ຄະນະຜູ້ແທນສະຫະພາບເອີຣົບ ປະຈຳ ສປປ ລາວ (EU) ແລະ ອົງການພັດທະນາແຫ່ງປະເທດຝຣັ່ງ (AFD) ໄດ້ຢ້ຽມຢາມແຂວງສະຫວັນນະເຂດ ວັນທີ 27-29 ກໍລະກົດ 2022 ຜ່ານມາ ເພື່ອປະເມີນໝາກຜົນທີ່ບັນລຸໄດ້ພາຍໃຕ້ໂຄງການ “ການອະນຸຮັກລະບົບນິເວດ ໂດຍການຄຸ້ມຄອງພູມີທັດແບບປະສົມປະສານຢູ່ ສປປ ລາວ (ECILL) ໂດຍໄດ້ຮັບການສະໜັບສະໜູນຈາກສະຫະພາບເອີຣົບ ແລະ ອົງການ AFD.
ທ່ານ ນາງ Cecile Leroy ຜູ້ຈັດການແຜນງານສີຂຽວຂອງ EU ໄດ້ສະແດງຄວາມຮູ້ບຸນຄຸນຕໍ່ການສະໜັບສະໜູນ ແລະ ຄວາມຕັ້ງໃຈຢ່າງຕໍ່ເນື່ອງຕໍ່ໂຄງການມາຍັງທ່ານ ຄຳແສງ ສໍພາບມີໄຊ ຮອງຫົວໜ້າຫ້ອງການກະສິກຳ ແລະ ປ່າໄມ້ແຂວງສະຫວັນນະເຂດ (PAFO) ກະຊວງກະສິກຳ ແລະ ປ່າໄມ້ ພ້ອມທັງຕາງໜ້າຄະນະກໍາມະການຈັດຕັ້ງປະຕິບັດໂຄງການ ສໍາລັບ ແຜນງານເຂດທີ່ດິນບໍລິເວນນໍ້າຣາມຊາເຊຈໍາພອນ ລະຫວ່າງອົງການອະນຸຮັກສັດປ່າ ປະຈໍາ ສປປ ລາວ ແລະ ກະຊວງກະສິກໍາ ແລະ ປ່າໄມ້ ລວມທັງທີມງານໂຄງການທັງໝົດ.
ທ່ານ ນາງ Cecile Leroy ກ່າວວ່າ “ມັນເປັນວິທີທີ່ດີໃນການຄຸ້ມຄອງຄວາມກົດດັນຕ່າງໆດ້ານການນຳໃຊ້ທີ່ດິນທີ່ມີການແຂ່ງຂັນ ແລະ ຊ່ອງຫວ່າງດ້ານນະໂຍບາຍທີ່ຍັງມີຢູ່ຫຼາຍປະເທດ ລວມທັງ ສປປ ລາວ ພາຍໃຕ້ຫຼັກການ ການມີສ່ວນຮ່ວມ ການປະສານສົມທົບກັນ ແລະ ການສ້າງຄວາມເຂັ້ມແຂງຂອງຊຸມຊົນ ILM ສະໜອງກອບໃນການເຊື່ອມໂຍງ ການຜະລິດ ສະຖາບັນ ແລະ ນະໂຍບາຍຕ່າງໆເຂົ້າກັບບັນດາກິດຈະກຳການຄຸ້ມຄອງພູມີທັດອື່ນໆ ຮັບປະກັນຄວາມໝັ້ນຄົງດ້ານສະບຽງອາຫານ ແລະ ໂພຊະນາການ ການສ້າງວຽກເຮັດງານທຳ ແລະ ກະສິກຳແບບຍືນຍົງ ແລະ ທົນທານ ປະກອບສ່ວນເຂົ້າໃນການແກ້ໄຂ ແລະ ການປັບຕົວຕໍ່ການປ່ຽນແປງດິນຟ້າອາກາດ ແລະ ຮັບປະກັນດ້ານຊີວະນາໆພັນ ແລະ ການອະນຸຮັກລະບົບນິເວດທີ່ດິນ/ປ່າໄມ້ ການຟື້ນຟູ ແລະ ການນໍາໃຊ້ແບບຍືນຍົງ.”
