ໂຮງຮຽນການເມືອງ ແລະ ການປົກຄອງນະຄອນຫຼວງວຽງຈັນ (ນວ) ໄດ້ຕັ້ງໜ້າປະຕິບັດມາດຕະການປ້ອງກັນພະຍາດ COVID-19 ໂດຍປະຕິບັດຕາມການຊີ້ນຳຂອງຄະນະສະເພາະກິດຂັ້ນສູນກາງ ກໍຄືຂັ້ນ ນວ ຢ່າງເຂັ້ມງວດ ປະຕິບັດເປັນປະຈຳ ເຂົ້າໃນການເຄື່ອນໄຫວໃນຊີວິດສັງຄົມ ເວລາຢູ່ຫໍພັກ ແລະ ເວລາຢູ່ຫ້ອງຮຽນ.
ທ່ານ ນາງ ວຽງພອນ ແກ້ວຄູນສີ ອຳນວຍການໂຮງຮຽນການເມືອງ ແລະ ການປົກຄອງ ນວ ໃຫ້ສຳພາດວັນທີ 6 ມິຖຸນາ 2020 ວ່າ: ໂຮງຮຽນພວກເຮົາໄດ້ຈັດຕັ້ງປະຕິບັດບັນດາຄຳສັ່ງ ແລະ ຄຳແນະນຳຢ່າງເຄັ່ງຄັດ ແລະ ເຂັ້ມງວດ ກ່ອນມີຄຳສັ່ງເລກທີ 06/ນຍ ໂຮງຮຽນໄດ້ຈັດຕັ້ງໃຫ້ຂໍ້ມູນພື້ນຖານເບື້ອງຕົ້ນ ໂດຍເຊີນກົມສົ່ງເສີມສຸຂະພາບ ແລະ ອະນາໄມກະຊວງສາທາລະນະສຸກມາເຜີຍແຜ່ວິທີປ້ອງກັນ ແລະ ຄວບຄຸມພະຍາດ ຫຼັງຈາກນັ້ນມາໄດ້ຕັ້ງໜ້າປະຕິບັດຕາມຄຳສັ່ງເລກທີ 06/ນຍ ກໍຄືຄະນະສະເພາະກິດໃຫ້ໂຈະການຮຽນ-ການສອນຊົ່ວຄາວ ຖືວ່າໂຮງຮຽນມີຄວາມຮັບຜິດຊອບສູງຕໍ່ພະນັກງານສະມາຊິກພັກ ຄູ-ອາຈານ ກໍຄືຄົນໃກ້ຊິດຂອງຄູ-ອາຈານ ແລະ ນັກສຶກສາ ໃນໄລຍະພັກຮຽນຊົ່ວຄາວ ໂຮງຮຽນໄດ້ດຳເນີນການຮຽນ-ການສອນໂດຍໄດ້ມອບວຽກບ້ານ ແລະ ວຽກຕຳລາຮຽນຜ່ານສື່ອອນລາຍໃຫ້ນັກສຶກສາແຕ່ລະຫ້ອງ ແຕ່ລະວິຊາ ມອບໃຫ້ຄູປະຈຳຫ້ອງ ແລະ ອາຈານສອນວິຊານັ້ນເປັນຜູ້ຮັບຜິດຊອບໂດຍກົງ ແລະ ນັກສຶກສາກໍມີຄວາມຮັບຜິດຊອບເປັນເຈົ້າການສົ່ງວຽກບ້ານໃຫ້ກັບຄູ-ອາຈານເປັນປົກກະຕິ.
