ທ່ານ ຫວາງ ຈ້ຽນຫົວ ປະທານບໍລິສັດ ຊືເຟິງ ຈີຫຼົງ ຂຸດຄົ້ນຄຳ ເຂົ້າຢ້ຽມຄໍານັບການນຳຂັ້ນສູງ ສປປ ລາວ ເມື່ອບໍ່ດົນມານີ້ ເພື່ອລາຍງານຄວາມຄືບໜ້າກ່ຽວກັບການລົງທຶນ ແລະ ການປະກອບສ່ວນອັນພົ້ນເດັ່ນຂອງບໍລິສັດ ຕໍ່ການພັດທະນາເສດຖະກິດ-ສັງຄົມຂອງ ສປປ ລາວ ແລະ ຢືນຢັນແຜນວຽກສຳລັບການຂະຫຍາຍຕົວໃນອະນາຄົດ ໃນການຮ່ວມມືກັບລັດຖະບານລາວ ເຊິ່ງບໍລິສັດ ຊືເຟິງ ຈີຫຼົງ ຂຸດຄົ້ນຄຳ ໄດ້ຖືຫຸ້ນ 90% ໃນບໍລິສັດ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ເຊິ່ງເປັນເຈົ້າຂອງ ແລະ ດຳເນີນໂຄງການຄຳ-ທອງ ເຊໂປນ ເມືອງວິລະບູລີ ແຂວງສະຫວັນນະເຂດ.
ທ່ານ ຫວາງ ຈ້ຽນຫົວ ຢັ້ງຢືນຄວາມມຸ່ງໝັ້ນຂອງບໍລິສັດ ຊືເຟິງ ຈີຫຼົງ ຂຸດຄົ້ນຄຳ ໃນເພີ່ມທະວີການພົວພັນ ແລະ ລົງທຶນໃນ ສປປ ລາວ ເພື່ອພັດທະນາໂຄງການຄຳ ທອງ ແລະ ແຮ່ຫາຍາກ ໃນເວລາພົບປະກັບທ່ານ ປອ ໄຊສົມພອນ ພົມວິຫານ ປະທານສະພາແຫ່ງຊາດ ທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ ທ່ານນາງ ບຸນຄຳ ວໍລະຈິດ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ທ່ານ ປອ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ວ່າ: ການລົງທຶນໃນໂຄງການບໍ່ແຮ່ໃໝ່ ຈະສ້າງຜົນປະໂຫຍດທາງບວກໃຫ້ປະຊາຊົນ ແລະ ລັດຖະບານລາວ ຕົນມີຄວາມພາກພູມໃຈຕໍ່ຜົນສຳເລັດຂອງບໍລິສັດ ລຊມລ ໂດຍສະເພາະ ການສ້າງວຽກເຮັດງານທຳ ການເຝິກອົບຮົມ ການພັດທະນາຊຸມຊົນ ແລະ ການປະກອບສ່ວນສ້າງລາຍຮັບໃຫ້ລັດຖະບານລາວ ເມື່ອບໍ່ດົນມານີ້ ບໍລິສັດ ຊືເຟິງ ຈີຫຼົງ ຂຸດຄົ້ນຄຳ ໄດ້ລົງນາມສັນຍາຮ່ວມມືຄັ້ງປະຫວັດສາດ ກັບລັດວິສະຫະກິດພັດທະນາແຮ່ທາດລາວ ໃນການສຳຫຼວດ ແລະ ພັດທະນາຊັບພະຍາກອນແຮ່ທາດເພີ່ມຕື່ມຢູ່ ສປປ ລາວ ເຊິ່ງການຮ່ວມມືຄັ້ງນີ້ ໄດ້ສະແດງໃຫ້ເຫັນຄວາມມຸ່ງໝັ້ນໃນການຂະຫຍາຍຕົວ ແລະ ການພັດທະນາຂະແໜງການບໍ່ແຮ່ຂອງບໍລິສັດ ຊືເຟິງ ຈີຫຼົງ ຂຸດຄົ້ນຄຳ ຢູ່ ສປປ ລາວ ຕົນຂໍສະແດງຄວາມຂອບໃຈລັດຖະບານລາວ ທີ່ໄດ້ໃຫ້ການສະໜັບສະໜູນໂຄງການຄຳ-ທອງ ເຊໂປນ ແລະ ແຜນການຂະຫຍາຍຕົວຂອງບໍລິສັດ ບໍລິສັດ ຊືເຟິງ ຈີຫຼົງ ຂຸດຄົ້ນຄຳ ຈະສືບຕໍ່ຮັກສາມາດຕະຖານການດຳເນີນງານໃນລະດັບສາກົນດ້ານຄວາມປອດໄພ ການຮັກສາສິ່ງແວດລ້ອມ ການພັດທະນາຊຸມຊົນ ການພັດທະນາ ແລະ ຍົກລະດັບບຸຄະລາກອນຄົນລາວ.
