ວັນທີ 9 ມິຖຸນາ 2022 ຜ່ານມາ ອະດີດພະນັກງານການນຳເມືອງຫາດຊາຍຟອງ ນະຄອນຫຼວງວຽງຈັນ ໄດ້ຮ່ວມກັນຈັດກິດຈະກຳປູກຕົ້ນໄມ້ ແລະ ແຂ່ງຂັນກີລາເປຕັງ ເພື່ອສະເຫຼີມສະຫຼອງວັນປູກຕົ້ນໄມ້ແຫ່ງຊາດ ໃນເດືອນມິຖຸນາ ຕາມນະໂຍບາຍຂອງພັກ-ລັດວາງອອກ ເພື່ອນຳພາໃຫ້ລູກຫຼານໄດ້ຮູ້ຈັກປົກປັກຮັກສາທຳມະຊາດ ທັງເປັນການຮັດແໜ້ນຄວາມສາມັກຄີຮັກແພງຂອງອະດີດພະນັກງານການນຳອາວຸໂສ ໃນປີ 1975-2022 ຈຳນວນ 21 ທ່ານ ທີ່ໄດ້ຮັບກະສຽນເຂົ້າພັກຜ່ອນ ແລະ ເນື່ອງຈາກວ່າພວກເພິ່ນໄດ້ມີການຫ່າງເຫີນກັນໄປເປັນເວລາຫຼາຍປີພໍສົມຄວນ ກໍເກີດມີຄວາມຄິດຮອດຄິດເຖິງກັນ ພ້ອມນັ້ນ ເພື່ອເປັນການຫວນຄືນອະດີດໃນສະໄໝທີ່ໄດ້ເຮັດວຽກເຮັດງາມຮ່ວມກັນ ດັ່ງນັ້ນ ອະດີດການນຳເມືອງ ຈຶ່ງໄດ້ຮ່ວມກັນຈັດກິດຈະກຳຂຶ້ນໃນເວລາຫວ່າງ ແລະ ເໝາະສົມ ເພື່ອພົບໜ້າພໍ້ຕາກັນ ເຊິ່ງງານພົບປະພະນັກງານບຳນານຂອງອະດີດການນຳເມືອງຫາດຊາຍຟອງ ແລະ ອະດີດພະນັກງານການນຳນະຄອນຫຼວງວຽງຈັນ ຢູ່ທີ່ເຮືອນສວນຂອງທ່ານ ທອງອິນ ອຸປະລະ ພະນັກງານບຳນານ ໄອຍະການເຂດ IV ນະຄອນຫຼວງວຽງຈັນ ບ້ານດົງຄຳຊ້າງ ເມືອງຫາດຊາຍຟອງ ໂດຍມີ ທ່ານ ບຸນທ່ຽງ ຂຸນສີ ອະດີດປະທານແນວລາວສ້າງຊາດນະຄອນຫຼວງວຽງຈັນ ທ່ານ ແກ່ນ ວໍລະສານ ແລະ ທ່ານ ຂັນທະລີ ພານວົງ ອະດີດຮອງເຈົ້າເມືອງຫາດຊາຍຟອງ ແລະ ພ້ອມດ້ວຍອະດີດພະນັກງານການນຳເມືອງ ຜູ້ອື່ນໆ ແລະ ແຂກທີ່ເຊີນເຂົ້າຮ່ວມອີກດ້ວຍ.
ສຳລັບກິດຈະກຳທີ່ໄດ້ຈັດຂຶ້ນ ມີບັນດາທ່ານອະດີດການນຳໄດ້ຮ່ວມກັນປູກຕົ້ນໄມ້ທີ່ສວນດັ່ງກ່າວ ໄດ້ຮ່ວມກິດຈະກຳຕີເປຕັງ ແລະ ຮ່ວມພາເຂົ້າສາມັກຄີ ເພື່ອເປັນການພົບປະສັງສັນ ຮັກແພງກັນຢ່າງສະໜິດແໜ້ນ ແລະ ມີມິດຕະພາບທີ່ດີຕໍ່ກັນ ເພາະວ່າໃນໄລຍະທີ່ຜ່ານມາ ພວກເພິ່ນກໍ່ເປັນຜູ້ໜຶ່ງທີ່ໄດ້ເຄີຍຮ່ວມເຮັດວຽກງານນຳກັນມາຫຼາຍປີ ປະສານສົມທົບກັນຕະຫຼອດມາ ເຄີຍເປັນການນຳ ແລະ ເຮັດໜ້າທີ່ຕາມການມອບໝາຍ ແບ່ງວຽກແບ່ງງານຂອງການຈັດຕັ້ງຂັ້ນເທີງໄດ້ເປັນຢ່າງດີ ແລະ ມາຮອດປັດຈຸບັນນີ້ ກໍຖືໄດ້ວ່າພວກເພີ່ນແມ່ນໄດ້ປະສົບຜົນສຳເລັດ ແລະ ມີໄຊຢ່າງຈົບງາມ.
.# ຂ່າວ – ພາບ: ຂັນທະວີ