ພິທີມອບ-ຮັບ ອາຄານຫໍພັກສູນພັດທະນາຜູ້ປະກອບກິດຈະການ ລາວ-ອິນເດຍ ຈັດຂຶ້ນວັນທີ 23 ມິຖຸນາ 2022 ທີ່ສູນພັດທະນາຜູ້ປະກອບກິດຈະການ ລາວ-ອິນເດຍ ໂດຍມີທ່ານ ຮສ. ປອ. ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ທ່ານ ດຣ. ຣາກູມ່າ ລານຈັນ ຊິ່ງ ລັດຖະມົນຕີແຫ່ງລັດກະຊວງການຕ່າງປະເທດ ທ່ານ ດິນກ່າ ອາສທານ່າ (Dinkar Asthana) ເອກອັກຄະລັດຖະທູດອິນເດຍ ຜູ້ມີອຳນາດເຕັມປະຈຳ ສປປ ລາວ ພ້ອມດ້ວຍຜູ້ຕາງໜ້າຈາກກົມສະຖາບັນ ສູນ ແລະ ພະນັກງານວິຊາການສອງຝ່າຍເຂົ້າຮ່ວມ.
ທ່ານ ຮສ. ປອ. ພຸດ ສິມມາລາວົງ ກ່າວວ່າ: ປັດຈຸບັນ ສະຖານເອກອັກຄະລັດຖະທູດອິນເດຍປະຈໍາ ສປປ ລາວ ຍັງສືບຕໍ່ໃຫ້ການຊ່ວຍເຫຼືອທາງດ້ານວິຊາການ ແລະ ສະໜັບສະໜູນວຽກງານການຮ່ວມມື ລະຫວ່າງສູນພັດທະນາຜູ້ປະກອບກິດຈະການ ລາວ-ອິນເດຍ ກັບສະມາຄົມມິດຕະພາບ ລາວ-ອິນເດຍ ໃນການຈັດຕັ້ງກິດຈະ ກຳຕ່າງໆເຊັ່ນ: ການປູກຕົ້ນໄມ້ເພື່ອມິດຕະພາບ ຈັດຕັ້ງການສອນໂຢຄະ ເຝິກອົບຮົມຄອມພິວເຕີ (MS Office 365) ເພື່ອນໍາໃຊ້ເຂົ້າໃນການຮຽນ-ການສອນຮູບແບບທາງໄກ ແລະ ຝຶກອົບຮົມກ່ຽວກັບການປະກອບກິດຈະການ ໃຫ້ແກ່ພະນັກງານພາຍໃນສູນ ແລະ ພາຍນອກ.
ລັດຖະບານສາທາລະນະລັດອິນເດຍ ຍັງໄດ້ຊ່ວຍເຫຼືອໃນການກໍ່ສ້າງອາຄານຫໍພັກໃຫ້ສູນພັດທະນາຜູ້ປະກອບກິດຈະການ ລາວ-ອິນເດຍ ພາຍໃຕ້ໂຄງການເຫັນຜົນໄວຂອງຂອບການຮ່ວມມືແມ່ນ້ຳຂອງ-ແມ່ນ້ຳຄົງຄາ ສົກປີ 2020 ຂອງລັດຖະບານປະເທດອິນເດຍ ສະບັບເລກທີ Vient/220/2020, ລົງວັນທີ 23 ຕຸລາ 2020.
ຫໍພັກດັ່ງກ່າວ ມີມູນຄ່າທັງໝົດ 50.000 ໂດລາສະຫະລັດ ຕົວອາຄານຫໍພັກອອກແບບເປັນຮູບໂຕເອວ (ອັກສອນພາສາອັງກິດ) ເປັນອາຄານຊັ້ນດຽວ 5 ຫ້ອງ (ລວມມີ: ຫ້ອງໂຖ່ງ/ຫ້ອງນອນ ຫ້ອງປຸງແຕ່ງອາຫານ ແລະ ຫ້ອງນໍ້າຢູ່ໃນແຕ່ລະຫ້ອງ) ເພື່ອອໍານວຍຄວາມສະດວກໃຫ້ແກ່ຊ່ຽວຊານຈາກປະເທດອິນເດຍ ທີ່ຈະມາປະຈໍາຢູ່ສູນ ແລະ ບັນດາແຂກທີ່ມາຮ່ວມກອງປະຊຸມເຝິກອົບຮົມທີ່ສູນໄດ້ຈັດຕັ້ງຂຶ້ນເປັນປະຈໍາ.
ໃນໂອກາດນີ້ ທ່ານລັດຖະມົນຕີ ສະແດງຄວາມຂອບໃຈ ແລະ ຄວາມຮູ້ບຸນຄຸນເປັນຢ່າງສູງມາຍັງລັດຖະບານສາທາລະນະລັດອິນເດຍ ແລະ ສະຖານເອກອັກຄະລັດຖະທູດອິນເດຍ ປະຈຳ ສປປ ລາວ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອສູນພັດທະນາຜູ້ປະກອບກິດຈະການ ລາວ-ອິນເດຍ ມາຕະຫຼອດ.
# ວຽງມາ