ກອງປະຊຸມປຶກສາຫາລື ກ່ຽວກັບຄວາມຄືບໜ້າການຈັດຕັ້ງປະຕິບັດ 6 ເດືອນຕົ້ນປີ 2022 ຂອງໂຄງການຄວບຄຸມຄວາມສ່ຽງໄພພິບັດທຳມະຊາດໃນຂົງເຂດອາຊີຕາເວັນອອກສ່ຽງໃຕ້ (SEADRM) ຈັດຂຶ້ນໃນວັນທີ 22 ມິຖຸນາ 2022 ທີ່ໂຮງແຮມລາວ ພລາຊາ ນະຄອນຫຼວງວຽງຈັນ ເປັນປະທານຂອງທ່ານນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ ທັງເປັນປະທານຄະນະຊີ້ນໍາໂຄງການ ມີບັນດາທ່ານຫົວໜ້າ ຮອງຫົວໜ້າກົມ ຫົວໜ້າ ຮອງຫົວໜ້າພະແນກ ຈາກກະຊວງໂຍທາທິການ ແລະ ຂົນສົ່ງ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ກະຊວງການເງິນ ກະຊວງແຜນການ ແລະ ການລົງທຶນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂຄງການຄວບຄຸມຄວາມສ່ຽງຈາກໄພພິບັດທຳມະຊາດໃນຂົງເຂດອາຊີຕາເວັນອອກສ່ຽງໃຕ້ ເປັນໂຄງການຊ່ວຍເຫຼືອທາງການ ເພື່ອການພັດທະນາຈາກທະນາຄານໂລກ ມີມູນຄ່າລວມທັງໝົດ 56 ລ້ານໂດລາສະຫະລັດ ໃນນັ້ນ ເປັນເງິນກູ້ຢືມຈໍານວນ 55 ລ້ານໂດລາສະຫະລັດ ແລະ ເປັນທຶນຊ່ວຍເຫຼືອລ້າຈໍານວນ 1 ລ້ານໂດລາສະຫະລັດ ມີໄລຍະຈັດຕັ້ງປະຕິບັດ 8 ປີ ແຕ່ປີ 2017-2024 ປະກອບດ້ວຍ 5 ໜ້າວຽກຫຼັກຄື:
1. ການຄຸ້ມຄອງຄວາມສ່ຽງໄພນໍ້າຖ້ວມຢູ່ເທດສະບານ ເມືອງໄຊ ແຂວງອຸດົມໄຊ ບໍລິຄຳໄຊ ແລະ ແຂວງຫຼວງພະບາງ ໂດຍແມ່ນການກໍ່ສ້າງຕາຝັ່ງເຈື່ອນ ແລະ ຄັນຄູປ້ອງກັນໍ້າຖ້ວມ ເຊິ່ງມາເຖິງປັດຈຸບັນ ມີຄວາມຄືບໜ້າພໍສົມຄວນໃນວຽກງານການກໍ່ສ້າງ ໂດຍລວມແລ້ວ ອົງປະກອບຈັດຕັ້ງປະຕິບັດໂດຍ ກົມທາງນໍ້າ ກະຊວງໂຍທາທິການ ແລະ ຂົນສົ່ງ ມາເຖິງປັດຈຸບັນ ສາມາດປະຕິບັດໄດ້ 26,89%
2. ປັບປຸງລະບົບເຕືອນໄພລ່ວງໜ້າ/ລະບົບອຸຕຸນິຍົມ ແລະ ກຽມພ້ອມຕໍ່ໄພພິບັດຢູ່ແຂວງອຸດົມໄຊ ຫຼວງພະບາງ ແລະ ຜົ້ງສາລີ ຈັດຕັ້ງປະຕິບັດໂດຍກົມອຸຕຸນິຍົມ ແລະ ອຸທົກກະສາດ ແລະ ກົມແຜນການ ແລະ ການເງິນ ປັດຈຸບັນ ສາມາດປະຕິບັດໄດ້ 21%
3. ການສະໜອງທຶນໃຫ້ແກ່ວຽກງານຕອບໂຕ້ສຸກເສີນ ແລະ ຟື້ນຟູຫຼັງເຫດການໄພພິບັດ ວຽກງານນີ້ ຈັດຕັ້ງປະຕິບັດໂດຍກະຊວງການເງິນ ແລະ ສາມາດປະຕິບັດໄດ້ 94,31%
4. ການເຊື່ອມສານການຫຼຸດຜ່ອນຄວາມສ່ຽງໄພພິບັດທຳມະຊາດ ເຂົ້າໃນຂະບວນການລົງທຶນຂອງລັດ ແລະ ວຽກບໍລິຫານໂຄງການ ຈັດຕັ້ງປະຕິບັດໂດຍກົມແຜນການ ກະຊວງແຜນການ ແລະ ການລົງທຶນ
5. ກົນໄກການຕອບໂຕ້ສຸກເສີນຕໍ່ເຫດການໄພພິບັດ.
