ວັນທີ 17 ມີນາ 2020 ທີ່ກະຊວງການຕ່າງປະເທດ ມີພິທີການປະດັບຫຼຽນກາມິດຕະພາບໃຫ້ແກ່ທ່ານ ອົກຕາວຽນ ບີໂວ ຜູ້ຕາງໜ້າອົງການອຸຍນີເຊບປະຈຳລາວ ໃນໂອກາດທີ່ສີ້ນສຸດການປະຕິບັດໜ້າທີ່ຢູ່ລາວ ມອບໂດຍທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ມີພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ອົກຕາວຽນ ບີໂວ ໄດ້ຖືກແຕ່ງຕັ້ງມາໃຫ້ມາເປັນຜູ້ຕາງໜ້າອົງການອຸຍນີເຊບປະຈຳລາວໃນທ້າຍປີ 2017 ຕະຫຼອດໄລຍະຂອງການປະຕິບັດໜ້າທີ່ ໄດ້ປະກອບສ່ວນຢ່າງຕັ້ງໜ້າ ເຂົ້າໃນການເຄື່ອນໄຫວຊີ້ນຳວຽກງານການຊ່ວຍເຫຼືອຂອງອົງການອຸຍນີເຊບຕໍ່ລາວ ເປັນຕົ້ນແມ່ນການຊຸກຍູ້ ແລະ ສະໜັບສະໜູນລັດຖະບານໃນວຽກງານການພັດທະນາເດັກນ້ອຍ ສົ່ງເສີມການຂະຫຍາຍ ແລະ ປັບປຸງການໃຫ້ບໍລິການ ເພື່ອປ້ອງກັນການແຜ່ລະບາດຂອງເຊື້ອພະຍາດຕິດແປດຕ່າງໆ ສົ່ງເສີມໂພຊະນາການເດັກ ປັບປຸງການສຶກສາໃນຂັ້ນອະນຸບານ ນ້ຳສະອາດໃນຊຸມຊົນ ສະຖານທີ່ການສຶກສາຢູ່ເຂດຫ່າງໄກສອກຫຼີກ ການຊ່ວຍເຫຼືອສຸກເສີນໃນເວລາເກີດ ແລະ ການພື້ນພູຫຼັງໄພພິບັດ ຊຸກຍູ້ວຽກງານການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ທີ່ຕິດພັນກັບແມ່ຍິງ ແລະ ເດັກນ້ອຍ.
ປັດຈຸບັນ ອົງການອຸຍນີເຊບກຳລັງຈັດຕັ້ງປະຕິບັດແຜນການຮ່ວມມືການພັດທະນາຢູ່ລາວສຳລັບສົກປີ 2017-2021 ເຊິ່ງສຸມໃສ່ວຽກງານສຸຂະພາບແມ່ ແລະ ເດັກ ໂພຊະນາການ ການສຶກສາ ແຜນງານນ້ຳ ແລະ ສຸຂານາໄມ ການປົກປ້ອງເດັກ ນະໂຍບາຍ ແຜນຕິດຕາມ ແລະ ປະເມີນຜົນວຽກງານໂຄສະນາ ແລະ ສື່ມວນຊົນ ໃນວັນດຽວກັນນັ້ນທ່ານ ອົກຕາວຽນ ບີໂບ ກໍໄດ້ເຂົ້າຢ້ຽມອຳລາທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດອີກດ້ວຍ.