ເຂົ້າ ເປັນອາຫານຕົ້ນຕໍຂອງ ສປປ ລາວ ແລະ ຍັງມີບົດບາດທີ່ສໍາຄັນໃນການນໍາໃຊ້ເຂົ້າໃນການຕໍ່ຕ້ານການຂາດໂພຊະນາການ ການຂາດຈຸລະສານອາຫານ ຫຼື ການຂາດໂພຊະການແບບເຊື່ອງຊ້ອນ ແມ່ນພົບເຫັນຢູ່ທົ່ວໄປໃນ ສປປ ລາວ ແມ່ນການຂາດວິຕະມິນ ແລະ ແຮ່ທາດ ທີ່ມີຄວາມຈໍາເປັນໃນປະລິມານໃດໜຶ່ງ ທີ່ມີຜົນຕໍ່ການເຕີບໂຕ ແລະ ພັດທະນາຢ່າງສົມບູນ ໂດຍສະເລ່ຍ 40% ຂອງແມ່ຍິງໄວຈະເລີນພັນ ແລະ 44% ຂອງເດັກອາຍຸລຸ່ມ 5 ປີ ມີອາການພະຍາດເລືອດຈາງທີ່ເກີດຈາກການຂາດທາດເຫຼັກ ແຕ່ໃນບາງພື້ນທີ່ໃນທົ່ວປະເທດ ອັດຕາດັ່ງກ່າວແມ່ນມີຄວາມແຕກໂຕນກັນຫຼາຍ ບັນຫາດັ່ງກ່າວ ສາມາດສົ່ງຜົນກະທົບທີ່ແກ່ຍາວ ແລະ ຮຸນແຮງຕໍ່ສຸຂະພາບ ແລະ ການພັດທະນາຂອງເຂົາເຈົ້າໃນຕໍ່ໜ້າ.
ກອງປະຊຸມເຕົ້າໂຮມຄະນະຮັບຜິດຊອບ ພັດທະນາ ແລະ ສົ່ງເສີມການເພີ່ມວິຕະມິນແຮ່ທາດໃສ່ອາຫານ ໃນການຈັດຕັ້ງປະຕິບັດວຽກງານການເພີ່ມວິຕະມິນແຮ່ທາດໃສ່ເຂົ້າ ຈັດຂຶ້ນວັນທີ 10 ມິຖຸນາ 2022 ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານ ຟູມີຊູກູ ໂຕຊູ (Fumitsugu Tosu) ຫົວໜ້າແຜນງານ ຂອງອົງການອາຫານໂລກ ທ່ານ ດຣ ນາງ ພອນສະຫວັນ ແກ້ວນະຄອນ ຮັກສາການຫົວໜ້າສູນໂພຊະນາການແຫ່ງຊາດ ກະຊວງສາທາລະນະສຸກ ພ້ອມດ້ວຍບັນດາທ່ານຜູ້ຕາງໜ້າຈາກກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄະນະຮັບຜິດຊອບພັດທະນາ ແລະ ສົ່ງເສີມການເພີ່ມວິຕະມິນແຮ່ທາດໃນຄັ້ງນີ້ ໄດ້ເປີດໂອກາດໃຫ້ບັນດາຄະນະຜູ້ເຂົ້າຮ່ວມ ໄດ້ມີການປຶກສາຫາລື ກ່ຽວກັບພາລະບົດບາດຂອງຕົນ ແລະ ທິດທາງແຜນການໃນຕໍ່ໜ້າ ເພື່ອຈັດຕັ້ງປະຕິບັດຍຸດທະສາດການຈັດຕັ້ງປະຕິບັດການເພີ່ມວິຕະມິນແຮ່ທາດ ການພັດທະນາມາດຕະຖານແຫ່ງຊາດ ໃນການເພີ່ມວິຕະມິນແຮ່ທາດໃສ່ເຂົ້າ ແລະ ການສຶກສາຄົ້ນຄົ້ວາ ວິທີການທີ່ຈະຊ່ວຍໃຫ້ເຂົ້າເພີ່ມວິຕະມິນແຮ່ທາດ ໄດ້ຮັບການຍອມຮັບໃນລະດັບດີ ເຊິ່ງຈະສຶກສາໃນຂອບເຂດໂຮງຮຽນ ແລະ ຊຸມຊົນເປົ້າໝາຍ ທີ່ເດັກນ້ອຍນັກຮຽນໄດ້ຮັບເຂົ້າເພີ່ມວິຕະມິນແຮ່ທາດການເພີ່ມວິຕະມິນແຮ່ທາດໃສ່ເຂົ້າ ໄດ້ກາຍເປັນບຸລິມະສິດຂອງລັດຖະບານ ສປປ ລາວ ເຊິ່ງແມ່ນໜຶ່ງ ຍຸດທະສາດ ແລະ ແຜນປະຕິບັດງານແຫ່ງຊາດດ້ານໂພຊະນາການ ຮອດປີ 2025.
# ຂ່າວ – ພາບ : ບຸນມີ