ຊຸດສຳມະນາ ຍົກລະດັບພະນັກງານນຳທ່ຽວລະດັບຊາດຕໍ່ບັດໃໝ່ ຄັ້ງທີ III ຈັດຂຶ້ນວັນທີ 10-12 ມິຖຸນາ 2020 ທີ່ນະຄອນຫຼວງວຽງຈັນ ໂດຍເປັນປະທານຂອງທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ມີທ່ານ ວິໄລທອງ ສີຊານົນ ຫົວໜ້າສະຖາບັນສື່ມວນຊົນ ວັດທະນະທຳ ແລະ ທ່ອງທ່ຽວ ພ້ອມບັນດານັກສຳມະນາກອນນຳທ່ຽວຈາກທົ່ວປະເທດຈຳນວນ 40 ທ່ານເຂົ້າຮ່ວມ.
ທ່ານ ອຸ່ນທວງ ຂາວພັນ ກ່າວວ່າ: ການສຳມະນາຄັ້ງນີ້ ສຸດທີ່ມີຄວາມສຳຄັນຫຼາຍ ເພາະເປັນໂອກາດສຳ ລັບພະນັກງານນຳທ່ຽວລະດັບຊາດຈະໄດ້ມາແລກປ່ຽນປະສົບການນຳກັນ ທາງສະຖາບັນສື່ມວນຊົນ ວັດທະນະທຳ ແລະ ທ່ອງທ່ຽວ ກໍຈະໄດ້ຮັບຊາບຂໍ້ມູນຕົວຈິງ ບັນຫາດ້ານຕັ້ງໜ້າ ແລະ ຫຍໍ້ທໍ້ຂອງພະນັກງານນຳທ່ຽວ ເພື່ອນຳມາ ປັບປຸງເນື້ອໃນການຝຶກອົບຮົມໃຫ້ສອດຄ່ອງກັບສະພາບຕົວຈິງໃນຊຸດສຳມະນານີ້ ພວກເຮົາຍັງຈະມີໂອກາດຮັບເອົາ ຂໍ້ມູນໃໝ່ການພັດທະນາການທ່ອງທ່ຽວຂອງ ສປປ ລາວ ເປັນຕົ້ນແມ່ນ ຜະລິດຕະພັນການທ່ອງທ່ຽວໃໝ່ ບັນດາຂໍ້ກຳນົດລະບຽບການໃໝ່ ຫຼັກສູດການຝຶກອົບຮົມໃໝ່ ແລະ ການໂຄສະນາສົ່ງເສີມການທ່ອງທ່ຽວໃນປັດຈຸບັນ ເຊິ່ງລ້ວນແຕ່ແມ່ນຂໍ້ມູນສຳຄັນສຳລັບພະນັກງານນຳທ່ຽວ.
ພ້ອມດຽວກັນນີ້ ໃນການສຳມະນາ ພວກເຮົາຍັງຈະມີໂອກາດແລກປ່ຽນກັບຜູ້ຊ່ຽວຊານອາວຸໂສຂອງລາວ ກ່ຽວກັບການນຳທ່ຽວ ແລະ ຈະໄດ້ຮ່ວມກັນລົງພື້ນທີ່ເຮັດກິດຈະກຳ ເຊິ່ງຈະເປັນການສ້າງເຄືອຂ່າຍ ແລະ ຮັດແໜ້ນຄວາມສາມັກຄີນຳກັນ ເປັນການເພີ່ມຄວາມສຳພັນອັນດີລະຫວ່າງພະນັກງານທ່ອງທ່ຽວດ້ວຍກັນ ແລະ ພ້ອມກັນສ້າງສະມາຄົມພະນັກງານນຳທ່ຽວຂອງລາວເຮົາໃຫ້ເຂັ້ມແຂງຂຶ້ນໄປເລື້ອຍໆ.