ບໍລິສັດ ຊືເຟິງ ຈີຫຼົງ ຂຸດຄົ້ນຄຳ ລົງນາມສັນຍາການຮ່ວມມືກັບລັດວິສາຫະກິດ ພັດທະນາແຮ່ທາດລາວ (ພຮລ) ເພື່ອຊ່ວຍໃຫ້ທຸກຝ່າຍສຸມໃສ່ການສຳຫຼວດ ແລະ ພັດທະນາແຫຼ່ງແຮ່ຕ່າງໆ ເພື່ອກາຍເປັນໂຄງການຂະໜາດໃຫຍ່ໃນອະນາຄົດຢູ່ ສປປ ລາວ ໂດຍພິທີລົງນາມດັ່ງກ່າວ ຈັດຂຶ້ນວັນທີ 11 ກໍລະກົດ 2022 ຢູ່ນະຄອນຫຼວງວຽງຈັນ ລະຫວ່າງທ່ານ ບຸນຍົງ ສີດາວົງ ຜູ້ອຳນວຍການ ພຮລ ແລະ ທ່ານ ພໍ ແຮຣິສ໌ ປະທານກິຕິມະສັກ ບໍລິສັດ ຊືເຟິງ ຈີຫຼົງ ຂຸດຄົ້ນຄໍາ ແລະ ຜູ້ຈັດການໃຫຍ່ບໍລິສັດ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ມີທ່ານ ອຳພົນ ສຸດທິພົນ ຮອງອຳນວຍການ ພຮລ ທ່ານ ສະໝານ ອະເນກາ ຜູ້ອຳນວຍການໃຫຍ່ບໍລິສັດ ລຊມລ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ພໍ ແຮຣິສ ກ່າວວ່າ: ສັນຍາສະບັບນີ້ ຍົກໃຫ້ເຫັນຄວາມໝາຍໝັ້ນທີ່ມີມາຍາວນານຂອງບໍລິສັດ ຊືເຟິງ ຈີຫຼົງ ຂຸດຄົ້ນຄຳ ໃນການເຕີບໂຕ ແລະ ການພັດທະນາຂະແໜງການບໍ່ແຮ່ ຢູ່ໃນ ສປປ ລາວ ຄະນະຂອງພວກເຮົາພວມເຮັດວຽກຮ່ວມມືກັບລັດຖະບານລາວ ເພື່ອພັດທະນາອີກຫຼາຍໂຄງການທີ່ຈະປະສົບຜົນສຳເລັດ ໃຫ້ຄືກັນກັບໂຄງການຄຳ-ທອງ ເຊໂປນ ບໍລິສັດ ຊືເຟິງ ຈີຫຼົງ ຂຸດຄົ້ນຄຳ ແລະ ພຮລ ຈະດຳເນີນການສຳຫຼວດເພື່ອລິເລີ່ມໂຄງການບໍ່ແຮ່ລະດັບໂລກ ເພື່ອສ້າງຜົນປະໂຫຍດຮ່ວມກັນຂອງຜູ້ມີສ່ວນຮ່ວມ ໂດຍສະເພາະ ປະຊາຊົນລາວ ໂດຍຮ່ວມກັບ ພຮລ ແລະ ລັດຖະບານລາວ ຄະນະພວກເຮົາພວມສ້າງພື້ນຖານອັນເຂັ້ມແຂງ ເພື່ອຂະຫຍາຍການລົງທຶນຢ່າງມະຫາສານໃນ ສປປ ລາວ ບໍລິສັດ ຊືເຟິງ ຈີຫຼົງ ຂຸດຄົ້ນຄຳ ຈະຮັກສາມາດຕະຖານສາກົນ ທີ່ເປັນທີ່ຮູ້ຈັກຢ່າງກວ້າງຂວາງ ໂດຍສະເພາະ ດ້ານຄວາມປອດໄພ ສິ່ງແວດລ້ອມ ການພັດທະນາຊຸມຊົນ ແລະ ການກໍ່ສ້າງພະນັກງານລາວ.
ທ່ານ ບຸນຍົງ ສີດາວົງ ກ່າວວ່າ: ສັນຍາສະບັບນີ້ ຊຸກຍູ້ໃຫ້ມີການສຳຫຼວດເຂດທີ່ມີທ່າແຮງດ້ານແຮ່ທາດ ກ່ອນທີ່ຈະເຂົ້າສູ່ສັນຍາສຳປະທານ ພຮລ ມີຄວາມເຊື່ອໝັ້ນໃນດ້ານຄວາມຊຳນິຊຳນານ ແລະ ຄວາມພ້ອມ ຂອງບໍລິສັດ ຊືເຟິງ ຈີຫຼົງ ຂຸດຄົ້ນຄຳ ທີ່ຈະນຳສູ່ຜົນສຳເລັດ ເຊິ່ງເຫັນໄດ້ຈາກຜົນງານດ້ານການດຳເນີນໂຄງການຂຸດຄົ້ນ ແລະ ປຸງແຕ່ງຄຳ-ທອງ ເຊໂປນ ການຊອກຫາເຂດທີ່ມີທ່າແຮງດ້ານແຮ່ທາດ ເປັນສິ່ງສຳຄັນຕັດສິນ ໃນນີ້ ການສະໜັບສະໜູນຈາກລັດຖະບານ ຂະແໜງການກ່ຽວຂ້ອງ ແລະ ຊຸມຊົນທ້ອງຖິ່ນ ມີຄວາມຈຳເປັນໃຫ້ການພັດທະນາຂະແໜງບໍ່ແຮ່ ໃນ ສປປ ລາວ.