ລຊມລ ແລະ ລັດຖະບານລາວ ໄດ້ສ້າງສາຍພົວພັນອັນແໜ້ນແຟ້ນໃນການຮ່ວມງານກັນເປັນເວລາຫຼາຍກວ່າ 30 ປີ ບໍ່ຄຳ-ທອງ ເຊໂປນ ມີຄວາມພາກພູມໃຈທີ່ໄດ້ຮັກສາມາດຕະຖານສາກົນສູງທີ່ສຸດ ແລະ ສາມາດຮັກສາມາດຕະຖານໃນລະດັບ A+ ເຊິ່ງອອກໃຫ້ໂດຍກະຊວງພະລັງງານ ແລະ ບໍ່ແຮ່ ແລະ ເປັນທີ່ຍອມຮັບວ່າ ລຊມລ ໄດ້ເປັນແບບຢ່າງທີ່ດີເລີດໃຫ້ບໍລິສັດບໍ່ແຮ່ອື່ນໆຢູ່ ສປປ ລາວ ປີ 2022 ບໍລິສັດ ຊືເຟິງ ຈີຫຼົງ ຂຸດຄົ້ນຄຳ ລຊມລ ໄດ້ເລີ່ມດຳເນີນການກໍ່ສ້າງອຸມົງ ເພື່ອສຳຫຼວດບໍ່ແຮ່ໃຕ້ດິນທີ່ທັນສະໄໝແຫ່ງທຳອິດຢູ ສປປ ລາວ ເຊິ່ງຈະເປັນຕົວຢ່າງໃຫ້ບໍລິສັດອື່ນໃນອຸດສະຫະກຳບໍ່ແຮ່ ແລະ ນັບແຕ່ມື້ເລີ່ມດຳເນີນງານປີ 2003 ລຊມລ ໄດ້ຜະລິດແຜ່ນທອງຫຼາຍກວ່າ 1,1 ລ້ານ ໂຕນ ແລະ ແທ່ງຄຳຫຼາຍກວ່າ 1,5 ລ້ານອອນສ໌ ພ້ອມທັງໄດ້ປະກອບສ່ວນຫຼາຍກວ່າ 1,6 ຕື້ໂດລາສະຫະລັດ ໃຫ້ເປັນລາຍຮັບໂດຍກົງໃຫ້ລັດຖະບານລາວ ໂດຍຜ່ານການຊຳລະພາສີ-ອາກອນ ຄ່າຊັບພະຍາກອນແຮ່ທາດ ແລະ ເງິນປັນຜົນ ນອກນີ້ຍັງໄດ້ສ້າງຜົນປະໂຫຍດທາງອ້ອມຫຼາຍຮ້ອຍລ້ານໂດລາສະຫະລັດ ໃນການສ້າງວຽກເຮັດງານທຳ ການເຝິກອົບຮົມ ການພັດທະນາຊຸມຊົນ ແລະ ການສົ່ງເສີມທຸລະກິດທ້ອງຖິ່ນ ປີ 2021 ໂຄງການຄຳ-ທອງ ເຊໂປນ ຜະລິດທອງໄດ້ຫຼາຍກວ່າ 5.341 ໂຕນ ແລະ ແທ່ງຄຳຫຼາຍກວ່າ 192.988 ອອນສ໌ ສໍາລັບປີ 2022 ຄາດວ່າຈະສາມາດຜະລິດແທ່ງຄຳໄດ້ 224.000 ອອນສ໌ (7 ໂຕນ) ແລະ ແຜ່ນທອງ 8.000 ໂຕນ.
# ສະບາໄພ