ວັນທີ 30 ສິງຫາ 2022 ທີ່ສະໂມສອນເມືອງນາຊາຍທອງ ນະຄອນຫຼວງວຽງຈັນ (ນວ) ໄດ້ມີພິທີຕ້ອນຮັບ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 1 ແລະ ສະມາຊິກສະພາປະຊາຊົນນະຄອນຫຼງວຽງຈັນ ຊູດທີ2 (ສສຊ-ສສນວ) ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 3 ຂອງ ສສຊ ຊຸດທີ 9 ແລະ ສສນວ ຊຸດທີ 2 ເຊິ່ງນໍາພາໂດຍ ທ່ານ ທະນົງສິດ ເມືອງຈັນ ສສຊ ທ່ານ ແສງວິໄລ ສີລັດຕະນະ ສສນວ ແລະ ທ່ານ ດຣ ບຸນທະວີ ເດດບັນດິດ ສສນວ ເປັນກຽດຕ້ອນຮັບຂອງທ່ານ ນາງ ແກ້ວມະນີ ແກນປະເສີດ ຄະນະປະຈຳພັກເມືອງ ປະທານໂຄສະນາອົບຮົມເມືອງນາຊາຍທອງ ມີບັນດາຫ້ອງການ ຕະຫຼອດຮອດພະນັກງານສະມາຊິກພັກພະນັກງານລັດຖະກອນເຂົ້າຮ່ວມ.
ໂອກາດດັ່ງກ່າວ ໄດ້ຮັບຟັງລາຍງານຫຍໍ້ ສະພາບລວມຂອງເມືອງນາຊາຍທອງ ເປັນຕົ້ນ: ຂົງເຂດວຽກງານເສດຖະກິດ ໄດ້ເອົາໃຈໃສ່ນໍາພາປະຊາຊົນເຮັດການຜະລິດ ແລະ ປະກອບການຕາມກົນໄກເສດຖະກິດຕະຫຼາດ ທີ່ມີການນໍາພາຂອງພັກ ການຄຸ້ມຄອງຂອງລັດ ເຮັດໃຫ້ເສດຖະກິດຂອງເມືອງນາຊາຍທອງມີການຂະຫຍາຍຕົວຢ່າງຕໍ່ເນື່ອງ ລາຍຮັບສະເລ່ຍຕໍ່ຫົວຄົນ 18.500.000 ກີບ/ຄົນ/ປີ ເທົ່າກັບ 2.100 ໂດລາ/ຄົນ/ປີ ໄດ້ຕັ້ງໜ້າຂຸດຄົ້ນທ່າແຮງບົ່ມຊ້ອນພາຍໃນເມືອງ ເພື່ອພັດທະນາເສດຖະກິດຕາມທິດຫັນປ່ຽນເປັນອຸດສາຫະກໍາ ແລະ ທັນສະໄໝ ສົ່ງເສີມຊາວກະສິກອນຫັນຈາກການຜະລິດແບບທໍາມະຊາດໄປສູ່ການຜະລິດສິນຄ້າ ສາມາດ ຜະລິດເຂົ້າໄດ້ 49.221 ໂຕນ/ປີ ໃນເນື້ອທີ່ 12.605 ສະເລ່ຍສະມັດຕະພາບ 4,40 ໂຕນ/ເຮັກຕາ ທົ່ວເມືອງນາຊາຍທອງ ມີຄອບຄົວຕົວແບບ 201 ຄອບຄົວ ກຸ່ມຜະລິດ 11 ກຸ່ມ ຟາມລ້ຽງສັດທັງໝົດ 248 ຟາມ ສາມາດຕອບສະໜອງຊັ້ນໄດ້ 20.397 ໂຕນ/ປີ ແລະ ພືດຜັກ 7,468 ໂຕນ/ປີ ສໍາລັບການຈັດເກັບລາຍຮັບເຂົ້າງົບປະມານໃນປີ 2002 ມາຮອດປັດຈຸບັນ ຈັດເກັບລາຍຮັບໄດ້ 8,66 ຕື້ກີບ ເທົ່າກັບ 43,14% ຂອງແຜນການ 19,50 ຕື້ກີບ.
