກການຂອງພັກ.
ພັນໂທ ລຳພອນ ສີສົມບັດ ຫົວໜ້າກອງບັນຊາການ ປກສ ເມືອງນາຊາຍທອງ ນະຄອນຫຼວງວຽງຈັນ ໄດ້ຂຶ້ນລາຍງານຕໍ່ກອງປະຊຸມໃຫຍ່ຜູ້ແທນອົງຄະນະພັກ ເມືອງນາຊາຍທອງ ຄັ້ງທີ VII ຈັດຂຶ້ນເມື່ອບໍ່ດົນຜ່ານມານີ້ວ່າ: ຕະຫຼອດໄລຍະ 5 ປີຜ່ານມາ ກຳລັງ ປກສ ພວກເຮົາສາມາດຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ ແກ້ໄຂບັນດາໜໍ່ແໜງກໍ່ຄວາມບໍ່ສະຫງົບ ແລະ ມ້າງລາຍຄະດີຕ່າງໆໄດ້ທັງໝົດ 1.113 ເລື່ອງ ກັກຕົວ 1.630 ຄົນ ຍິງ 220 ຄົນ ເມື່ອທຽບໃສປີ 2014 ຜ່ານມາ ເຫັນວ່າສະພາບປາກົດການຫຍໍ້ທໍ້ ເພີ່ມຂຶ້ນ 380 ເລື່ອງ ສ້າງຄວາມເສຍຫາຍໃຫ້ແກ່ຊັບສິນຂອງລັດ ຂອງລວມໝູ່ ແລະ ຂອງພົນ ລະເມືອງທັງໝົດມີ: ເງິນກີບ 4,3 ຕື້ກີບ ເງິນບາດ 7.358.575 ບາດ ເງິນໂດລາ 197.731 ໂດລາ ເງິນກີບຫົວໜາມ 5 ກີບ ຄຳຮູບປະພັນ 132 ບາດ ແຫວນເພັດ 1 ວົງ ລົດໃຫຍ່ 6 ຄັນ ລົດຈັກ 276 ຄັນ ແລະ ເຄື່ອງອື່ນໆ ໃນນັ້ນ ສາມາດເກັບກູ້ ແລະ ສົ່ງຂອງກາງໃຫ້ບຸກຄົນ ນິຕິບຸກຄົນ ມີເງິນ 1,98 ຕຶ້ກີບ ເງິນບາດ 1.122.850 ບາດ ເງິນໂດລາ 151.274 ໂດລາ ຄຳຮູບປະພັນ 132 ບາດ ແຫວນເພັດ 1 ວົງ ລົດໃຫຍ່ 6 ຄັນ ລົດຈັກ 170 ຄັນ ແລະ ອື່ນໆຈຳນວນໜຶ່ງ.
ພ້ອມດຽວກັນນີ້ ຍັງໄດ້ສຶກສາອົມຮົມປະຊາຊົນທຸກຊັ້ນຄົນພາຍໃນເມືອງນາຊາຍທອງ ໃຫ້ຮັບຮູ້ ເຂົ້າໃຈ ແລະ ເຫັນແຈ້ງເຖິງຜົນຮ້າຍທີ່ເປັນອັນຕະລາຍຂອງຢາເສບຕິດ ໄປພ້ອມໆກັບການປຸກລະດົມຂົນຂວາຍປະຊາຊົນປະກອບສ່ວນ ແລະ ເຂົ້າຮ່ວມຂະບວນການວຽກງານຕ້ານ ສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍເລີ່ມຈາກຫົວໜ່ວຍ ຄອບຄົວເປັນຫຼັກ 5 ປີຜ່ານມາ ປກສ ເມືອງນາຊາຍທອງ ສາມາດດຳເນີນຄະດີຢາເສບຕິດໄດ້ 360 ລາຍ ກັກຕົວ 651 ຄົນ ຍິງ 53 ຄົນ ຢຶດຂອງກາງປະເພດຢາບ້າໄດ້ 243.660 ເມັດ ຢາໄອສ 1 ກິໂລກຣາມ ກັບ 6 ຖົງນ້ອຍ ອັນທີ່ພົ້ນເດັ່ນ ກອງບັນຊາການ ປກສ ເມືອງ ໄດ້ລົງມ້າງລາຍຄະດີຢາເສບຕິດລາຍໃຫຍ່ 2 ລາຍ ຄື: ລາຍທີໜຶ່ງ ໃນວັນທີ 6 ມີນາ 2019 ໄດ້ກັກຕົວທ້າວ ສົມບັດ ສິດທິລາດ ອາຍຸ 62 ປີ ອາຊີບກຳມະກອນ ຢູ່ບ້ານນາຄູນ ເມືອງນາຊາຍທອງ ຜູ້ກ່ຽວມີຂອງກາງປະເພດຢາບ້າໄວ້ຄອບຄອງ ຈຳນວນ 102 ມັດ ກັບ 3 ຖົງນ້ອຍ ເທົ່າກັບ 204.523 ເມັດ ຢາໄອສ 1 ກິໂລ ແລະ ຜົງຂາວ 1 ຖົງນ້ອຍ ພ້ອມລົດຟໍທູເນີ ທະບຽນ 6059 ຈຳນວນ 1 ຄັນ ແລະ ລາຍທີສອງ ໃນວັນທີ 8 ມີນາ 2020 ໄດ້ກັກຕົວທ້າວ ມົນຕີ ພົມມະວັນ ອາຍຸ 23 ປີ ຜູ້ທີສອງ ທ້າວ ຕ້ອມບີ້ ກົງວິຈິດ ອາຍຸ 28 ປີ ທັງສອງອາຊີບກຳມະກອນ ຢູ່ບ້ານນາບອນ ເມືອງຫີນບູນ ແຂວງຄຳມ່ວນ ຜູ້ທີສາມ ທ້າວ ອຸດົມໄຊ ໄຊວົງສາ ອາຍຸ 21 ປີ ອາຊີບນັກສຶກສາ ຢູ່ບ້ານນ້ຳສ້າງ ເມືອງປາກກະດິງ ແຂວງບໍລິຄຳໄຊ ພວກກ່ຽວທັງສາມມີຂອງກາງຢາບ້າ ຈຳນວນ 691 ມັດ ເທົ່າກັບ 1.382.000 ເມັດ ພ້ອມລົດຟໍທູເນີ ທະບຽນ 2222 ຈຳນວນ 1 ຄັນ ທັງສອງຄະດີດັ່ງກ່າວນີ້ ໄດ້ສົ່ງໃຫ້ກອງບັນຊາການ ປກສ ນະຄອນຫຼວງວຽງຈັນ ເປັນຜູ້ດຳເນີນຄະດີຕາມກົດໝາຍ.
ສຳລັບສະພາບການເກີດອຸບັດເຫດເກີດຂຶ້ນທັງໝົດ 482 ລາຍ ມີຄົນໄດ້ຮັບບາດເຈັບຈຳນວນ 839 ຄົນ ຍິງ 152 ຄົນ ໃນນັ້ນ ເສຍຊີວິດ 106 ຄົນ ຍິງ 27 ຄົນ ແລະ ສະພາບການເກີດອັກຄີໄພ ມີໄຟໃໝ້ເຮືອນທັງໝົດ 19 ຄັ້ງ.
ຕໍ່ກັບວຽກງານຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກອງບັນຊາການ ປກສ ເມືອງ ແມ່ນໄດ້ອີງໃສ່ 4 ແຜນງານໃຫຍ່ 37 ໂຄງການຂອງ ປກສ ນະຄອນຫຼວງວຽງຈັນ ໄດ້ສົມທົບກັບອຳນາດການປົກຄອງບ້ານ ກຸ່ມບ້ານ ເອົາໃຈໃສ່ຕິດຕາມກວດກາການເໜັງຕີງຂອງພົນລະເມືອງ ເປັນຕົ້ນແມ່ນຄົນເພີ່ມ ຄົນຫຼຸດ ຄົນມາພັກເຊົາຊົ່ວຄາວ ແລະ ຄົນບໍ່ມີໜ້າຊົ່ວຄາວ ຢ່າງເປັນປະຈຳ ເອົາໃຈໃສ່ກວດກາຄຸ້ມຄອງພົນລະເມືອງຫັນເຂົ້າສູ່ກົດໝາຍ ແລະ ລະບຽບການເທື່ອລະກ້າວ.