ໂຮງແຮມວັນວຽງຈັນ ຕັ້ງຢູ່ບ້ານຫາຍໂສກ ເມືອງຈັນທະບູລີ ນະຄອນຫຼວງວຽງຈັນ ເປັນໜຶ່ງໃນໂຮງແຮມທີ່ລັດຖະບານ ໄດ້ຄັດເລືອກເປັນສູນກັກກັນຊົ່ວຄາວໃຫ້ແຂກ ໂດຍແນໃສ່ມາດຕະການກັກໂຕຂອງຄະນະສະເພາະກິດວາງອອກ ເຊັ່ນ: ຜູ້ທີ່ມາກັກກັນຊົ່ວຄາວ ຈະຕ້ອງຢູ່ໃນຫ້ອງຕະຫຼອດ 24 ຊົ່ວໂມງ ເປັນເວລາ 14 ວັນ ແລະ ບໍ່ໃຫ້ມາຢ່າງເລາະຕາມສະຖານທີ່ຕ່າງໆເດັດຂາດ ບໍ່ໃຫ້ໄປມາຫາສູ່ກັນລະຫວ່າງຫ້ອງກັບຫ້ອງ ແລະ ບໍ່ໃຫ້ນັດບຸກຄົນພາຍນອກບໍລິເວນໂຮງແຮມເດັດຂາດ.
ທ່ານ ນາງ ສີລິພອນ ສະເດັດຕັນ ເຈົ້າຂອງໂຮງແຮມວັນວຽງຈັນ ໃຫ້ສຳພາດເມື່ອບໍ່ດົນຜ່ານມາວ່າ: ໂຮງແຮມວັນວຽງຈັນ ເປີດບໍລິການປີ 2019 ພາຍຫຼັງພະຍາດໂຄວິດ-19 ມີການລະບາດ ກໍໄດ້ປິດບໍລິການຕາມຄະນະສະເພາະກິດວາງອອກ ປັດຈຸບັນ ລັດຖະບານໄດ້ຜ່ອນຜັນມາດຕະການ ໂຮງແຮມແຫ່ງນີ້ ຈຶ່ງຖືກຄັດເລືອກໃຫ້ເປັນສູນກັກກັນຊົ່ວຄາວໃຫ້ແຂກ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດແຕ່ຕົ້ນເດືອນພຶດສະພາຜ່ານມາ ແລະ ປັດຈຸບັນມີຜູ້ທີ່ເຂົ້າມາກັກໂຕ 10 ກວ່າຄົນ ໃນນັ້ນເປັນຄົນລາວ ແລະ ຕ່າງປະເທດ ເຊິ່ງທາງໂຮງແຮມໄດ້ສະໜອງອຸປະກອນເຄື່ອງໃຊ້ຂັ້ນພື້ນຖານທີ່ຈຳເປັນໃນຫ້ອງນອນ ທີ່ກຳນົດໄວ້ເພື່ອໃຫ້ນຳໃຊ້ຄົບ 14 ວັນ ສຳລັບການບໍລິການອາຫານ ຈະຈັດສົ່ງຕາມເວລາທີ່ໂຮງແຮມຈັດສັນໄວ້ ໃຫ້ອາຫານເຊົ້າ ສວາຍ ແລະ ແລງ ຜູ້ກັກໂຕຈະຕ້ອງປະຕິບັດການວັດແທກອຸນຫະພູມຮ່າງກາຍ 2 ຄັ້ງຕໍ່ວັນ ແລ້ວລາຍງານໃຫ້ເຈົ້າໜ້າທີ່ຕາມລະບຽບຢ່າງເຂັ້ມງວດ ພາຍຫຼັງກັກກັນຄົບ 14 ວັນອອກໄປແລ້ວ ຍັງໄດ້ມີການພົ່ນຢາຂ້າເຊື້ອເພື່ອຮອງຮັບການປ້ອງກັນແຂກຄົນຕໍ່ໄປ.
ໂຮງແຮມວັນວຽງຈັນ ເປັນໜຶ່ງໃນໂຮງແຮມທີ່ລັດຖະບານໄດ້ຄັດເລືອກເປັນສູນກັກກັນຊົ່ວຄາວໃຫ້ແຂກ ກໍຄືບຸກຄົນນັກຮຽນ-ນັກສຶກສາ ນັກທຸລະກິດ ຈາກປະເທດອ້ອມຂ້າງທີ່ໄດ້ຮັບອະນຸຍາດໃຫ້ເດີນທາງເຂົ້າມາ ສປປ ລາວ ເຊິ່ງໂຮງແຮມກໍໄດ້ປະຕິບັດຕາມຄຳສັ່ງ ແລະ ຄຳແນະນຳມາດຕະການການປ້ອງກັນການຕິດເຊື້ອພະຍາດໂຄວິດ-19 ທີ່ຄະນະສະເພາະກິດວາງອອກຢ່າງເຄັ່ງຄັດ ຕໍ່ບັນດາແຂກທີ່ເຂົ້າມາໃຊ້ບໍລິການ.
# ຂ່າວ & ພາບ: ວຽງມາ