ທ່ານ ປອ ສົມເພັດ ຣັດຕະສິມ ປະທານບໍລິຫານສະຖາບັນຣັດຕະນະ ບໍລິຫານທຸລະກິດ ໃຫ້ສຳພາດວັນທີ 9 ມິຖຸນາ 2020 ວ່າ: ສະຖາບັນຣັດຕະນະບໍລິຫານທຸລະກິດ ໄດ້ໂຈະການຮຽນ?ການສອນຊົ່ວຄາວ ເພື່ອປະຕິບັດຕາມແຈ້ງການຂອງຂັ້ນເທິງ ແລະ ໂດຍອີງໃສ່ບົດຮຽນຂອງຕ່າງປະເທດ ສະຖາບັນໄດ້ກຽມຄວາມພ້ອມມາກ່ອນໜ້ານີ້ ໂດຍໄດ້ຈັດປະຖົມນິເທດໃຫ້ຄູ ແລະ ນັກສຶກສາ ເພື່ອເຮັດໃຫ້ການຮຽນ?ການສອນຮຽນຕໍ່ເນື່ອງ ຮຽນຕາມຊົ່ວໂມງຄືເກົ່າ ໃຫ້ນັກສຶກສາຮຽນຢູ່ເຮືອນແບບອອນລາຍ.
ຜ່ານການຈັດຕັ້ງປະຕິບັດໄລຍະໜຶ່ງ ກໍພົບບັນຫາຍ້ອນນັກສຶກສາຕ່າງແຂວງກັບເມືອບ້ານ ບາງເຂດອິນເຕີເນັດບໍ່ສະດວກ ເຮັດໃຫ້ການຮຽນບໍ່ມີປະສິດທິຜົນ ຈຶ່ງໄດ້ຄົ້ນຄວ້າໂຈະໄວ້ກ່ອນລໍຖ້າກະຊວງສຶກສາທິການ ແລະ ກີລາ ມີແຈ້ງການອອກມາວັນທີ 2 ມິຖຸນາ 2020 ຈຶ່ງໄດ້ປະຕິບັດການຮຽນ?ການສອນ ນັກສຶກສາຊັ້ນສູງປີສຸດທ້າຍ ແຕ່ກ່ອນຈະເປີດຮຽນໄດ້ປະສານກັບພາກສ່ວນກ່ຽວຂ້ອງມາພົ່ນຢາຂ້າເຊື້ອຢູ່ສະຖາບັນ ກະກຽມຄວາມພ້ອມດ້ານເຄື່ອງວັດແທກອຸນຫະພູມ ເຈວລ້າງມື ສະບູລ້າງມື ແລະ ຜ້າອັດປາກ?ດັງ ສຳລັບແຈກຢາຍໃຫ້ນັກສຶກສາ ໂດຍບໍ່ໄດ້ເສຍຄ່າ ເວລາຄູ?ອາຈານ ແລະ ນັກສຶກສາເຂົ້າມາສະຖາບັນຕ້ອງປະຕິບັດຕາມຂັ້ນຕອນ ເປັນຕົ້ນ ວັດແທກອຸນຫະພູມ ລ້າງມືດ້ວຍເຈວ ໃສ່ຜ້າອັດປາກ?ດັງ ເວລາຮຽນນັ່ງຕ້ອງໃຫ້ຫ່າງກັນ ເວລາພັກຜ່ອນບໍ່ໃຫ້ອອກໄປຂ້າງນອກ ເພື່ອຄວາມປອດໄພ ແລະ ສ້າງຄວາມເຊື່ອໝັ້ນໃຫ້ຜູ້ປົກຄອງ ສັງຄົມ ແລະ ການນຳພັກ?ລັດ.
ນັບແຕ່ເປີດຮຽນ ວັນທີ 2 ມິຖຸນາເປັນຕົ້ນມາ ນັກສຶກສາຊັ້ນສູງປີສຸດທ້າຍ 300 ກວ່າຄົນ ມາຮຽນພຽງແຕ່ 100 ກວ່າຄົນ ສ່ວນຜູ້ທີ່ຍັງບໍ່ມາຮຽນ ສະຖາບັນຍັງບໍ່ຮູ້ສາເຫດ ສຳລັບການຮຽນປົກກະຕິທຸກຊັ້ນ ເລີ່ມວັນທີ 15 ມິຖຸນາ 2020 ປັດຈຸບັນໄດ້ກຽມຄວາມພ້ອມທຸກດ້ານ ເປັນຕົ້ນ ອຸປະກອນເພື່ອຮອງຮັບນັກສຶກສາປະລິນຍາຕີ ປີ 1 ແລະ ປະລິນຍາຕີຕໍ່ເນື່ອງ 1.700 ກວ່າຄົນ ພະນັກງານ ແລະ ຄູ?ອາຈານ 160 ກວ່າຄົນ ຫ້ອງຮຽນ 70 ຫ້ອງ ແບ່ງເປັນ 3 ພາກຄື: ພາກເຊົ້າ ພາກບ່າຍ ແລະ ພາກຄ່ຳ ໂອກາດນີ້ ກໍຂໍຮຽກຮ້ອງມາຍັງຄູ?ອາຈານ ໃຫ້ແນະນຳນັກສຶກສາຮັກສາສຸຂະພາບຕົນເອງ ສຳລັບນັກສຶກສາທີ່ໄດ້ຮັບຂໍ້ມູນຂ່າວແລ້ວ ກໍໃຫ້ປະຕິບັດຕາມຫຼັກສູດ ການຮຽນ?ການສອນ ສົກ 2019?2020 ແລະ ຝາກເຖິງນັກສຶກສາທີ່ກັບບ້ານ ໂດຍສະເພາະ ເຂດຫ່າງໄກສອກຫຼີກໃຫ້ກັບຄືນມາສະເໜີຕົວ ຊ້າສຸດບໍ່ໃຫ້ກາຍວັນທີ 13 ມິຖຸນາ 2020 ແຕ່ຖ້ານັກສຶກສາມາຮຽນບໍ່ທັນ ສະຖາບັນກໍຈະຈັດຫ້ອງພິເສດເປັນກຸ່ມຍ່ອຍ ຈັດຕັ້ງຄູ?ອາຈານ ແລະ ນັກສຶກສາຜູ້ຮຽນເກ່ງເຂົ້າສອນ ເນື່ອງຈາກພວກເຮົາມີໂຄງການເພື່ອນຊ່ວຍເພື່ອນ (ຮຽນໂດຍບໍ່ເສຍຄ່າ) ທີ່ໄດ້ປະຕິບັດມາຫຼາຍປີແລ້ວ ເປົ້າໝາຍຂອງສະຖາບັນຈະບໍ່ຖິ້ມນັກສຶກສາ ແຕ່ສຳຄັນນັກສຶກສາຕ້ອງໃຫ້ການຮ່ວມມື ແລະ ຈິງໃຈນຳກັນ ເພາະທຸກບັນຫາສາມາດແກ້ໄຂໄດ້.