ໃນກອງປະຊຸມຄັ້ງນີ້ ໄດ້ຮັບຟັງການລາຍງານສະພາບ ແລະ ຄວາມຄືບໜ້າໃນການຈັດຕັ້ງປະຕິບັດໂຄງການຄວບຄຸມຄວາມສ່ຽງໄພພິບັດທຳມະຊາດໃນຂົງເຂດອາຊີຕາອອກສ່ຽງໃຕ້ 6 ເດືອນຕົ້ນປີ 2022 ຈາກ 4 ກະຊວງທີ່ເປັນຜູ້ຈັດຕັ້ງປະຕິບັດໂຄງການ ໂດຍສະເພາະການແກ້ໄຂບັນດາຂໍ້ຄົງຄ້າງຕ່າງໆໃນການປະເມີນກາງສະໄໝທີ່ຜ່ານມາ ແລະ ວາງແຜນການຈັດຕັ້ງປະຕິບັດວຽກງານໃນ 6 ເດືອນທ້າຍປີ 2022 ຜ່ານການລາຍງານເຫັນໄດ້ວ່າ ບັນດາກິດຈະກໍາຕ່າງໆຂອງໂຄງການແມ່ນມີຄວາມຄືບໜ້າດີພໍສົມຄວນ ແລະ ສາມາດແກ້ໄຂຂໍ້ຄົງຄ້າງຕ່າງໆໄດ້ໃນລະດັບທີ່ໜ້າພໍໃຈ ແຕ່ເຖິງຢ່າງໃດກໍຕາມ ກໍຍັງມີຫຼາຍກິດຈະກໍາທີ່ຍັງບໍ່ສາມາດເຮັດສໍາເລັດໄດ້ຕາມແຜນທີ່ວາງໄວ້ ເຊິ່ງແຕ່ລະກະຊວງຈະຕ້ອງໄດ້ສຸມທຸກກໍາລັງ ແລະ ສະຕິປັນຍາເຮັດໃຫ້ສໍາເລັດຕາມກໍານົດເວລາທີ່ວາງໄວ້.
ທ່ານ ນາງ ພອນວັນ ອຸທະວົງ ໄດ້ກ່າວໃນບາງຕອນວ່າ: ການຈັດຕັ້ງປະຕິບັດໂຄງການດັ່ງກ່າວ ຍັງເຫຼືອໄລຍະເວລາພຽງປະມານ 2 ປີເຄິ່ງເທົ່ານັ້ນ ໃນການຈັດຕັ້ງປະຕິບັດໂຄງການໃຫ້ສໍາເລັດ ດັ່ງນັ້ນ ໃນໄລຍະເວລາທີ່ຍັງເຫຼືອນີ້ ທຸກອົງປະກອບຈະຕ້ອງໄດ້ຂຸ້ນຂ້ຽວເອົາໃຈໃສ່ທີ່ສຸດ ເພື່ອໃຫ້ສາມາດສຳເລັດກິດຈະກຳຕ່າງໆໃຫ້ທັນກໍານົດເວລາ ແລະ ໃຫ້ໄດ້ປະສິດທິຜົນຕາມເປົ້າໝາຍ ແລະ ຈຸດປະສົງຫຼັກຂອງໂຄງການທີ່ວາງໄວ້.
# ຂ່າວ – ພາບ : ເພັດສະໝອນ