ໃນບັນຍາກາດວັນເດັກສາກົນ ວັນທີ 1 ມິຖຸນາ ທີ່ຫາກໍຜ່ານໄປໃໝ່ໆໝາດໆນີ້ ຜູ້ຂຽນໄດ້ສັງລວມເອົາຂ່າວກ່ຽວກັບມາດຕະການລົງໂທດສະຖານໜັກ ຕໍ່ຜູ້ໃຊ້ຄວາມຮຸນແຮງ ຫຼື ລະເມີດສິດທິທາງເພດຂອງເດັກນ້ອຍ ໃນບາງປະເທດດັ່ງລຸ່ມນີ້.
ທີ່ ອິນໂດເນເຊຍ: ລັດຖະສະພາອິນໂດເນເຊຍ ໄດ້ລົງມະຕິດ້ວຍຄະແນນສຽງສ່ວນຫຼາຍ ໃນວັນທີ 12 ເດືອນ ຕຸລາ 2016 ເພື່ອຮັບຮອງເອົາກົດໝາຍສະບັບປັບປຸງ ກ່ຽວກັບການລົງໂທດຜູ້ມີຄວາມຜິດໃນຄະດີອາຍາ ວ່າດ້ວຍການລ່ວງລະເມີດທາງເພດຕໍ່ເດັກ ກໍຄື ອາຊະຍາກຳທາງເພດທີ່ພົວພັນກັບເດັກ ດ້ວຍໂທດຈຳຄຸກເປັນເວລາ 10 ປີ ເຖິງໂທດສູງສຸດ ດ້ານການປະຫານຊີວິດ ນອກຈາກນີ້ ກົດໝາຍຍັງໃຫ້ອຳນາດຜູ້ພິພາກສາຕົກລົງຝັງອຸປະກອນເອເລັກໂຕຣນິກ ໄວ້ໃນຮ່າງກາຍຂອງຜູ້ກະທຳຜິດ ພາຍຫຼັງຜູ້ກ່ຽວພົ້ນໂທດແລ້ວ ທັງນີ້ກໍເພື່ອຕິດຕາມຜູ້ກ່ຽວບໍ່ໃຫ້ສືບຕໍ່ກໍ່ອາຊະຍາກຳອີກ ນີ້ຄືມາດຕະການຕໍ່ຜູ້ທີ່ມີການກະທຳຜິດແບບຊ້ຳຊ້ອນ ແຕ່ຖ້າສຳລັບຜູ້ກະທຳຜິດເປັນອາຈິນ ແລະ ຮ້າຍແຮງນັ້ນ ຜູ້ພິພາກສາກໍຈະສັ່ງໃຫ້ສີດສານເຄມີ ໃຫ້ຜູ້ກ່ຽວຫຼຸດສະມັດຖະພາບທາງເພດ (ຫຼຸດຄວາມຄຽດລົງ ຫຼື ໃຫ້ກາຍເປັນໝັນຕະຫຼອດຊີວິດ ການປັບປຸງກົດໝາຍສະບັບນີ້ມີຂຶ້ນຢ່າງຈິງຈັງ ເມື່ອເກີດມີຄະດີກຸ່ມຜູ້ຊາຍກວ່າ 10 ຄົນ ລັກພາຕົວເດັກຍິງອາຍຸ 14 ປີ ໄປຂົ່ມຂືນແບບປ່ຽນຖ້ຽວ (ລຽນຄິວ) ແລ້ວຂ້ານາງນ້ອຍຖິ້ມ ເຫດການນີ້ເກີດຂຶ້ນໃນເດືອນພຶດສະພາ 2016 ຢູ່ເກາະຊູມາຕຼາ.