ສັງລວມແລ້ວ ເມືອງນາຊາຍທອງແມ່ນມີສະຖຽນລະພາບທາງດ້ານການເມືອງທີ່ໜັກແໜ້ນ ສັງຄົມມີຄວາມສະຫງົບ ແລະ ມີການພັດທະນາ ລະດັບຊີວິດການເປັນຢູ່ຂອງປະຊາຊົນກໍເຫັນວ່າດີຂຶ້ນເລື້ອຍໆ ເຖິງຈະຊັກຊ້າແດ່ ແຕ່ກໍມີທ່າອ່ຽງທີ່ດີຂຶ້ນ ແຕ່ແນວໃດກໍ່ດີ ຄຽງຄູ່ກັບດ້ານຕັ້ງໜ້ານັ້ນ ກໍຍັງມີບັນຫາຫຼາຍດ້ານທີ່ຕ້ອງໄດ້ເອົາໃຈໃສ່ນໍາພາແກ້ໄຂຢ່າງເອົາຈິງເອົາຈັງ ເປັນຕົ້ນແມ່ນບັນຫາປາກົດການຫຍໍ້ທໍ້ຍັງສືບຕໍ່ເກີດຂຶ້ນຢູ່ເລື້ອຍໆເຊັ່ນ: ບັນຫາຢາເສບຕິດ ຂີ້ລັກງັດແງະ ແລະ ອື່ນໆ.
ຈາກນັ້ນ ສສຊ ແລະ ສສນວ ຍັງໄດ້ຜັດປ່ຽນກັນຂຶ້ນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ 9 ແລະ ສະພາປະຊາຊົນ ນວ ຊຸດທີ 2 ພ້ອມນັ້ນ ກໍໄດ້ໂອກາດໃຫ້ຜູ້ເຂົ້າຮ່ວມໄດ້ປະກອບຄິດຄໍາເຫັນ ແລະ ສະເໜີບັນຫາທີ່ໃຫ້ຄວາມສົນໃຈເພື່ອສະເໜີໄປຍັງພາກສ່ວນກ່ຽວຂ້ອງແກ້ໄຂ ໃນນັ້ນ ບັນຫາ ກ່ຽວກັບການກຳນົດອາຍຸຂອງບັດປະຈຳຕົວ ໃບຂັບຂີ່ 5 ປີ ເຫັນວ່າມີຫຍຸ້ງຍາກ ສະເໜີໃຫ້ນຳໃຊ້ຖາວອນໄດ້ບໍ ການແກ້ໄຂບັນຫາຂອງສັງຄົມຍັງຊັກຊ້າ ໂດຍສະເພາະ ການແກ້ໄຂບັນຫາຂໍ້ຂັດແຍ່ງອ່າງນ້ຳຫຸມ ເຫັນວ່າມີຄວາມຊັກຊ້າ ແລະ ແກ່ຍາວເວລາ ໃຫ້ເພີ່ມເງິນເດືອນຂອງພະນັກງານໃຫ້ເໝາະສົມກັບຄ່າຄອງຊີບທີ່ແພງໃນປັດຈຸບັນ ໃຫ້ຄວບຄຸມລາຄາສິນຄ້າ ເພາະລາຄາສິນຄ້າມີການເໜັງຕິງຫຼາຍ ໃຫ້ຍາດເອົາທຶນພັດທະນາພື້ນຖານໂຄງລ່າງ ທຶນປົກປັກຮັກສາສິ່ງແວດລ້ອມ ແລະ ທຶນອານຸຮັກໃຫ້ມີຄວາມຍືນຍົງ.
# ຂ່າວ – ພາບ :ວຽງມາ