ທ້າຍເດືອນມີນາຜ່ານມາ ອົງການອະນາໄມໂລກໄດ້ຮຽກຮ້ອງບັນດາຊາດອາຊີຕາເວັນອອກສຽງໃຕ້ ໃຊ້ມາດຕະການ “ບຸກໜ້າ” ໃນການຕໍ່ສູ້ກັບໄວຣັສ ໂຄວິດ-19 (COVID-19) ທີ່ກຳລັງລະບາດຢ່າງວ່ອງໄວ ພ້ອມເຕືອນ ມີບາງປະເທດກຳລັງມຸ່ງສູ່ການແຜ່ເຊື້ອໃນຊຸມຊົນພາຍໃນປະເທດນັ້ນໆ (local transmission).
ຕົວເລກຜູ້ຕິດເຊື້ອ COVID-19 ພຸ່ງທະວີທົ່ວພາກພື້ນອາຊຽນໃນໄລຍະບໍ່ເທົ່າໃດເດືອນທີ່ຜ່ານມາ ສົ່ງຜົນໃຫ້ຫຼາຍປະເທດຕ້ອງບັງຄັບໃຊ້ມາດຕະການອັນໜ້າຕື່ນຕະລຶງຕ່າງໆນາໆ ນັບຕັ້ງແຕ່ປິດຊາຍແດນບໍ່ຕ້ອນຮັບຊາວຕ່າງປະເທດ ແລະ ກຳນົດສຸກເສີນຍາມຄ່ຳຄືນ ໄປຈົນເຖິງປິດໂຮງຮຽນ ແລະ ຍົກເລີກກິດຈະກຳກີລາຕ່າງໆ ມີຄວາມກັງວົນວ່າລະບົບສາທາລະນະສຸກທີ່ອ່ອນແອໃນຫຼາຍປະເທດອາຊີຕາເວັນອອກສຽງໃຕ້ ຈະບໍ່ສາມາດຮັບມືກັບການແຜ່ລະບາດຄັ້ງໃຫຍ່ໄດ້.
ໃນເລື່ອງນີ້ ທ່ານ ດຣ ພູນາມ ເຄຕຣາປາລ ຊິງ (Dr.Poonam Khetrapal Singh) ຜູ້ອຳນວຍການໃຫຍ່ ອົງການອະນາໄມໂລກ ປະຈຳພາກພື້ນອາຊີຕາເວັນອອກສຽງໃຕ້ ກ່າວວ່າ “ເຮົາຈຳເປັນຕ້ອງຍົກລະດັບທຸກຄວາມພະຍາຍາມໃນທັນທີ ເພື່ອປ້ອງກັນໄວຣັສບໍ່ໃຫ້ແຜ່ກະຈາຍຕິດຜູ້ຄົນຫຼາຍກວ່ານີ້”.
“ມີຄຳຢືນຢັນກ່ຽວກັບການຕິດໄວຣັສແບບເປັນກຸ່ມກ້ອນຫຼາຍຂຶ້ນເລື້ອຍໆ ເຖິງແມ່ນມັນບົ່ງຊີ້ເຖິງຄວາມຕື່ນຕົວ ແລະ ການເຝົ້າລະວັງຢ່າງໄດ້ຜົນ ແຕ່ອີກດ້ານໜຶ່ງ ມັນກໍດຶງດູດຄວາມສົນໃຈໄປຍັງຄວາມຈຳເປັນ ທີ່ຕ້ອງດຳເນີນການທາງບຸກຫຼາຍກວ່າທີ່ເປັນຢູ່ ແລະ ຕ້ອງໃຊ້ຄວາມພະຍາຍາມຂອງທົ່ວທຸກພາກສ່ວນຂອງສັງຄົມ ເພື່ອປ້ອງກັນບໍ່ໃຫ້ COVID-19 ແຜ່ລະບາດໄປຫຼາຍກວ່ານີ້” ທ່ານກ່າວ.
ຈາກຂໍ້ມູນຂອງມະຫາວິທະຍາໄລຈອນຮອບກິນສ໌ ພົບວ່າ ມາເລເຊຍເປັນຊາດທີ່ພົບຜູ້ຕິດເຊື້ອຫຼາຍທີ່ສຸດໃນອາຊີຕາເວັນອອກສຽງໃຕ້ ດ້ວຍຈຳນວນ 673 ຄົນ ໂດຍກໍລະນີສ່ວນໃຫຍ່ກ່ຽວຂ້ອງກັບກິດຈະກຳສາສະໜາກິດຈະກຳໜຶ່ງ ເຊິ່ງຈັດຂຶ້ນເມື່ອເດືອນທີ່ຜ່ານມາ ແລະ ມີຜູ້ເຂົ້າຮ່ວມເກືອບ 20.000 ຄົນ.
ຕົວເລກຜູ້ຕິດເຊື້ອທີ່ພຸ່ງຂຶ້ນ ສົ່ງຜົນໃຫ້ມາເລເຊຍສັ່ງປິດຊາຍແດນ ບໍ່ຕ້ອນຮັບນັກເດີນທາງ ແລະ ຫ້າມພົນລະເມືອງອອກນອກປະເທດ ຈຳກັດຄວາມເຄື່ອນໄຫວພາຍໃນ ລະງັບການຮຽນການສອນຕາມໂຮງຮຽນ ແລະ ມະຫາວິທະຍາໄລຕ່າງໆ ແລະ ສັ່ງໃຫ້ພາກທຸລະກິດທັງໝົດປິດດຳເນີນການ.
ທ່ານ ຊິງ ບອກວ່າ ມາດຕະການງ່າຍໆຢ່າງເຊັ່ນ ການລ້າງມື ແລະ ເວັ້ນໄລຍະຫ່າງທາງສັງຄົມ (Social distancing) ມີຄວາມສຳຄັນຍິ່ງໃນການຕໍ່ສູ້ກັບໄວຣັສ ແລະ ສາມາດຊ່ວຍຫຼຸດການຕິດເຊື້ອໄດ້ຢ່າງຫຼວງຫຼາຍ.
ຊາວບ້ານ-ນຳສະເໜີ