ພາຍຫຼັງທີ່ມີແນະນຳແຈ້ງການການຜ່ອນຜັນແຕ່ລະໄລຍະ ໂຮງຮຽນໄດ້ຕິດຕາມຢ່າງໃກ້ຊິດ ສຳລັບການຈັດຕັ້ງການຮຽນ-ການສອນຄືນໃໝ່ ຢູ່ໂຮງຮຽນຂອງພວກເຮົາໄດ້ແບ່ງອອກເປັນ 3 ໄລຍະຄື: ໄລຍະທຳອິດດຳເນີນການຮຽນ-ການສອນວັນທີ 18 ພຶດສະພາ 2020 ໃຫ້ຫ້ອງຮຽນຊັ້ນກາງຮຸ່ນທີ 9 ເຂົ້າຮຽນກ່ອນ ເນື່ອງຈາກຫ້ອງຮຽນຊັ້ນດັ່ງກ່າວມີຈຳນວນຄົນບໍ່ຫຼາຍສາມາດປະຕິບັດໄດ້ຕາມແຈ້ງການ ແລະ ຄຳແນະນຳຂອງຄະນະສະເພາະກິດຂັ້ນສູນກາງ ໄລຍະທີ 2 ເປີດການຮຽນ-ການສອນໃຫ້ຊັ້ນອະນຸປະລິນຍາຮຸ່ນທີ 15 ປີທີ 2 ເຊິ່ງເປັນປີສຸດທ້າຍໄດ້ເປີດຮຽນວັນທີ 25 ພຶດສະພາ 2020 ປັດຈຸບັນໄດ້ດຳເນີນການຮຽນ-ການສອນຢູ່ ໃຫ້ 2 ຮຸ່ນສອງຫ້ອງ ແລະ ໄລຍະທີ 3 ຖືວ່າຈັດຕັ້ງການຮຽນ-ການສອນວັນທີ 15 ມິຖຸນາ 2020 ແມ່ນຊັ້ນອະນຸປະລິນຍາປີທີ 1 ຮຸ່ນທີ 16 ຫຼັງຈາກນັ້ນໃນອາທິດຕໍ່ໄປ ຈະເປີດຊັ້ນຕົ້ນໃຫ້ຂົງເຂດການສຶກສາສະເພາະໃຫ້ຄະນະນຳຂອງໂຮງຮຽນປະຖົມ ຊັ້ນມັດທະຍົມທົ່ວ ນວ ໂດຍສົມທົບກັບພະແນກສຶກສາທິການ ແລະ ກີລາ ນວ.
ສຳລັບມາດຕະການປ້ອງກັນ ໄດ້ປະຕິບັດມາດຕະການຢ່າງເຂັ້ມງວດ ເນັ້ນປະຕິບັດປົກກະຕິໃຫ້ກາຍເປັນການເຄື່ອນ ໄຫວໜຶ່ງໃນຊີວິດສັງຄົມ ສະແດງອອກໃນແຕ່ລະວັນ ກ່ອນເຂົ້າມາປະຕິບັດໜ້າທີ່ຂອງຄູອາຈານ ແລະ ນັກສຶກສາ ກ່ອນຈະເຂົ້າຫ້ອງຮຽນຕ້ອງໃສ່ຜ້າອັດປາກ ວັດແທກອຸນຫະພູມ ຖ້າມີໄຂ້ບໍ່ອະນຸຍາດໃຫ້ເຂົ້າໃຫ້ກັບໄປຕິດຕາມຢູ່ເຮືອນ ແລະ ລ້າງມືດ້ວຍເຫຼົ້າ ເວົ້າລວມແລ້ວ ມາດຕະການປ້ອງກັນໄດ້ເຮັດເປັນປົກກະຕິ ແລະ ຕໍ່ເນື່ອງ ໃນການວັດແທກອຸນນະພູມໄດ້ຈັດແບ່ງໃຫ້ຄູ-ອາຈານເປັນຜູ້ວັດແທກ ນອກນັ້ນຍັງມີນັກສຶກສາຈຳນວນໜຶ່ງໄດ້ນອນຢູ່ຫໍພັກພາຍໃນໂຮງຮຽນ ຫໍພັກໄດ້ຈັດສັນຄືນໃໝ່ ເມື່ອກ່ອນຫ້ອງໜຶ່ງ 3- 4 ຄົນ ໄດ້ຄັດອອກໃຫ້ເຫຼືອ 2 ຄົນເພື່ອຮັກສາໄລຍະຫ່າງ. ສ່ວນຄວາມຮັບຜິດຊອບຕໍ່ສັງຄົມໂຮງຮຽນໄດ້ລົງກໍ່ສ້າງຮາກຖານການເມືອງຢູ່ 4 ບ້ານອ້ອມຂ້າງໂຮງຮຽນ ລົງຈັດຕັ້ງເຜີຍແຜ່ວິທີປ້ອງກັນພະຍາດ COVID ແລະ ໄດ້ນຳເອົາໂປດສະເຕີວິທີການປ້ອງກັນພະຍາດນີ້ໄປຕິດໃນກະດານຂ່າວຂອງບ້ານເພື່ອເຜີຍແຜ່ ທັງໄດ້ແຈກຍາຍໃຫ້ນັກສຶກສາເອົານຳໄປຕິດໃນຊຸມຊົນຂອງຕົນເອງ ມາຮອດປັດຈຸບັນຄູ-ອາຈານ ແລະ ນັກສຶກສາໄດ້ຕັ້ງໜ້າປະຕິບັດຕາມຄຳຂວັນຂອງຄະນະສະເພາະກິດ ຄືຕ້ອງຮັບຜິດຊອບຕໍ່ຕົນເອງ ແລະ ສັງຄົມຢ່າງເຂັ້ມງວດ.
# ຂ່າວ & ພາບ: ເພັດສະໝອນ