ທ່ານ ບຸນຖະໜອມ ສີຫາລາດ ຮອງປະທານ ແລະ ຜູ້ຈັດການທີມຂອງ ມາສເຕີ 7 ເອັຟຊີ ໃຫ້ສຳພາດເມື່ອວັນທີ 16 ມິຖຸນາ 2020 ວ່າ: ດັ່ງທີ່ຮູ້ກັນແລ້ວວ່າ ມາສເຕີ 7 ເອັຟຊີ ໄດ້ເກັບຕົວມາຕັ້ງແຕ່ເດືອນຕຸລາ 2019 ເປັນຕົ້ນມາ ແລະ ໄດ້ເຂົ້າຮ່ວມລາຍການ ເອເອັຟຊີ ຄັບ ຮອບເພລອ໊ອຟ ໃນຕົ້ນປີ 2020 ກ່ອນທີ່ຈະໃຫ້ນັກເຕະຊ້ອມຢູ່ເຮືອນຂອງໃຜລາວ ໃນໄລຍະໂຄວິດ-19 ນັບມາຮອດປັດຈຸບັນພວກເຮົາ ກໍໄດ້ເສີມທັບນັກເຕະດາວເດັ່ນ ທີ່ຍ້າມມາຈາກສະໂມສອນ ລາວໂຕໂຢຕ້າ 3 ຄົນ ສະໂມສອນກະຊວງປ້ອງກັນຄວາມສະຫງົບ ຫຼື ປກສ 2 ຄົນ ສະໂມສອນ ຊ້າງນ້ອຍ 2 ຄົນ ກອງທັບ 1 ຄົນ ແລະ ນັກເຕະໃໝ່ຈາກຍີ່ປຸ່ນ 2 ຄົນ ໜຶ່ງໃນນັ້ນ ກໍມີ Kosuke YAMAZIDA ແລະ ເປົ້າໝາຍ ຫວັງຈະສ້າງຜົນງານຄັ້ງປະຫວັດສາດ ໃນການຍາດເອົາຂັນແຊັມລີກສູງສຸດຂອງ ສປປ ລາວ ຫຼື ລາຍການ ເປບຊີ ລາວລີກ 1 ລະດູການນີ້ ມາໃຫ້ໄດ້.
ແຕ່ເຖິງຢ່າງໃດກໍດີ ພວກເຮົາກໍຈະພະຍາຍາມຄ່ອຍໆພັດທະນາຕໍ່ໆໄປ ເພື່ອສົ່ງເສີມໃຫ້ທີມ ກ້າວສູ່ການເປັນທີມອາຊີບໃຫ້ໄດ້ຢ່າງເຕັມຕົວ ເພື່ອປະກອບສ່ວນເຮັດໃຫ້ວົງການບານເຕະລາວ ມີທ່າແຮງທີ່ໂດດເດັ່ນໃນລະດັບສາກົນ ສ່ວນຄູ່ແຂ່ງຂັນໃນປີນີ້ ກໍຍົກໃຫ້ທຸກໆທີມ ເພາະແຕ່ລະທີມມີການເສີມນັກເຕະກັນຢ່າງຫຼວງຫຼາຍ ແລະ ກໍມີສັກກະຍະພາບໃກ້ຄຽງກັນ ໂດຍສະເພາະ ແຊັມເກົ່າ ລາວໂຕໂຢຕ້າ ແຊັມ 4 ສະໄໝຊ້ອນ ປີນີ້ກໍຍັງມີຄວາມໜ້າຢ້ານຫຼາຍ ເພາະເປັນສະໂມສອນທີ່ມີຄວາມພຽບພ້ອມຫຼາຍກວ່າ ມາສເຕີ 7 ຫຼາຍດ້ານ.
ສຳລັບ ມາສເຕີ 7 ເອັຟຊີ ຈະໃຊ້ນັກເຕະທັງໝົດ 22 ຄົນ (ນັກເຕະຕ່າງຊາດ 4 ຄົນ) ເຂົ້າຮ່ວມ ລາວລີກ 1 ລະດູການ 2020 ສ່ວນຜົນງານປີ 2019 ລົງສະໜາມ 15 ນັດຊະນະ 9 ສະເໝີ 2 ແລະ ເສຍ 4 ນັດ ມີ 29 ຄະແນນ ໂດຍຕາມຫຼັງແຊັມ ລາວໂຕໂຢຕ້າ ຢູ່ 8 ຄະແນນ ໄດ້ພຽງຮອງແຊັມໄປຄອງ ແລະ ຫຼ້າສຸດ ກໍໄດ້ເຂົ້າຮ່ວມແຂ່ງຂັນຮອບເພລອ໊ອຟ ລາຍການ ເອ ເອັຟຊີ ຄັບ 2020 ເປັນຄັ້ງທຳອິດ ສ່ວນນັດປະເດີມສະໜາມ ມາສເຕີ 7 ຈະໄດ້ພົບກັບຄູ່ປັບເກົ່າຕະຫຼອດການ ແຊັມ 4 ສະໄໝ ສະໂມສອນ ລາວໂຕໂຢຕ້າ ໃນວັນທີ 11 ກໍລະກົດ 2020 ນີ້ ທີ່ສະໜາມກີລາແຫ່ງຊາດ (ຫຼັກ 16).