ທ່ານ ນາງ ມະໂນລີ ສີສະຫວັນ ຮອງຜູ້ອໍານວຍການ ອົງການ WCS ປະຈໍາ ສປປ ລາວ ກ່າວວ່າ: ເຂດທີ່ດິນບໍລິເວນນໍ້າຣາມຊາເຊຈໍາພອນ (XCP RWC) ປະສົບກັບສິ່ງທ້າທາຍຫຼາຍດ້ານສໍາລັບການອະນຸຮັກຊີວະນາໆພັນ ແລະ ການຄຸ້ມຄອງຊັບພະຍາກອນທໍາມະຊາດແບບຍືນຍົງ ພູມີທັດນີ້ແມ່ນຢູ່ນອກຂອບເຂດການຄຸ້ມຄອງຂອງລະບົບປ່າສະຫງວນແຫ່ງຊາດ (NPA) ຢ່າງສິ້ນເຊີງ ເຊິ່ງຈໍາເປັນຕ້ອງມີວິທີການຄຸ້ມຄອງທີ່ແຕກຕ່າງອອກໄປ ດ້ວຍເຫດນີ້ ອົງການ WCS ຈຶ່ງໄດ້ໝູນໃຊ້ວິທີການທີ່ດີທີ່ເຄີຍປະຕິບັດມາ ໂດຍສະເພາະການມີສ່ວນຮ່ວມຂອງຊຸມຊົນທີ່ເພິ່ງພາອາໄສປ່າໄມ້ ແລະ ຊັບພະຍາກອນທໍາມະຊາດ ເພື່ອຮ່ວມກັນພັດທະນາກອບການວາງແຜນນໍາໃຊ້ທີ່ດິນ ແລະ ຊັບພະຍາກອນ ໂດຍປັບໃຫ້ເຂົ້າກັບຄວາມຕ້ອງການທີ່ເປັນເອກະລັກຂອງທີ່ດິນບໍລິເວນນໍ້າ ແລະ ການປ່ຽນແປງລະດັບນໍ້າຕາມລະດູການຂອງພູມີທັດນີ້.
ທ່ານ ນາງ Lisa Mengual ພະນັກງານໂຄງການດ້ານກະສິກຳ ແລະ ຊີວະນາໆພັນຂອງອົງການ AFD ໄດ້ຕີລາຄາສູງຕໍ່ຄວາມພະຍາຍາມຂອງສະຫະພາບເອີຣົບ ສຳລັບການສະໜັບສະໜູນບັນດາກິດຈະກໍາຕ່າງໆຢູ່ເຂດພື້ນທີ່ດິນບໍລິເວນນໍ້າຣາມຊາເຊຈໍາພອນ ພ້ອມທັງການສະໜັບສະໜູນດ້ານການພັດທະນານະໂຍບາຍແຫ່ງຊາດເພື່ອຮັບປະກັນການປົກປັກຮັກສາພູມີທັດ ແລະ ຊີວະນາໆພັນທີ່ເປັນເອກະລັກສະເພາະນີ້ໃຫ້ດີຂຶ້ນ.
ຢູ່ ສປປ ລາວ ໂຄງການ ECILL ໄດ້ຖືກຈັດຕັ້ງປະຕິບັດໃນ 3 ພູມີທັດຄື: ອຸທິຍານແຫ່ງຊາດ ນໍ້າເອດ-ພູເລີຍ ພູມີທັດປ່າສະຫງວນແຂວງບໍລິຄໍາໄຊ ແລະ ເຂດພື້ນທີ່ດິນບໍລິເວນນໍ້າຣາມຊາເຊຈໍາພອນ ແຂວງສະຫວັນນະເຂດ ແຜນງານ “ພູມີທັດເພື່ອອະນາຄົດຂອງພວກເຮົາ” ທີ່ໄດ້ຮັບທຶນຈາກສະຫະພາບເອີຣົບ ແມ່ນໄດ້ສະໜັບສະໜູນ 22 ໂຄງການ ທີ່ມີຄວາມຄ້າຍຄືກັບການຄຸ້ມຄອງພູມີທັດແບບປະສົມປະສານ (ILM) ໃນ 19 ປະເທດ ແລະ 3 ອະນຸພາກພື້ນໃນເຂດ Global South ອາຊີຕາເວັນອອກສຽງໃຕ້ ອາຟຣິກາ ແລະ ອາເມຣິກາໃຕ້ ເພື່ອສ້າງຄວາມຮູ້ ແລະ ແບ່ງປັນແນວທາງການປະຕິບັດທີ່ດີທີ່ສຸດ ສໍາລັບການພັດທະນາແບບຍືນຍົງ.
# ວຽງມາ