ຫ້ອງການກະສິກຳ ແລະ ປ່າໄມ້ ເມືອງຫາດຊາຍຟອງ ນະຄອນຫຼວງວຽງຈັນ (ນວ) ຈັດພິທີປູກຕົ້ນໄມ້ ເນື່ອງໃນໂອກາດສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນຂຶ້ນວັນທີ 30 ພຶດສາພາຜ່ານມາ ຢູ່ເສັ້ນທາງ 450 ປີ ມີທ່ານ ຄຳພັນ ມາລາບັນດິດ ຄະນະປະຈຳພັກ ນວ ຜູ້ຊີ້ນຳເມືອງຫາດຊາຍຟອງ ທ່ານ ວົງເດືອນ ບຸນຍະແສງ ເຈົ້າເມືອງຫາດຊາຍຟອງ ທ່ານນາງ ປິດ ພົມເພັດ ຮອງຫົວໜ້າພະແນກກະສິກຳ ແລະ ປ່າໄມ້ ນວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ສຸລິນ ອິນທາທິລາດ ຫົວໜ້າຫ້ອງການກະສິກຳ ແລະ ປ່າໄມ້ເມືອງຫາດຊາຍຟອງ ກ່າວວ່າ: ປີ 2020 ຫ້ອງການກະສິກຳ ແລະ ປ່າໄມ້ເມືອງຫາດຊາຍຟອງ ຜະລິດເບ້ຍໄມ້ໄດ້ 2.640 ເບ້ຍ ປູກໄມ້ຄາດໝາຍໃຫ້ໄດ້ 5 ເຮັກຕາ ພາກລັດ 2 ເຮັກຕາ ໃຊ້ເບ້ຍ 890 ເບ້ຍ ໃນນີ້ໄມ້ອຸດສາຫະກຳ 53 ເບ້ຍ ໄມ້ປະດັບ 837 ເບ້ຍ ປູກໄມ້ພື້ນເມືອງເພື່ອປົກປັກຮັກສາສິ່ງແວດລ້ອມ ຮັກສາແຫຼ່ງນ້ຳ ຟື້ນຟູປ່າໄມ້ໃຫ້ອຸດົມສົມບູນ ແລະ ເພື່ອຂະຫຍາຍພື້ນທີ່ສີຂຽວພາຍໃນເມືອງ 5 ເຮັກຕາ ໃຊ້ເບ້ຍໄມ້ 574 ເບ້ຍ ແລະ ປູກເພື່ອເປັນສິນຄ້າ 7.574 ເບ້ຍ.
ສຳລັບພິທີປູກທາງການເນື່ອງໃນໂອກາດວັນປູກໄມ້ແຫ່ງຊາດ ແລະ ວັນເດັກນ້ອຍສາກົນ (1 ມິຖຸນາ) ຄັ້ງນີ້ ໄດ້ປູກຕົ້ນຈຳປາສັບຫວ່າງບ່ອນທີ່ຕາຍໃນໄລຍະຜ່ານມາ ລວມຄວາມຍາວ 2 ກິໂລແມັດຂອງເສັ້ນທາງ 450 ປີ ໂດຍໃຊ້ຕົ້ນຈຳປາ 200 ຕົ້ນ ພາຍຫຼັງປູກແລ້ວຈະໄດ້ຕິດຕາມບົວລະບັດຮັກສາເພື່ອໃຫ້ຮັບປະກັນດ້ານຄວາມຍືນຍົງ ສ້າງໃຫ້ເສັ້ນທາງ 450 ປີເປັນເສັ້ນທາງສີຂຽວໃນອະນາຄົດ.
# ຂ່າວ & ພາບ: ສະບາໄພ