ມື້ກ່ອນນີ້ ໄດ້ຍົກເອົາບັນຫາເລື່ອງປ້ຳໄມ້ຄ້າງປະໄວ້ ແລ້ວໄມ້ລົ້ມລົງທັບຄົນ ຫຼື ສັດໄດ້ຮັບບາດເຈັບ ຫຼື ເສຍຊີວິດ ເຈົ້າຂອງຜູ້ປ້ຳ ຜູ້ຟັນ ຜູ້ບັກໄມ້ນັ້ນໄວ້ຕ້ອງຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນກັບຄົນ ຫຼື ສັດນັ້ນ ຍ້ອນຂາດຄວາມຮອບຄອບຂອງຜູ້ເປັນເຈົ້າຂອງ ຊຶ່ງກົດໝາຍໄດ້ກຳນົດວ່າ ບຸກຄົນດັ່ງກ່າວຕ້ອງຮັບຜິດຊອບ ມື້ນີ້ກໍເປັນອີກເລື່ອງໜຶ່ງ ຊຶ່ງມັນກໍມັກເກີດຂຶ້ນເລື້ອຍໆໃນສັງຄົມເຮົາ ໂດຍສະເພາະ ຄົນຕົກໜອງເສຍຊີວິດ ສັດຕົກສ້າງຕາຍ ຍ້ອນຄວາມບໍ່ລະມັດລະວັງ ຍ້ອນການເມີນເສີຍ ຍ້ອນຂາດມາດຕະການໃນການປ້ອງກັນເຫດໄວ້ລ່ວງໜ້າ ເຊັ່ນ: ການຂຸດໜອງ ຂຸດຄອງ ຂຸດສະ ຫຼື ຂຸດນ້ຳສ້າງ ໂດຍທີ່ບໍ່ມີຮົ້ວອ້ອມ ຮົ້ວກັນ ຊຶ່ງຈະມີຄວາມສ່ຽງທີ່ຈະພາໃຫ້ເກີດຄວາມເສຍຫາຍແກ່ຊີວິດ ແລະ ຊັບສິນຂອງບຸກຄົນອື່ນ ການອ້ອມຮົ້ວເຮັດຮາວ ແມ່ນສ່ວນໜຶ່ງໃນການປ້ອງກັນການລະເມີດສິດໃນກຳມະສິດໃນຕອນດິນ ເຄື່ອງປູກ-ຂອງຝັງ ພືດພັນ ຜົນລະໄມ້ ຊຶ່ງຕົນເປັນເຈົ້າກຳມະສິດນັ້ນ ອັນທີ 2 ການອ້ອມຮົ້ວຍັງສະແດງເຖິງການມີສິດທີ່ຈະທັກທ້ວງບຸກຄົນໃດກໍຕາມ ຫາກໄດ້ມີການລະເມີດສິດ ເຊັ່ນ ການຫຍັບຍ້າຍຫຼັກແດນ ການເຂົ້າໄປໃນສະຖານທີ່ດັ່ງກ່າວເພື່ອລັກຊັບ ລັກສິ່ງຂອງວັດຖຸ ຜູ້ເປັນເຈົ້າຂອງກໍມີສິດທີ່ຈະທຳການ ຮ້ອງຟ້ອງ ຫຼື ຂໍໃຫ້ໃຊ້ແທນຄວາມເສຍຫາຍທີ່ເກີດຂຶ້ນນັ້ນ ອັນທີ 3 ແມ່ນເພື່ອປ້ອງກັນຄວາມເສຍຫາຍທີ່ອາດຈະເກີດຂຶ້ນແກ່ຄົນ ຫຼື ສັດຕ່າງໆ ແຕ່ໃນທາງກົງກັນຂ້າມເຖິງແມ່ນວ່າໜອງດັ່ງກ່າວ ນ້ຳສ້າງດັ່ງກ່າວຖືກຮັບຮອງວ່າເປັນກຳມະສິດ ໂດຍຖືກຕ້ອງຕາມກົດໝາຍກໍຕາມ ແຕ່ຖ້າຫາກບໍ່ອ້ອມຮົ້ວ ບໍ່ອ້ອມຮາວໄວ້ ເມື່ອຄົນໄປຕົກ ໄປລົ້ມ ໄປຕາຍໃນໜອງ ໃນສະ ໃນບໍ່ນ້ຳສ້າງຂອງຕົນ ຄວາມຮັບຜິດຊອບກໍຈະເກີດຂຶ້ນໃນທັນທີທັນໃດຕໍ່ຜູ້ເປັນເຈົ້າຂອງ ຜູ້ເປັນເຈົ້າກຳມະສິດໃນຊັບສິ່ງຂອງເຫຼົ່ານັ້ນ.
