ໄຊທານີ ເຖິງແມ່ນວ່າບໍ່ໄດ້ຢູ່ໃນຈຳນວນ 4 ເມືອງໃນ ແຕ່ການສັນຈອນກໍຂ້ອນຂ້າງຫຍຸ້ງຍາກສັບສົນ ໂດຍສະເພາະ ໃນໂມງຮີບດ່ວນ ທີ່ສັງເກດເຫັນໄດ້ວ່າມີຫຼາຍຈຸດເກີດການສັນຈອນຕິດຂັດ ສ້າງຄວາມຫຍຸ້ງຍາກໃຫ້ກັບຜູ້ໃຊ້ລົດໃຊ້ຖະໜົນ ຈາກສະພາບການທີ່ເກີດຂຶ້ນ ທາງເຈົ້າໜ້າທີ່ຕຳຫຼວດຈະລາຈອນເມືອງ ໄດ້ເອົາໃຈໃສ່ໃນການແກ້ໄຂບັນຫາດັ່ງກ່າວ ໂດຍໄດ້ວາງກຳລັງປະຈຳຈຸດຕ່າງໆ ເພື່ອໃຫ້ການສັນຈອນມີຄວາມເປັນລະບຽບຮຽບຮ້ອຍ ກໍຄື ສ້າງຄວາມສະດວກສະບາຍໃຫ້ຜູ້ໃຊ້ລົດໃຊ້ຖະໜົນ.
ທ່ານ ພັນຕີ ສຸນີ ໄຊຍະວົງ ຫົວໜ້າກອງຮ້ອຍຈະລາຈອນ ເມືອງໄຊທານີ ນະຄອນຫຼວງວຽງຈັນ ໃຫ້ສຳພາດຕໍ່ນັກຂ່າວ ປກສ ໃນອາທິດຜ່ານມາວ່າ: ເຖິງແມ່ນວ່າສະພາບລົດຕິດອັ່ງອໍຕາມເສັ້ນທາງຕ່າງໆຂອງເມືອງໃນຊົ່ວໂມງຮີບດ່ວນ ເລີ່ມແຕ່ 7:30-9:00 ໂມງ ແລະ 16:00-18:00 ໂມງກໍຕາມ ແຕ່ເຈົ້າໜ້າທີ່ຕຳຫຼວດຈະລາຈອນ ກອງຮ້ອຍຈະລາຈອນ ປກສ ເມືອງໄຊທານີ ຍັງໄດ້ເອົາໃຈໃສ່ປະຕິບັດໜ້າທີ່ຢ່າງເຂັ້ມງວດ ເພື່ອລະບາຍການສັນຈອນ ແນໃສ່ອຳນວຍຄວາມສະດວກໃຫ້ກັບຜູ້ໃຊ້ລົດ-ໃຊ້ຖະໜົນ ໃຫ້ມີຄວາມສະດວກ ແລະ ຄ່ອງຕົວຫຼາຍຂຶ້ນກວ່າເກົ່າ ແຕ່ເຖິງຢ່າງໃດກໍຕາມ ບັນຫາລົດຕິດຢູ່ຈຸດຕ່າງໆຍັງເກີດມີຢູ່ ເນື່ອງຈາກສະພາບເສັ້ນທາງຍັງບໍ່ສາມາດຕອບສະໜອງກັບພາຫະນະ ເຮັດໃຫ້ຢູ່ຕາມຈຸດ 3 ແຍກ 4 ແຍກ ເກີດບັນຫາລົດຕິດອັ່ງອໍ ຍ້ອນລົດລົ້ນທາງ ແລະ ອີກຢ່າງກໍເກີດຈາກການລະເມີດລະບຽບການສັນຈອນຂອງນັກຂັບຂີ່ເອງ ທີ່ຈອດລົດຊະຊາຍຕາມແຄມທາງ ຂັບຂີ່ບໍ່ຖືກຊ່ອງທາງຈະລາຈອນ ລ່ວງປ້າຍຫ້າມ ໄຟອຳນາດ ແລະ ອື່ນໆ ເຮັດໃຫ້ການສັນຈອນບໍ່ເປັນລະບຽບທີ່ກໍ່ໃຫ້ເກີດລົດຕິດຕາມມາ.
