ໂຄງການກອງທຶນສົ່ງເສີມການເຂົ້າເຖິງແຫຼ່ງທຶນໃນ ສປປ ລາວ (LAFF) ທະນາຄານແຫ່ງ ສປປ ລາວ (ທຫລ) ແລະ ສະມາຄົມການເງິນຈຸລະພາກ (ສມກຈ) ຈັດສໍາມະນາຫົວຂໍ້: “ການນໍາສະເໜີກ່ຽວກັບການເງິນສີຂຽວ (Green Finance) ໃຫ້ສະຖາບັນການເງິນທີ່ເປັນຄູ່ຮ່ວມງານຂອງກອງທຶນ LAFF ແລະ ສະຖາບັນການເງິນຈຸລະພາກທີ່ຮັບເງິນຝາກ (ສກຈຮ) ຢູ່ ສປປ ລາວ” ຂຶ້ນວັນທີ 21 ມິຖຸນາ 2022 ຢູ່ໂນະຄອນຫຼວງວຽງຈັນ ໂດຍມີທ່ານ ຄໍາແກ້ວ ວິສີສົມບັດ ຫົວໜ້າກົມບໍລິການ ທຫລ ທ່ານ ອິນທຣາຈິດ ວີເຈສິຣິວັດທະນາ ຫົວໜ້າທິມງານທີ່ປຶກສາໂຄງການ AFC ທີ່ປຶກສາປະຈໍາກອງທຶນ LAFF ພ້ອມດ້ວຍຜູ້ຕາງໜ້າຈາກ ທຫລ ຄະນະຄຸ້ມຄອງບໍລິຫານກອງທຶນ ສມກຈ ບັນດາທະນາຄານ ສະຖາບັນການເງິນທີ່ເປັນຄູ່ຮ່ວມງານຂອງກອງທຶນ LAFF ແລະ ສກຈຮ ເຂົ້າຮ່ວມ.
ໂຄງການດັ່ງກ່າວ ໄດ້ເລີ່ມຕົ້ນດ້ວຍການລົງນາມສັນຍາຮ່ວມມືດ້ານການເງິນລະຫວ່າງລັດຖະບານເຢຍລະມັນ ຕາງໜ້າໂດຍທະນາຄານເພື່ອການພັດທະນາປະເທດເຢຍລະມັນ (KfW) ແລະ ລັດຖະບານ ສປປ ລາວ ຕາງໜ້າໂດຍກະຊວງການເງິນ ໃນນາມເປັນຜູ້ຮັບທຶນຊ່ວຍເຫຼືອ ແລະ ທຫລ ໃນນາມເປັນຜູ້ຄຸ້ມຄອງບໍລິຫານໂຄງການ ດ້ວຍເງິນຊ່ວຍເຫຼືອໄລຍະ I ຈຳນວນ 3 ລ້ານເອີໂຣ ທີ່ໄດ້ລົງນາມສັນຍາໃນເດືອນມີນາ 2014 ໄລຍະທີ II ຈໍານວນ 6 ລ້ານເອີໂຣ ທີ່ໄດ້ລົງນາມສັນຍາໃນເດືອນສິງຫາ 2020 ໂດຍມີເປົ້າໝາຍເພື່ອສ້າງເປັນກອງທຶນສົ່ງເສີມການເຂົ້າເຖິງແຫຼ່ງທຶນສຳລັບຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ (MSMEs) ໂດຍການສະໜອງທຶນເງິນກູ້ໄລຍະຍາວທີ່ເປັນສະກຸນເງິນກີບ ຕາມເງື່ອນໄຂຕະຫຼາດໃຫ້ທະນາຄານທຸລະກິດ ແລະ ສກຈຮ ທີ່ມີຄວາມເຂັ້ມແຂງດ້ານການດຳເນີນງານ ດ້ານການເງິນ ແລະ ມີຍຸດທະສາດການປ່ອຍເງິນກູ້ຍ່ອຍ ໃຫ້ກຸ່ມລູກຄ້າ MSMEs ທີ່ນອນໃນເຂດນອກຕົວເມືອງໃຫຍ່ (ເງິນກູ້ຍ່ອຍຈະຖືກປ່ອຍອອກຢູ່ນອກພື້ນທີ່ 3 ຕົວເມືອງໃຫຍ່ຂອງນະຄອນຫຼວງວຽງຈັນ ເຊັ່ນ: ຈັນທະບູລີ ໄຊເສດຖາ ແລະ ສີສັດຕະນາກ).