ທີ່ ສປ ຈີນ: ໜັງສືພິມຜູ້ແທນປະຊາຊົນ ສະບັບ 603 ປະຈຳອາທິດຕົ້ນເດືອນສິງຫາ 2019 ໃຫ້ຮູ້ວ່າ ສປ ຈີນ ໄດ້ສຳເລັດການປັບປຸງກົດໝາຍວ່າດ້ວຍການລົງໂທດຂັ້ນປະຫານຊີວິດ ຕໍ່ນັກໂທດຄະດີຂົ່ມຂືນເດັກ ສານປະຊາຊົນສູງສຸດຂອງຈີນ ໄດ້ມີຄຳເຫັນກ່ຽວກັບກົດໝາຍສະບັບນີ້ວ່າ ບຸກຄົນທີ່ຂົ່ມຂືນເດັກນ້ອຍນັ້ນ ແມ່ນຜູ້ທີ່ມີສັນດານຊົ່ວຮ້າຍສຸດຂີດ ອາຊະຍາກຳທີ່ຜູ້ກ່ຽວກໍ່ຂຶ້ນນັ້ນ ສົ່ງຜົນສະທ້ອນທີ່ໜັກໜ່ວງຮ້າຍແຮງຕໍ່ສຸຂະພາບທາງກາຍ ແລະ ທາງດ້ານຈິດໃຈຂອງເດັກນ້ອຍທີ່ຕ້ອງເປັນເຫຍື່ອ ທັງເປັນການລະເມີດຫຼັກຈາລິຍະທຳທາງສັງຄົມ ແລະ ສິລະທຳ ດັ່ງນັ້ນ ຈຶ່ງສົມຄວນຖືກຕັດສິນປະຫານຊີວິດ ໂດຍບໍ່ມີການຜ່ອນຜັນ ຂ່າວໃຫ້ຮູ້ຕື່ມວ່າ ນັບແຕ່ປີ 2017 ເຖິງເດືອນມິຖຸນາ ປີ 2019 ບັນດາຫ້ອງການສານທົ່ວປະເທດຈີນ ໄດ້ຕັດສິນຄະດີລ່ວງລະເມີດທາງເພດຕໍ່ເດັກນ້ອຍ ຈຳນວນທັງໝົດ 8.332 ຄະດີ ແລະ ວ່າຄະດີລັກສະນະນີ້ມີທ່າອ່ຽງຫຼຸດລົງໃນຈີນ ຍ້ອນປະຊາຊົນເລີ່ມມີຄວາມເຂົ້າໃຈກ່ຽວກັບຄວາມສຳຄັນຂອງການປົກປ້ອງສິດທິຂອງເດັກນ້ອຍ.
ທີ່ ສະຫະລັດອາເມຣິກາ: ແຫຼ່ງຂ່າວຕ່າງປະເທດຈາກສະຫະລັດອາເມຣິກາ ໄດ້ໃຫ້ຮູ້ໃນທ້າຍເດືອນມິຖຸນາ 2019 ວ່າ: ອະລາບາມາ ຊຶ່ງເປັນລັດໜຶ່ງຂອງສະຫະລັດອາເມຣິກາ ໄດ້ປະກາດໃຊ້ກົດໝາຍລົງໂທດນັກໂທດຄະດີຂົ່ມຂືນເດັກນ້ອຍ ອາຍຸຕ່ຳກວ່າ 13 ປີ ດ້ວຍການຕອນດ້ວຍສານເຄມີຕໍ່ຜູ້ກະທຳຜິດ ກ່ອນປ່ອຍຜູ້ກ່ຽວອອກຈາກຄຸກ ທັງນີ້ກໍເພື່ອບໍ່ໃຫ້ຜູ້ກ່ຽວສືບຕໍ່ກໍ່ອາຊະຍາກຳຕໍ່ເດັກແບບຊ້ຳຮອຍອີກ ແຕ່ການຕອນດ້ວຍການສີດສານເຄມີໃຫ້ໝົດຄວາມຕ້ອງການທາງເພດນັ້ນ ແມ່ນສານເປັນຜູ້ມີສິດຕັດສິນ ນອກຈາກລັດອະລາບາມາແລ້ວ ການລົງໂທດລັກສະນະນີ້ຕໍ່ຜູ້ຕິດຄະດີລ່ວງລະເມີດທາງເພດຕໍ່ເດັກ ກໍຍັງໄດ້ຮັບການປະຕິບັດຢູ່ອີກ 6 ລັດ ແລະ ເຂດ ຄື: ກາລີຟໍເນຍ ຟະລໍຣິດາ ຫຼຸຍເຊຍນາ ມອນຕານາ ວິດສະຄອນຊິນ ແລະ ເກາະກວມ.