ສື່ມວນຊົນຈາກສູນກາງ ສຳເລັດການເຄື່ອນໄຫວຕິດຕາມ ແລະ ເກັບກໍາຂໍ້ມູນຂ່າວສານກ່ຽວກັບ ວຽກງານການສັກວັກຊີນປ້ອງກັນໂຄວິດ-19 ແລະ ການນຳໃຊ້ອຸປະກອນໂທລະໂຄ່ງ LCD ລຳໂພງ ທີ່ໄດ້ຮັບການຊ່ວຍເຫຼືອຈາກອົງການ Unicef ເພື່ອລາຍງານຂ່າວກ່ຽວກັບປະສິດທິຜົນຂອງການນຳໃຊ້ອຸປະກອນດັ່ງກ່າວຢູ່ສາມແຂວງ.
ການລົງເຄື່ອນໄຫວຄັ້ງນີ້ ມີຂຶ້ນລະຫວ່າງວັນທີ 11-17 ກັນຍາ 2022 ເຊິ່ງສື່ມສນຊົນຈາກສູນກາງປະກອບມີ ໂທລະພາບ ປກສ ໜັງສືພິມຂ່າວສານປະເທດລາວ ໜັງສືພິມວຽງຈັນໃໝ່ ວິທະຍຸນະຄອນ ຫຼວງວຽງຈັນ ສູນການແນວລາວສ້າງຊາດ ແລະ ໜັງສືພິມເສດຖະກິດ-ສັງຄົມ ເຊິ່ງການລົງເຄື່ອນໄຫວເຮັດວຽກຄັ້ງນີ້ ແມ່ນໄດ້ເຮັດວຽກຢູ່ແຂວງສາລະວັນ ສະຫວັນນະເຂດ ແລະ ແຂວງຄຳມ່ວນ ໂດຍໄດ້ຮັບການສະໜັບສະໜູນຈາກ ອົງການ Unicef.
ທ່ານ ນາງ ນິນລະນາ ພົມມະຈັນ ວິຊາການຈາກສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ ໃຫ້ສຳພາດວ່າ: ການລົງເຄື່ອນໄຫວຄັ້ງນີ້ ສື່ມວນຊົນພວກເຮົາ ໄດ້ລົງຕິດຕາມນັບແຕ່ນຳພະແນກສາທາລະນະສຸກແຂວງ ຂະແໜງອະນາໄມ ເມືອງ ແລະ ບ້ານເປົ້າໝາຍ ເພື່ອປະກອບສ່ວນໃນການປຸກລະດົມໃຫ້ຜູ້ທີ່ຢູ່ໃນເກນອາຍຸເຂົ້າຮ່ວມຂະບວນສັກວັກຊີນປ້ອງກັນໂຄວິດ-19 ແລະ ວັກຊີນຮອບທົ່ວໄປ ທັງນີກໍເພື່ອໃຫ້ສາມາດບັນລຸໂຕເລກຄາດໝາຍທີ່ວາງໄວ້ ພ້ອມທັງຕິດຕາມການແຈກຢາຍ ການນຳໃຊ້ອຸປະກອບໃນການໂຄສະນາສຸຂະສຶກສາຜ່ານອຸປະກອບທີ່ໄດ້ຮັບການຊ່ວຍເຫຼືອຈາກ ອົງການ Unicef ທີ່ເປັນຊ່ອງທາງໃນການໂຄສະນາສ້າງຄວາມເຊື່ອໝັ້ນກ່ຽວກັບວັກຊີນໃຫ້ກັບພໍ່ແມ່ນປະຊາຊົນ.
ຜ່ານການລົງຕິດຕາມຕົວຈິງເຫັນວ່າເຄື່ອນທີ່ໄດ້ຮັບການສະໜັບສະໜູນຈາກອົງການ Unicef ໂດຍຜ່ານ ສູນສື່ສານເພື່ອສຸຂະພາບ ແລະ ສຸຂະສຶກສາ ແມ່ນໄດ້ແຈກຢາຍນັບແຕ່ຂັ້ນແຂວງ ເມືອງ ໂຮງໝໍນ້ອຍ ແລະ ບ້ານ ເຊິ່ງເຫັນໄດ້ວ່າ ບາງບ້ານກໍໄດ້ມີການຕິກຕັ້ງ ນຳໃຊ້ເຂົ້າໃນວຽກງານຕົວຈິງແລ້ວ.
ທ່ານ ນາງ ນິນລະນາ ພົມມະຈັນ ກ່າວຕື່ມວ່າ: ຢ່າງໃດກໍຕາມ ຍັງມີເມືອງ ແລະ ບ້ານຈຳນວນໜຶ່ງ ໄດ້ສະເໜີຕໍ່ ອົງການ Unicef ເພື່ອໃຫ້ການຊ່ວຍເຫຼືອຕື່ມ ບໍ່ວ່າຈະເປັນໂທລະໂຄ່ງ LCD ລຳໂພງ ລວມທັງໂທລະທັດທີ່ຈະນຳຕິດຕັ້ງຢ່ໂຮງໝໍ ເພື່ອທຳນວຍຄວາມສະດວກໃຫ້ຜູ້ເຂົ້າມາໃຊ້ບໍລິການ ທັງເປັນການປຸກລະດົມໃຫ້ປະຊາຊົນເຂົ້າເຖິງຂໍ້ມູນຂ່າວດ້ານສາທາລະນະສຸກຫຼາຍຂຶ້ນ.
ສຳລັບອຸປະກອນດັ່ງກກ່າວ ບາງແຂວງໄດ້ຮັບແລ້ວ ໂດຍມອບໃຫ້ສູນກັກບໍລິເວນ ສ່ວນເທື່ອທີ 2 ແມ່ນມອບໃຫ້ 10 ແຂວງ ແລະ ອີກ 8 ແຂວງກຳລັງຈັດຊື້.