ງານວາງສີລາລຶກ ການກໍ່ສ້າງພັດທະສິມມາ (ສິມ) ວັດສິຣິມຸງຄຸນ ໄຊສົມບູນເກົ່າ ບ້ານໄຊສົມບູນ ຫຼັກ 21 ເມືອງໄຊທານີ ນະຄອນຫຼວງວຽງຈັນ ວັນທີ 12 ມິຖຸນາ 2022 ໂດຍມີພະເຖລານຸເຖຣະ ທ່ານນາງ ນາລີ ສີສຸລິດ ພັນລະຍາປະທານປະເທດ ທ່ານ ຄໍາປະດິດ ເຂັມມານິດ ເຈົ້າເມືອງໄຊທານີ ແລະ ທ່ານນາງ ອິນແປງ ຊາມຸນຕີ ອໍານວຍການບໍລິສັດປາກຊ່ອງ ພັດທະນາຂາເຂົ້າ-ຂາອອກ ຈໍາກັດ ພ້ອມດ້ວຍຄອບຄົວການນໍາ ເຈົ້າພາບ-ເຈົ້າສັດທາ ອົງການປົກຄອງບ້ານ ພໍ່ແມ່ປະຊາຊົນພາຍໃນບ້ານ ແລະ ບ້ານອ້ອມຂ້າງເຂົ້າຮ່ວມ.
ທ່ານ ຄໍາຕັນ ກວ້າງມະນີວັນ ນາຍບ້ານໄຊສົມບູນ ໄດ້ລາຍງານໃຫ້ຮູ້ວ່າ: ບ້ານໄຊສົມບູນມີວັດ 2 ແຫ່ງຄື:ວັດສິຣິມຸງຄຸນ ໄຊສົມບູນເກົ່າ ແລະ ວັດໃໝ່ໄຊຈະເລີນ ເຊິ່ງຈຸດປະສົງຂອງການສ້າງພັດທະສິມມາວັດສິຣິມຸງຄຸນ ໄຊສົມບູນເກົ່າ ມີຈຸດປະສົງເພື່ອສ້າງຄວາມສາມັກຄີ ເພີ່ມພູນບຸນກຸສົນໃຫ້ແກ່ເຈົ້າພາບເຈົ້າສັດທາ ຜູ້ອຸປະຖໍາຫຼັກ ແລະ ຊາວພຸດທະສາສະນິກະຊົນທັງຫຼາຍໂດຍທົ່ວເຖິງກັນ ພ້ອມນັ້ນ ເພື່ອສ້າງຄວາມເປັນສິຣິມຸງຄຸນຕໍ່ການຢູ່ອາໄສ ມີຄວາມຈະເລີນຮຸ່ງເຮືອງ ມັ່ງຄັງ ໝັ້ນຄົງ ຢູ່ເຢັນເປັນສຸກ ມີຊີວິດທີ່ດີຕະຫຼອດໄປ ນອກນີ້ ເພື່ອບົ່ງບອກເຖິງເຂດແດນຂອງວັດ ແລະ ເປັນບ່ອນສັງຄະກໍາຮ່ວມກັນຂອງພະສົງທັງປວງໄດ້ ດັ່ງນັ້ນ ການສ້າງສິມ ເປັນສິ່ງສໍາຄັນ ແລະ ຈໍາເປັນ ເພາະເປັນອົງປະກອບຂອງວັດ ເຮັດໃຫ້ວັດກາຍເປັນວັດທີ່ສົມບູນແບບໄດ້.
ສໍາລັບການວາງສີລາລຶກກໍ່ສ້າງພັດທະສິມມາດັ່ງກ່າວຄັ້ງນີ້ ໂດຍການນໍາພາຂອງພະອາຈານ ເພັດ ພຸດທະປັນຍາ ພ້ອມດ້ວຍພະສົງ-ສາມະເນນພາຍໃນວັດ ແລະ ການຈັດຕັ້ງບ້ານໄຊສົມບູນ ເຊິ່ງໄດ້ຮັບການອຸປະຖໍາເປັນເຈົ້າພາບສັດທາຫຼັກໂດຍຄອບຄົວທ່ານ ນາງ ນາລີ ສີສຸລິດ ຄອບຄົວທ່ານ ມົນຕຣີ ຊົມສະໝຸດ+ທ່ານ ນາງ ອິນແປງ ຊາມຸນຕີ ຕະຫຼອດຮອດຜູ້ທີ່ມີຈິດໃຈເຫຼື້ອມໃສສັດທາຈາກມວນຊົນພຸດສາສະນິກະຊົນ ຮ່ວມກັນສົມທົບທຶນໃນການກໍ່ສ້າງ ແຕ່ກ່ອນສິມຈະສໍາເລັດການກໍ່ສ້າງສົມບູນໄດ້ ກໍຕ້ອງອາໄສສັດທາຈາກບັນດາທ່ານທີ່ເປັນເຈົ້າພາບຫຼັກ ແລະ ສັດທາທົ່ວໄປ ຈົ່ງຮ່ວມມືຮ່ວມໂມທະນາວັດຖຸປັດໄຈຕາມກໍາລັງສັດທາປະກອບສ່ວນສ້າງນໍາກັນນັບແຕ່ວັນວາງສີລາລຶກເປັນຕົ້ນໄປ
.
# ຂ່າວ – ພາບ: ຂັນທະວີ