ກອງທຶນ LAFF ຕັ້ງຢູ່ກົມບໍລິການ ທຫລ ເຊິ່ງໄລຍະຜ່ານມາໂຄງຮ່າງການຄຸ້ມຄອງບໍລິຫານກອງທຶນ ໄດ້ຮັບການຕົກລົງເຫັນດີຈາກອົງການຜູ້ໃຫ້ທຶນ ກໍຄື KfW ແລະ ທຫລ ເພື່ອຮັບປະກັນເຮັດໃຫ້ການຄຸ້ມຄອງບໍລິຫານກອງທຶນດັ່ງກ່າວມີປະສິດທິຜົນ ແລະ ມີຄວາມໂປ່ງໃສ ຮັບປະກັນເຮັດໃຫ້ກອງທຶນມີການຂະຫຍາຍຕົວ ເພື່ອເປີດໂອກາດໃຫ້ຫຼາຍທະນາຄານທຸລະກິດ ແລະ ສະຖາບັນການເງິນຈຸລະພາກ ໄດ້ກູ້ຢືມທຶນຈາກກອງທຶນ ເພື່ອນຳໄປປ່ອຍກູ້ຕໍ່ໃຫ້ MSMEs ປັດຈຸບັນມີສະຖາບັນການເງິນທີ່ເປັນຄູ່ຮ່ວມງານກັບກອງທຶນ 7 ສະຖາບັນການເງິນ (3 ທະນາຄານທຸລະກິດ 4 ສກຈຮ) ລວມວົງເງິນທີ່ໄດ້ອະນຸມັດແຕ່ເລີ່ມໂຄງການຈົນຮອດປັດຈຸບັນ 135 ຕື້ກີບ ເຊິ່ງ MSMEs ເປັນອົງປະກອບສຳຄັນທີ່ປະກອບສ່ວນໃນການຂະຫຍາຍຕົວດ້ານເສດຖະກິດຂອງ ສປປ ລາວ ຢ່າງຕໍ່ເນື່ອງ ປະກອບສ່ວນໃນການສ້າງວຽກເຮັດງານທຳໃຫ້ປະຊາຊົນ ແລະ ສ້າງລາຍຮັບໃຫ້ຜູ້ປະກອບການ MSMEs ຫຼື ວິສາຫະກິດລະດັບຄົວເຮືອນ.
ການເງິນສີຂຽວ ເປັນຫົວຂໍ້ໃໝ່ທີ່ກອງທຶນເຫັນວ່າ ສະຖາບັນການເງິນທີ່ເປັນຄູ່ຮ່ວມງານຂອງກອງທຶນ LAFF ຍັງມີຄວາມສັບສົນກັນຢູ່ ໂດຍທົ່ວໄປກ່ຽວກັບການເງິນສີຂຽວ ຈຶ່ງໄດ້ກຳນົດຄຳນິຍາມໃນການເຮັດວຽກກ່ຽວກັບການເງິນສີຂຽວ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານດັ່ງກ່າວ ໃນຂະບວນການດຳເນີນງານຂອງກອງທຶນ LAFF ເຊິ່ງບາດກ້າວຕໍ່ໄປກອງທຶນຈະຊຸກຍູ້ສົ່ງເສີມໃຫ້ສະຖາບັນການເງິນທີ່ເປັນຄູ່ຮ່ວມງານຂອງກອງທຶນ ຂະຫຍາຍການປ່ອຍເງິນກູ້ໃຫ້ກິດຈະກຳທີ່ເປັນການເງິນສີຂຽວ ໂດຍຈະມີການສົນທະນາກັນ ແລະ ແລກປ່ຽນນຳກັນທີ່ເປັນປະໂຫຍດ ເປັນບ່ອນອີງໃນການນຳໄປສູ່ການຈັດຕັ້ງປະຕິບັດການຊຸກຍູ້ສົ່ງເສີມວຽກງານການເງິນສີຂຽວ ໃຫ້ເກີດດອກອອກຜົນໃນອະນາຄົດ.
# ຂ່າວ – ພາບ : ສະບາໄພ