ຈາກສະພາບການດັ່ງກ່າວນີ້ ກອງຮ້ອຍຈະລາຈອນເມືອງໄຊທານີ ໄດ້ສຸມກຳລັງລົງປະຈຳການ ເພື່ອອຳນວຍຄວາມສະດວກໃຫ້ກັບຜູ້ຂັບຂີ່ເຖິງ 15 ຈຸດ ໃນນີ້ ຈຸດໂຮງຮຽນມີ 7 ຈຸດ ແລະ ຈຸດ 3-4 ແຍກ ມີ 8 ຈຸດ ສຳລັບຈຸດທີ່ສັບສົນ ແລະ ມີລົດແອອັດ ແມ່ນຢູ່ 4 ຈຸດ ເປັນຕົ້ນ ຈຸດໄຟອຳນາດດອນໜູນ ສາເຫດຍ້ອນຈຸດດັ່ງກ່າວສາມາດລ້ຽວຂວາ ລ້ຽວຊ້າຍ ປ່ຽນທິດທາງກັບ ຫຼືໄປຊື່ໄດ້ ເຮັດໃຫ້ບາງຄົນມັກງ່າຍຂັບຂີ່ບໍ່ຖືກຊ່ອງທາງຈະລາຈອນ ເຮັດໃຫ້ກີດຂວາງການສັນຈອນ ແລະ ເກີດລົດຕິດອັ່ງອໍ ນອກນັ້ນ ກໍຍັງມີຢູ່ຈຸດທາງລົງໂຮງຮຽນສາທິດ ທີ່ເປັນທາງ 3 ແຍກບໍ່ສະເໝີກັນ ເຖິງແມ່ນວ່າຈະມີເຈົ້າໜ້າທີ່ປະຈຳອຳນວຍຄວາມສະດວກໃຫ້ກໍຕາມ ແຕ່ດ້ວຍຍານພາຫະນະມີຈຳນວນຫຼາຍເສັ້ນທາງມີຈຳນວນໜ້ອຍກວ່າ ຈຶ່ງເຮັດໃຫ້ຈຸດດັ່ງກ່າວແອອັດ.
ດັ່ງນັ້ນ ເພື່ອແກ້ໄຂບັນຫາລົດຕິດໃຫ້ຫຼຸດໜ້ອຍຖອຍລົງ ເຮັດໃຫ້ການສັນຈອນມີຄວາມສະດວກສະບາຍ ໃນຕໍ່ໜ້າຈະໄດ້ສືບຕໍ່ລະບາຍການສັນຈອນຢູ່ຕາມຈຸດ ທີ່ໄດ້ກຳນົດໄວ້ໃນໂມງຮີບດ່ວນ ໂດຍສະເພາະ ໃນໂມງເຂົ້າ-ເລີກການ ເພື່ອໃຫ້ພໍ່ແມ່ປະຊາຊົນສະດວກຫຼາຍຂຶ້ນ ໄປຄຽງຄູ່ກັນນັ້ນ ຍັງຈະໄດ້ຈະສືບຕໍ່ສຸມໃສ່ການກວດກາຍານພາຫະນະ ໂດຍອອກຕັ້ງດ່ານ ເພື່ອກວດກາເອກະສານລົດ ລົດບໍ່ຕິດປ້າຍ ປ້າຍຂາດ ບໍ່ເສຍຄ່າທຳນຽມທາງ ເຕັກນິກບໍ່ໄດ້ມາດຕະຖານ ຈັດສັນລົດທີ່ຈອດຊະຊາຍ ແລ່ນລົດບໍ່ຖືກທິດທາງການສັນຈອນ ລ່ວງປ້າຍຫ້າມ ພ້ອມດຽວກັນນີ້ ຍັງຈະສືບຕໍ່ໂຄສະນາລະບຽບຈະລາຈອນຢູ່ບັນດາໂຮງຮຽນ ໂຮງຈັກ ໂຮງງານ ກຸ່ມບ້ານ ແລະ ສະຖານທີ່ຊຸມຊົນ ຕິດພັນກັບການໂຄສະນາຜ່ານສື່ຕ່າງໆ ເພື່ອເຮັດໃຫ້ນັກຂັບຂີ່ຮັບຮູ້ ແລະ ເຂົ້າໃຈຕໍ່ກົດລະບຽບຈະລາຈອນ ແລ້ວນຳໄປໝູນໃຊ້ໃນເວລາຂັບຂີ່ຕົວຈິງ.