ຕາມກົດໝາຍວ່າດ້ວຍຂໍ້ຜູກພັນນອກສັນຍາແລ້ວ ໄດ້ກຳນົດວ່າຄວາມເສຍຫາຍທີ່ເກີດຂຶ້ນຈາກວັດຖຸສິ່ງຂອງໃດໜຶ່ງ ຍ້ອນຄວາມຜິດຂອງຜູ້ເປັນເຈົ້າຂອງ ຫຼື ຜູ້ຄອບຄອງນັ້ນ ຜູ້ກ່ຽວຕ້ອງຮັບຜິດຊອບໃຊ້ແທນຄ່າເສຍຫາຍດັ່ງກ່າວ ໃນທາງກົງກັນຂ້າມ ຫາກຜູ້ເປັນເຈົ້າກຳມະສິດໃນຊັບສິ່ງຂອງນັ້ນ ໄດ້ນຳໃຊ້ມາດຕະການປົກປ້ອງເປັນຢ່າງດີແລ້ວ ແຕ່ຫາກເກີດຄວາມເສຍຫາຍແກ່ຄົນ ຫຼື ສັດນັ້ນ ຜູ້ກ່ຽວກໍຈະບໍ່ມີຄວາມຮັບຜິດຊອບແຕ່ປະການໃດ ເຊັ່ນ: ໜອງມີຮົ້ວອ້ອມ ນ້ຳສ້າງມີຮົ້ວກັ້ນໄວ້ຢ່າງໜາແໜ້ນຄົນ ຫາກປີນຮົ້ວໄປຕົກນ້ຳໜອງຕາຍ ຫຼື ສັດຫາກບຸເຂົ້າຕົກສ້າງຕາຍ ກົດໝາຍຈຶ່ງຍົກເວັ້ນຄວາມຮັບຜິດຊອບຕໍ່ຜູ້ເປັນເຈົ້າກຳມະສິດໃນຊັບສິ່ງຂອງນັ້ນ ເນື່ອງຈາກວ່າຄວາມຜິດບໍ່ໄດ້ເກີດຈາກຜູ້ກ່ຽວ ແຕ່ຫາກເກີດຈາກຄວາມຜິດຂອງຜູ້ເສຍຫາຍເອງ ຈຶ່ງຕ້ອງໄດ້ຮັບຜິດຊອບດ້ວຍຕົນເອງ ໝາຍຄວາມວ່າບໍ່ມີຜູ້ກະທຳຜິດ ຊຶ່ງກໍບໍ່ແຕກຕ່າງຫຍັງກັບການເກີດອຸບັດເຫດ ຊຶ່ງເກີດຈາກຄວາມຜິດຂອງຜູ້ຂັບຂີ່ເອງ ຕົວຢ່າງ ທ້າວ ຫ້າວ ຂັບຂີ່ລົດດ້ວຍຄວາມໄວແລ່ນໄປຕຳກັບຕົ້ນໄມ້ ຫຼື ເສົາໄຟເຍືອງທາງ ເຮັດໃຫ້ຜູ້ກ່ຽວເສຍຊີວິດ ຈະເອົາຄວາມຜິດນຳໃຜກໍບໍ່ໄດ້?.
ໂດຍ: ໄມ້ງັດ