ວັນທີ 12 ມີນາ 2020 ທີ່ວໍຊີງຕັນ ສະຫະລັດອາເມຣິກາ ສະພາບໍລິຫານຂອງທະນາຄານໂລກ ໄດ້ອະນຸມັດເງິນ 23 ລ້ານໂດລາສະຫະລັດ ຫຼື ປະມານ 200 ຕື້ກີບ ໃຫ້ລັດຖະບານລາວ ເພື່ອດຳເນີນໂຄງການເຂົ້າເຖິງການບໍລິການສຸຂະພາບ ແລະ ໂພຊະນາການ (HANSA) ແນໃສ່ເພື່ອສ້າງຄວາມເຂັ້ມແຂງໃຫ້ລະບົບສາທາລະນະສຸກຂອງລາວ ແລະ ປັບປຸງຄຸນນະພາບ ແລະ ການປົກຄຸມຂອງບໍລິການສາທາລະນະສຸກ ໂດຍການສະໜອງທຶນໃຫ້ພະແນກສາທາແຕ່ລະຂັ້ນ ແລະ ກົມວິຊາການຕ່າງໆໃນກະຊວງສາທາລະນະສຸກ ເຊິ່ງການສະໜອງທຶນແມ່ນອີງໃສ່ຜົນງານການຈັດຕັ້ງປະຕິບັດທີ່ຜ່ານການກວດກາສົມທຽບໃສ່ມາດຕະຖານທີ່ກະຊວງສາທາວາງອອກ.
ໂຄງການນີ້ຈະເພີ່ມຄວາມຍືນຍົງບັນດາແຜນງານສາທາລະນະສຸກ ເຊິ່ງລວມທັງວຽກງານສຸຂະພາບແມ່ ແລະ ເດັກ ການສັກຢາກັນພະຍາດວັນນະໂຣກ ແລະ ການປ້ອງກັນເຊື້ອເຮສໄອວີ ໂດຍສະເພາະ ແນໃສ່ການຫຼຸດຜ່ອນການຂາດສານອາຫານຢູ່ໃນບັນດາແຂວງພາກເໜືອຂອງລາວ ໃນບັນດາຕົວຊີ້ບອກດ້ານການຈັດຕັ້ງປະຕິບັດຕ່າງໆຂອງໂຄງການ HANSA ແມ່ນກ່ຽວກັບການໃຫ້ມີຢາ ແລະ ເຄື່ອງໃຊ້ພື້່ນຖານພຽງພໍ ແລະ ການບັນຈຸພະນັກງານແພດຢູ່ບັນດາສຸກສາລາ ພ້ອມທັງແມ່ ແລະ ເດັກນ້ອຍຈຳນວນຫຼາຍ ໃຫ້ໄດ້ຮັບການບໍລິການຮັກສາສຸຂະພາບທີ່ມີຄຸນນະພາບ ໃນສະຖານທີ່ໃຫ້ບໍລິການສາທາລະນະສຸກຂອງລັດ.
ທ່ານ ນິໂກລາ ປອນຕາຣາ ຫົວໜ້າຫ້ອງການທະນາຄານໂລກປະຈຳລາວ ໄດ້ກ່າວວ່າ: ອັດຕາການຕາຍຂອງແມ່ ແລະ ເດັກ ແລະ ການຂາດສານອາຫານຊຳເຮື້ອຂອງລາວ ຍັງຢູ່ໃນລະດັບສູງສູດໃນບັນດາປະເທດອາຊີຕາເວັນອອກສຽງໃຕ້ ແລະ ປາຊີຟິກ ໂດຍຜ່ານໂຄງການນີ້ທະນາຄານໂລກ ແລະ ບັນດາຄູ່ຮ່ວມພັດທະນາ ຈະເຮັດວຽກຮ່ວມກັນເພື່ອປັບປຸງສາທາລະນະສຸກຂັ້ນພື້ນຖານສຳລັບແມ່ຍິງ ແລະ ເດັກ ເຊິ່ງຈະເປັນການຊ່ວຍຍົກລະດັບມາດຕະຖານການດຳລົງຊີວິດ ແລະ ຕັດວົງຈອນຄວາມທຸກຍາກ ປະມານ 33% ຂອງເດັກທີ່ມີອາຍຸຕ່ຳກວ່າ 5 ປີ ຢູ່ລາວແມ່ນຂາດສານອາຫານຊຳເຮື້ອ ການຂາດສານອາຫານໃນລະດັບສູງທີ່ມີຢູ່ໃນໄວເດັກ ໝາຍເຖິງການສູນເສຍຄວາມອາດສາມາດບົ່ມຊ້ອນຂອງປະຊົນ ແລະ ເສດຖະກິດ ສຳລັບປະເທດ ໂຄງການດັ່ງກ່າວສະໜັບສະໜູນວິທີການເຮັດວຽກແບບເປັນໜຶ່ງດຽວຂອງຫຼາຍຂະແໜງການ ດ້ານໂພຊະນາການໄດ້ເລີ່ມໃນເດືອນພະຈິກ 2019 ໂດຍລັດຖະບານ ແຫ່ງ ສປປ ລາວ ເພື່ອຫຼຸດຜ່ອນສະພາບການຂາດສານອາຫານໃນ 4 ແຂວງພາກເໜືອຄື: ແຂວງອຸດົມໄຊ ຜົ້ງສາລີ ຫົວພັນ ແລະ ແຂວງຊຽງຂວາງ ໂຄງການໃໝ່ນີ້ຍັງຈະປັບປຸງການກວດພົບ ແລະ ປິ່ນປົວວັນນະໂຣກ ແລະ ເພີ່ມການປົກຄຸມຂອງການກວດຫາເຊື້ອເຮສໄອວີໃນບັນດາປະຊາກອນ ແລະ ກຸ່ມຄົນທີ່ມີຄວາມສ່ຽງ ໂດຍຜ່ານການໃຫ້ບໍລິການສຸຂະພາບແບບເຊື່ອມສານຫຼາຍກວ່າເກົ່າ.