ລຊມລ ແລະ ລັດຖະບານລາວ ໄດ້ມີສາຍພົວພັນທີ່ດີ ແລະ ປະສົບຜົນສຳເລັດມາຫຼາຍກວ່າ 30 ປີ ບໍ່ຄຳ-ທອງ ເຊໂປນ ມີຄວາມພາກພູມໃຈທີ່ໄດ້ຮັກສາມາດຕະຖານສາກົນສູງທີ່ສຸດ ແລະ ສາມາດຮັກສາມາດຕະຖານ A+ ເຊິ່ງອອກໃຫ້ໂດຍກະຊວງພະລັງງານ ແລະ ບໍ່ແຮ່ ຢ່າງສະເໝີມາ ແລະ ເປັນທີ່ຍອມຮັບວ່າໄດ້ເປັນແບບຢ່າງສຳລັບບໍລິສັດບໍ່ແຮ່ອື່ນໆ ຢູ່ໃນ ສປປ ລາວ.
ປັດຈຸບັນ ບໍລິສັດ ຊືເຟິງ ຈີຫຼົງ ຂຸດຄົ້ນຄຳ ຖືຫຸ້ນ 90% ໃນ ລຊມລ ເຊິ່ງເປັນເຈົ້າຂອງ ແລະ ດຳເນີນໂຄງການຄຳ-ທອງ ເຊໂປນ ຢູ່ແຂວງສະຫວັນນະເຂດ ນັບແຕ່ເລີ່ມດຳເນີນງານປີ 2003 ເປັນຕົ້ນມາ ລຊມລ ໄດ້ຜະລິດແຜ່ນທອງຫຼາຍກວ່າ 1,1 ລ້ານໂຕນ ແທ່ງຄຳກວ່າ 1,5 ລ້ານອອນສ໌ ປະກອບສ່ວນຫຼາຍກວ່າ 1,6 ຕື້ໂດລາສະຫະລັດ ໃຫ້ເປັນລາຍຮັບໂດຍກົງແກ່ລັດຖະບານລາວ ໂດຍຜ່ານການຊຳລະພາສີ-ອາກອນ ຄ່າຊັບພະຍາກອນແຮ່ທາດ ແລະ ເງິນປັນຜົນ ນອກນີ້ ຍັງໄດ້ສ້າງຜົນປະໂຫຍດທາງອ້ອມຫຼາຍຮ້ອຍລ້ານໂດລາສະຫະລັດ ເຂົ້າໃນການສ້າງວຽກເຮັດງານທຳ ການເຝິກອົບຮົມ ການພັດທະນາຊຸມຊົນ ແລະ ການສົ່ງເສີມທຸລະກິດທ້ອງຖິ່ນ.
ບໍ່ແຮ່ໃຕ້ດິນດິສໂຄເວີຣີ-ດິບສ໌ ເຊິ່ງຈະເປັນບໍ່ແຮ່ໃຕ້ດິນທີ່ທັນສະໄໝແຫ່ງທຳອິດໃນ ສປປ ລາວ ພວມດຳເນີນການກໍ່ສ້າງ ເຊິ່ງຄາດວ່າຍືດອາຍຸການຂອງບໍ່ຄຳ-ທອງ ເຊໂປນ ອອກໄປອີກຢ່າງຕ່ຳ 10 ປີ (ເຖິງປີ 2033) ໂຄງການຂຸດຄົ້ນບໍ່ແຮ່ ຈະປະກອບສ່ວນໃນການສ້າງວຽກເຮັດງານທຳ ການເຕີບໂຕຂອງເສດຖະກິດ ແລະ ການພັດທະນາແບບຍືນຍົງໃນຊຸມຊົນເຈົ້າພາບ ປີ 2021 ໂຄງການຄຳ-ທອງ ເຊໂປນ ຜະລິດທອງຫຼາຍ ກວ່າ 5.341 ໂຕນ ແທ່ງຄຳກວ່າ 192.988 ອອນສ໌ ໃນປີ 2022 ຄາດວ່າຈະຜະລິດແທ່ງຄຳໄດ້ 224.000 ອອນສ໌ (7 ໂຕນ) ແລະ ແຜ່ນທອງ 8.000 ໂຕນ.
# ຂ່າວ – ພາບ : ສະບາໄພ